ကအ်ကြိက်၊ မာတ် ၂၇
ကြဴနူဒပ်ပၠန်ဂတးပံၚ်ကောံတံ သီဂွံ ဗ္ဒိုပ်ကအ်ဗိန်တုဲဂှ် ကရောၚ်ပၞာန်ဒပ်ကံၚ်ဇြဳပၞာန် လုပ်ကၠုၚ်ဂှ်ရ ညးဍုၚ်ကွာန် ဒၟံၚ်ကွာန်မွဲဒမြိပ်ၜဳဂြာၚ်တံ ဒးဂြိပ်ဒဴပါဲဒလေတ်ဒၟံၚ်ဂှ် ဂွံတီကေတ် ဇရေၚ်ညးဒေသတံရ။
ပ္ဍဲဂိတုမာတ် ၂၄ ပယျာံနူဂယး ဒပ်ပံၚ်ကောံပၠန်ဂတးတံ စဗ္တိုက်လဝ် ဗ္ဒိုပ်ဗၠာဲသၟိၚ်တိဍာ်ကအ်ဗိန် ပွိုၚ်ဍုၚ်ကအ်ကြိက် ဒေသၜဳဂြာၚ် ပယျဵုတွဵုရးကရေၚ် ကေုာံ တွဵုရးဍုၚ်မန်ဂှ်တုဲ ပ္ဍဲဂိတုမာတ် ၂၅ အခိၚ်လဒေါဝ်တ္ၚဲ ၜိုတ်မွဲနာဍဳဂှ် သီဂွံလဝ်ရ။
ကြဴနူဗ္ဒိုပ်ဗၠာဲသၟိၚ်ကအ်ဗိန်စှ်ေတုဲ ပ္ဍဲဂိတုမာတ် ၂၅ ၜိုတ်ဇိုၚ်သဝ်တ္ၚဲ ၅ နာဍဳဂှ် ကရောၚ်ပၞာန်ကံၚ်ဇြဳပၞာန် ဇြဟတ်ဒပ်ပွဳပွူ ၁၀၀ ပါဂှ်ဝွံ နူမတ်မလီု ဇက်တိုန်ကၠုၚ် အတိုၚ်ဂၠံၚ်ဒဵုခရီုဂှ်တုဲ လုပ်စိုပ်ဖျေံလဝ်ဒပ် ပ္ဍဲကဵုကွာန်ကအ်သိုက်ကဵု ကွာန်ကြေဝ်ဏာဂှ် ညးဒေသတံ သ္ဂးရ။
ညးဒေသကွာန်ကြေဝ်ဏာမွဲတၠဂှ် ဒပ်ကံၚ်ဇြဳပၞာန်တံ ဟိုတ်နူလုပ်စိုပ်ဖျေံလဝ်ဒပ် ပ္ဍဲကွာန်တုဲ နူဇိုၚ်သဝ်တ္ၚဲနူဏေံတေံဂှ် ကောန်ကွာန်တံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နူဂယး ဒဵုကဵုလၟုဟ် မုဟွံမိၚ်ဏီပုဟ်။ လၟုဟ်ဂှ် သ္ၚိတ်ဇြဒၟံၚ်ရောၚ် ဂွံမိၚ်ကေတ်ရ။ ကောန်ကွာန်တံ ဟွံမွဲစကွေံရပုဟ်၊ ဂြိပ်အာအိုတ်ယျ။ မၞိဟ်ဂြိပ်တံလေဝ်နွံ။ မၞိဟ်ဟွံဂြိပ်တံလေဝ်နွံ။ ပ္ဍဲဂၠံၚ် လၟုဟ်ဂှ် မၞိဟ်မွဲမှဟွံမွဲရပုဟ်ဂှ် ဟီုဒၟံၚ်အိုတ်ရ။ အဲဂှ် အောပ်မံၚ် သြၚ်လ္ပာ်ဏံ” သာ်ဝွံ သ္ဂးရ။
ညးဍုၚ်ကွာန်ဒေသ နူကဵုကွာန်ဂၠံၚ်ကာဆက်ဒၟံၚ်ကဵုကွာန်ကအ်ဗိန်ဂမၠိုၚ် မပ္တံကဵုကွာန်ဓမ္မသ၊ ကြေဝ်ဏာ၊ ကအ်သိုက်၊ ဒဵုခရီုတံဂှ်ဝွံ ဂွိၚ်ဖေက်ပေါဲဗ္တိုက်က္တဵုဒှ်တုဲ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
မွဲလ္ပာ်ဂှ်ပၠန် ကွာန်ကအ်ဗိန်ကဵု ကွာန်ကြေဝ်ဏာဂှ် သ္ၚောဲမံၚ်ၜိုတ် ၇ မိုၚ်ပြၚ်ရတုဲ ဍုၚ်မတ်မလီု ဌာန်ဂအုပ်ပၞာန်ရးအဂၞဲနွံဂှ်ကဵု ကွာန်ကအ်ဗိန်ဂှ်ဝွံ သ္ၚောဲဒၟံၚ် ၂၀ မိုၚ်ဓဝ်ဂှ်ရ ဒှ်ဒၟံၚ်ဇမ္ၚောဲ ဒးဒဳအတိုၚ်ဂၠံၚ်ကာ ၜိုတ်ပွိုၚ်မွဲနာဍဳစိုပ် မဒှ်ရ။
ဟိုတ်ဂှ်ရ ကံၚ်ဇြဳပၞာန်ဝွံ ဒပ်ပံၚ်ကောံပၠန်ဂတးရပ်လွဟ်တံ နူကဵုကွာန်ကအ်ဗိန်မွဲကဆံၚ် တတ်ကွာန်ကြေဝ်ဏာတုဲ နူကဵုပါၚ်ဂၠံၚ်ဒဵုခရီုမွဲကဆံၚ် ညံၚ်ဂွိုအ်စိုပ်ဍုၚ်မတ်မလီုဂှ် ဒှ်ဒၟံၚ်အကာဲအရာ ကၟာတ်တာဒၞါအာ အကြာဂၠံၚ်တံဏောၚ် မဒှ်ရ။
နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ AD ဂှ်လေဝ် ကရောၚ်ပၞာန်ဒပ်ကံၚ်ဇြဳပၞာန် လုပ်စိုပ်ကၠုၚ်တုဲ ဒဒှ်ရနွံဒၟံၚ်လ္ပာ်ဒဵုဒရီု ဂွံလဝ်ပရိုၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တ္ၚဲဏံ ပ္ဍဲဂိတုမာတ် ၂၆ အခိၚ်ဇိုၚ်သဝ်တ္ၚဲ ၃ နာဍဳပြၚ်ဂှ် ပၞာန်ကျာဒပ်ကံၚ်ဇြဳပၞာန် ပန်ပှော်ဗ္တိုက် မွဲဒမြိပ်ဗ္ဒါဲဗ္ဒိုပ်ဗၠာဲသၟိၚ်ကအ်ဗိန်ဂှ်တုဲ ညးဒေသဒၟံၚ်ကွာန်နံၚ်ခေတ်မွဲတၠ ဇီုကပိုက်ကလိဂွံဝပ်တုဲ လွဳဒၟံၚ် အပ္ဍဲဒေသဂှ် ညးဒေသကအ်ဗိန်မွဲတၠ ဟီုရ။
“လၟုဟ် ရဲအာဒုၚ်မၞိဟ်ယဲတံဂှ် အာပလံၚ်ဗ္ဒမ်ဂဥုဲ ဟီုဒၟံၚ်ရ။ ဆ္ဂး အဲဟွံဂွံသၟာန်ညး ချိုတ်တ်ပၠိုတ်တ်ဏီပုဟ်။ လၟုဟ် ပလံၚ်ဒၟံၚ်ဗ္ဒမ်ဂဥုဲဖိုဟ်ရ။ ဌာနပရေၚ်ထတ်ယုက်ဂှ်လေဝ် ကၟာတ်လဝ်ဏောၚ်။ ပြဟ်ဟ်ဏံ အာလွဳဒၟံၚ် ပ္ဍဲအ္စာဂဥုဲ ပ္ဍဲကွာန်မွဲတၠရ” သာ်ဝွံ သ္ဂးရ။
ပြဟ်ဟ်ဏံ ညးဍုၚ်ကွာန်ဒေသ ဒၟံၚ်ကွာန်ကအ်ဗိန်၊ ကအ်ပံက်၊ ကျာ်ဇၞော်၊ ဓမ္မသ၊ ကြေဝ်ဏာ ကေုာံ ကအ်သိုက် အပ္ဍဲဒေသၜဳဂြာၚ် ဂၠိုၚ်ကဵုလ္ၚီ ပါဲဒလေတ်အာဒၟံၚ် လ္ပာ်ဘာလကျာ်၊ လ္ပာ်ကွာန်ဗၠးဘဲတံတုဲ ဟွံဂွံစဴဌာန်ဒၟံၚ်ဏီရ။
ပ္ဍဲပေါဲဗ္တိုက်သီဗ္ဒိုပ်ဗၠာဲသၟိၚ်ကအ်ဗိန်ဂှ် ကောန်ဒပ်ကံၚ်ဇြဳပၞာန် ၅ တၠ ချိုတ်တုဲ ၂၃ တၠဂှ် ရပ်ဂွံလဝ် နဒဒှ်ဂၠုဲပၞာန်တုဲ သီဂွံလဝ် လွဟ်လက်နက် ၂၇ ဇကိုအ်ဂှ် ကရောၚ်ပၞာန်ဗျူဟာ Lion Battalion သၟဝ်တဲ KNLA ပါလုပ်ဒၟံၚ် ပ္ဍဲဒပ်ပၠန်ဂတးပံၚ်ကောံတံ လလောၚ်ပ္တိတ်လဝ်ရ။
သ္အာၚ်နူဂှ်ပၠန် အပ္ဍဲပေါဲဗ္တိုက်ဂှ် ကောန်သ္ဂံၚ်ပၠန်ဂတး ၜါတၠ ပြဟ်လလုဲအာလဝ်တုဲ ညးဍုၚ်ကွာန်မွဲတၠလေဝ် လမျီုဒးအိုတ်လဝ်တုဲ လ္ပာ်ကံၚ်ဇြဳပၞာန် မၞိဟ်ဒုၚ်ကျဖျေံလွဟ် ၂၃ တၠ ကေုာံ ကောန်ဇာတ်ဂြောဝ်ဂတာ ၁၈ တၠတံဂှ် ထိၚ်ဒဝ်လဝ် ဗွဲမဗဗွဲကဵု အခေါၚ်အရာမၞိဟ်တုဲ လှဲပြံၚ်ကဵုလဝ် ဇရေၚ် NUG ရောၚ် ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−CJ