လ္ဂုၚ်၊ မာတ် ၂၇
ပ္ဍဲလက်ထက်အလဵုအသဳတုဲကၠုၚ်တေံ ပရေၚ်ပိုန်ဒြပ်ဍုၚ်ဗၟာ မစှ်ေကၠုၚ်လဝ် ကရောံယဲကပ်ကဝ်ဝေဒ်ဂှ် ကလေၚ်ယာတိုန်က္ဍိုပ်ယျဂှ် က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ် သ္ဂးလဝ် ပ္ဍဲကဵုအစဳဇန်သၟာန်သှ် ကုဌာန်ပရိုၚ်ရုယှာမွဲဂှ်ရ။
ပရေၚ်ပိုန်ဒြပ်ဍုၚ်ဗၟာဝွံ ဒၟါနူယဲကပ်ကဝ်ဝေဒ်သၟးတုဲ စှ်ေကၠုၚ်လဝ်ဟွံသေၚ် ပ္ဍဲလက်ထက်အလဵုအသဳ NLD တုဲကၠုၚ်တေံ နူစသၞာံ ၂၀၁၈ တေံဂှ် ဟိုတ်နူပရေၚ်ကောပ်ကာဲ ပရေၚ်ပိုန်ဒြပ် ဍိုန်လျတုဲ ဒးစှ်ေလဝ်ဏောၚ်ဂှ် ပ္တိုန်လဝ်ဒုဟ်ရ။
ပရေၚ်ပိုန်ဒြပ် စှ်ေကၠုၚ်လဝ်သာ်ဏံဂှ် ဒၟါနူကံၚ်ဇြဳပၞာန် ပ္တိတ်ဇြဟတ်ဂိုတ်ဂ္စါန်လဝ်တုဲ ပရေၚ်ပိုန်ဒြပ် ကလေၚ်ယိုပ်ယာကၠုၚ်တုဲ မွဲဒမြိပ် ၂၀၂၂−၂၀၂၃ ကလိဂွံလဝ် အကာဲအရာ ပရေၚ်ပိုန်ဒြပ်ယာတိုန်က္ဍိုပ်ဂှ် က္ဍိုပ်သ္ကိုပ်ပၞာန် တၚ်နၚ်ဟွံမွဲမွဲသာ် ဟီုလဝ်ရ။
တၠကမၠောန်ပရေၚ်ပိုန်ဒြပ်မွဲတၠဂှ် ဂလာန်က္ဍိုပ်သ္ကိုပ်ပၞာန်ဟီုဂှ်ဝွံ ဟီုလဝ်နလညာတ်ညးဂှ်ရ ဒုၚ်သ္ဇိုၚ်ကဵု တၚ်နၚ်သာ်လဵုတုဲ ဟီုလဝ်ရောဟီုဂှ် တီကေတ်ဟွံမာန်တုဲ ကမၠောန်ပရေၚ်ပိုန်ဒြပ်လၟုဟ်တံ ဂွံဂေတ်ဂြိပ်ရဂှ် ဒးရုန်ဂ္စါန်ဒၟံၚ်တၟာလှ်ေရောၚ် ဟီုရ။
“ညးဟီုဂှ်တှ်ေ လညာတ်ညးရဏောၚ်။ အကာဲအရာနတဲဏံဂှ်တှ်ေ ဟွံလောဲပုဟ်။ ၚုဟ်လှုဲဂှ်လေဝ်စှ်ေမံၚ်။ ဟွံဂွံပၟတ်ဂှ်မွဲလ္ပာ်၊ မွဲပၠန်ဂှ် ဂီုကၠီုတိဍာ်၊ ပရေၚ်ပလံၚ်ဗစိုပ် ဟွံဂီုကၠီုတံဂှ်လေဝ် မွဲလ္ပာ်။ တုဲပၠန် သၟတ်ဂမၠိုၚ် ဖေက်သၞောဝ်ယိုက်ဂၠေၚ်လျိုၚ်ပၞာန်ဂှ်တုဲ ဒေါအ်ဇူနူကမၠောန်တုဲ တိတ်အာဍုၚ်သ္အာၚ်တံဂှ်ဂၠိုၚ်။ တၠကမၠောန်တံဂှ်တှ်ေ တၚ်ကော်ဆဴဇၞော်ဇၞော်ဂှ် နွံမံၚ်ဖိုဟ်ရဏောၚ်။ နကဵုပရေၚ်ပိုန်ဒြပ်ဂှ်လေဝ် ဒှ်မံၚ်အကာဲအရာ ဒးရုန်ဂ္စါန်ဒၟံၚ်တၟာလှ်ေဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ကမၠောန်ပရေၚ်ပိုန်ဒြပ်လၟုဟ်ဂှ်ဝွံ ၚုဟ်လှုဲဗၟာစှ်ေတုဲ ၚုဟ်ကပေါတ်ဗၞိက်အပြောံတံ ထပ်သၠုၚ်တိုန်ကၠုၚ် ဂၠိုၚ်ကဵုဆဂှ်ရ ဗီုကၠာတေံ ဂေတ်ဂြိပ်ဟွံမာန်ဏီတုဲ ညံၚ်ကမၠောန်ဂမၠိုၚ် ဂွိုအ်ဒေါအ်ဒေၚ်အာဂှ် ဒှ်ဒၟံၚ်အကာဲအရာ ဒးထိၚ်လဝ်ဏောၚ် ညးဆက်ဟီုရ။
တၠပညာပရေၚ်ပိုန်ဒြပ်မွဲတၠဂှ်လေဝ် ဟိုတ်နူပရေၚ်ဟွံညိၚ်ဝတ် မက္တဵုဒှ်ဒၟံၚ် အပ္ဍဲဍုၚ်တံဂှ်တုဲ လ္တူပရေၚ်ပိုန်ဒြပ်ဂှ် စွံအာရီု တၟံကၠံပေၚ်ၚ်ဟွံမာန်ဂှ်ရ ဂွံယိုပ်ယာတိုန် ဒှ်ဟွံမာန်တုဲ ပရေၚ်ပိုန်ဒြပ်ဂွံခိုဟ်ကၠုၚ်ဂှ် လုကဴအလဵုအသဳတၟိဟွံတိုန်မ္ဂး ဒှ်ဟွံမာန်ပုဟ်ဂှ် ပါ်ပါဲလဝ်ရ။
“လၟုဟ်ဂှ် စွံအာရီုပ္ဍဲပရေၚ်ပိုန်ဒြပ် တၟံကၠံပေၚ်ၚ်တုဲ ဂွံကၠောန်ဂှ် ကၠောန်ဟွံဂွံပုဟ်ဒှ်ဒၟံၚ်ရ။ ဟွံညိၚ်ဝတ်တုဲ ကၠောန်ပရေၚ်ပိုန်ဒြပ်ဟွံဂွံ။ ကၠောန်ပရေၚ်ပိုန်ဒြပ်ဟွံဂွံတုဲ သြန်လုပ်ဂှ်ဟွံမွဲ၊ သြန်လုပ်ဟွံမွဲတုဲ ကၠောဝ်ဗျဵုတုဲ ဍေံရုသံၚ်တိုန်။ အေ ဂှ်တှ်ေ ကၠောန်ပရေၚ်ပိုန်ဒြပ်ဟွံဂွံ။ သံသာဏံဂေတ်တုဲဂေတ်ပၠန် အကာဲအရာဂှ် ဟွံခိုဟ်တိုန်ပုဟ်။ ညံၚ်ဂွံတိတ်နူသံသာဏံမာန် ဒးကၠောန်ဏောၚ်။ အပ္ဍဲဍုၚ်ဇကု ညိၚ်ဝတ်မှ ဍုၚ်သ္အာၚ်တံလေဝ် ကလေၚ်ဒုၚ်တဲမှ။ အေ ဂှ်မှ ပရေၚ်ဓလိုက်တမ်ရိုဟ်ဍုၚ်သ္အာၚ်တံ၊ ပရေၚ်သွံရာန်ဗၞိက်ဍုၚ်သ္အာၚ်တံဂှ် ကၠောန်ခိုဟ်ဟ်ဂွံဏောၚ်၊ အခိၚ်ဂှ်မှ ဍေံယိုပ်ယာကၠုၚ်ဏောၚ်။ လၟုဟ်ဂှ် ဂွံခိုဟ်ကၠုၚ်ဂှ် ချပ်ဟွံဂွံဏီပုဟ်။ ဂွံကလေၚ်ဒှ်ဗီုကၠာတေံဂှ် လုကဴအလဵုအသဳတၟိ ဟွံတိုန်တှ်ေ ဒှ်ဟွံမာန်ဟဂှ်ရ” သာ်ဝွံ သ္ဂးရ။
မွဲလ္ပာ်ဂှ်ပၠန် ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ ညးသၟတ်အဝဲခိုဟ် ကၠောန်မာန်တံဂှ်ဝွံ တိတ်စ္ဍးအာ ဍုၚ်သ္အာၚ်တံအိုတ်တုဲလေဝ် ဒးဆောံလေၚ် တမ်ရိုဟ်မၞိဟ်တုဲ ခြာဟွံလအ် ဇီုကပိုက်ကၠုၚ် သီုကဵုကမၠောန်ပရေၚ်ပိုန်ဒြပ်တံဏောၚ်ဂှ် သ္ၚဳဂၠိပ်ဒၟံၚ်တံ နွံဒၟံၚ်ရ။
အတိုၚ်တိုက်သြန်ဂၠးတိ ချိၚ်ခယျလဝ်ဂှ်မ္ဂး အပ္ဍဲသၞာံ ၂၀၂၄ ဏံ အကာဲအရာပရေၚ်ပိုန်ဒြပ်ဍုၚ်ဗၟာ ခိုဟ်ကၠုၚ်ဟွံသေၚ်ဏီတုဲ ပ္ဍဲသၞာံ ၂၀၂၅ တေံလေဝ် ကဏ္ဍပရေၚ်တဵုလွဳ၊ ပရေၚ်ကၠောန်ပ္တိတ်ဗၞိက် ကေုာံ ကဏ္ဍသွံရာန်ဗၞိက်တံ မပါလုပ် သီုကဵုကဏ္ဍကၠောန်ပ္တိတ်တံ လဇုဲလဇလအ်လတံ ဆက်ဒှ်ဒၟံၚ်ဏီဏောၚ်ဂှ် ကၞောတ်သၞာံတုဲကၠုၚ်တေံ လလောၚ်ပ္တိတ်လဝ်ရ။
သ္အာၚ်နူဂှ်ပၠန် အကာဲအရာလၟုဟ်ဝွံ ဒမြိပ်တောတက် ကၠာဂွိုအ်သီအဝဵု ကၠာယဲကပ်ကဝ်ဝေဒ်ဂွိုအ်ဒှ်တေံဂှ် ကလေၚ်စိုပ် ဟွံသေၚ်ဏီတုဲ ဍုၚ်ဟွံကလေၚ်စိုပ်အကာဲအရာ ပရေၚ်ပိုန်ဒြပ်တောတက် ကၠာကဝ်ဝေဒ်ဂွိုအ်ဒှ်တေံ မွဲဍုၚ်ဓဝ်ဂှ်လေဝ် ဒှ်ဍုၚ်ဗၟာရဂှ် သ္ဂးရ။
ပ္ဍဲကဵုလိက်ဒုၚ်စဳရေၚ် တိုက်သြန်ဂၠးတိဂှ် ကြဴနူဒပ်ပၞာန်သီအဝဵုတုဲ အကာဲအရာပရေၚ်ပိုန်ဒြပ်ဍုၚ်ဗၟာဝွံ ဒမြိပ်တောတက် သ္ဇက်ဂွံဂွံဇြဟတ်ဟွံမွဲ ဆက်စှ်ေဒၟံၚ်ဏီတုဲ စဵုကဵု သၞာံ ၂၀၂၅ ကၠုၚ်စိုပ်ဏံ ဟွံချိုတ်ပၠိုတ်ဏီပုဟ်ဂှ် ချိၚ်ခယျလဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI/CJ