ၜဳကလေၚ်၊ မာတ် ၂၈
တွဵုရးဍုၚ်မန် ပွိုၚ်ဍုၚ်ၜဳကလေၚ် ဗ္ဒါဲကွာန်(သပြေနီ) အခိၚ်ကရောၚ်ပၞာန် ဒပ်ကံၚ်ဇြဳပၞာန် လုပ်စိုပ်ကၠုၚ်ဂှ် ပန်ဂစိုတ်ဏာလဝ် ညးဍုၚ်ကွာန်ကောန်အရာပ်မွဲတၠ နကဵုသေနာတ်ဂှ် ခရိုၚ်သဓီု KNU လလောၚ်ပ္တိတ်လဝ် ပ္ဍဲဂိတုမာတ် ၂၇ တေံရ။
ပ္ဍဲဂိတုမာတ် ၂၂ တုဲကၠုၚ်တေံ ဒပ်ပံၚ်ကောံကံၚ်ဇြဳပၞာန် ခမရ (၃) ကဵု ခလရ (၈) ဇြဟတ် ၈၀ ပြၚ်ပါဂှ်ဝွံ လုပ်စိုပ်ထ္ပက်ကၠုၚ်ကရောၚ်ပၞာန် ပွဳပွူဗ္ဒါဲကွာန်(သပြေနီ) ခရိုၚ်သဓီု KNU ရ။
ကရောၚ်ပၞာန်ဏံဝွံ ကိုဝ်ယှုၚ်ကိုဝ်ဝ် အာယုက် ၃၃ သၞာံ ညးဒေသကွာန်ယှာန်သု ဒဳကၠုၚ်ကွဳလိုန်ဓာတ် အတိုၚ်ဂၠံၚ်ကာဂှ် နကဵုဟိုတ် ဟွံဒေါအ်ကဵုကွဳဂးတုဲ ပန်ဂစိုတ်လဝ် နကဵုသေနာတ်ရ။
အတိုၚ်ဂလာန် ညးဒေသတံဂှ်မ္ဂး ကိုဝ်ယှုၚ်ကိုဝ်ဝ်ဝွံ နူကွာန်ယှာန်သု အခိၚ်ကၠုၚ်စိုပ်ရာန်ဂၠဴ ပ္ဍဲကွာန်(သပြေနီ) ဂှ် ဒးဒုၚ်ပန်ဂစိုတ်လဝ်တုဲ လှုဲလှာ်ပါကၠုၚ်သွက်ဂွံရာန်ဂၠဴဂှ်ကဵု ကွဳလိုန်ဓာတ်တံဂှ် ဒပ်ကံၚ်ဇြဳပၞာန် ကေတ်ဏာလဝ်ရောၚ် ဂွံတီကေတ်ရ။
ကရောၚ်ပၞာန်ကံၚ်ဇြဳပၞာန်ဝွံ ကြဴနူပန်ဂစိုတ် ကိုဝ်ယှုၚ်ကိုဝ်ဝ် နကဵုသေနာတ်တုဲဂှ် ကၠဟ်ဏာလဝ်ဇွဂှ် လ္တူဂၠံၚ်အတိုၚ်ဏံတုဲ ညးဒေသတံ ကပှ်ကေတ်တုဲ ဖျေံလဝ်ကဵုကမ္မထာန်ပ္ဍဲကွာန်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုမာတ် ၁၁ တေံဂှ်လေဝ် ပ္ဍဲကဵုသၞေဟ်ကၚ်စၟဳတ်ဒဒန်ပသဲ ကံၚ်ဇြဳပၞာန် ဂၠံၚ်လုပ်ပွိုၚ်ဍုၚ်ၜဳကလေၚ်ဂှ် နကဵုတၚ်စောဲစပ် ဟွံဒေါအ်ကဵုကွဳလိုန်ဓာတ်ဂှ် ပန်ဂစိုတ်လဝ် ညးသၟတ်ဒေသၜါတၠ မသက္ကုဟိုတ်ရ။
အတိုၚ်လိက်ဒုၚ်စဳရေၚ် ဇြဟတ်ဖေဝ်ဒရာခေတ်တၟိ NRFF ပ္ဍဲပၞာန်သီအဝဵုပေၚ်ပိသၞာံဂှ်မ္ဂး ပ္ဍဲတွဵုရးဍုၚ်မန် ဟိုတ်နူပရေၚ်ဂစိုတ်ဂယိုၚ်ဒပ်ကံၚ်ဇြဳပၞာန်တံတုဲ ကောန်အရာပ် ၁၀၀ ပြၚ် ချိုတ်အာလဝ်ဂှ် ပ္ဍဲဂိတုဖေဖဝ်ဝါရဳ ၁ တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−KNU