မတ်မလီု၊ မာတ် ၂၈
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ သီုတိတ်ကၠုၚ်ဍုၚ်သ္အာၚ်ဂၠိုၚ်တိုန်ကၠုၚ်ဂှ် မၞိဟ်ရာန်သြန်ဍုၚ်သ္အာၚ်တံလေဝ် ဂၠိုၚ်ကၠုၚ်ဂှ်ရ ၚုဟ်ထဝ်အပ္ဍဲဍုၚ် တိုန်ကၠုၚ်ဂှ် တၠကမၠောန်ထဝ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ညးတိတ်ဍုၚ်သ္အာၚ်တံ နွံကၠုၚ်ဒၟံၚ် အရိုဟ်တ္ၚဲတုဲ ပရေၚ်ရာန်သြန်ဍုၚ်သ္အာၚ်တံဂှ်လေဝ် ဂၠိုၚ်ကၠုၚ်ဂှ်ရ အပ္ဍဲဗွဝ်ဖျာ ၚုဟ်ဒဝ်ဠာ၊ ၚုဟ်သြန်ၝာတ်တံ မပါလုပ် ၚုဟ်သြန်ဍုၚ်သ္အာၚ်တံ သၠုၚ်တိုန်ကၠုၚ်ရ။
ဟိုတ်နူသြန်ဍုၚ်သ္အာၚ် ၚုဟ်သၠုၚ်တိုန်ကၠုၚ်ဂှ်တုဲ အပ္ဍဲဂိတုဖေဖဝ်ဝါရဳတုဲကၠုၚ်တေံ ထဝ်ဒကောၚ်မဳဠေန်အပ္ဍဲဍုၚ် မွဲဒ္ကေဝ် ၃၉ ကိုဋ် ၚုဟ်နွံလဝ်ဂှ် ပ္ဍဲဂိတုမာတ်သတ္တာဟလက္ကရဴအိုတ်ဏံ ၚုဟ်သၠုၚ်တိုန်ကၠုၚ် စဵုကဵု ၄၃ ကိုဋ်ဒ္ကေဝ်ပြၚ်ရ။
ၚုဟ်ထဝ်ဏံဝွံ ရံၚ်ကဵုဝၚ်မ္ဂး စိုပ်ကၠုၚ်ၚုဟ်ထဝ်ၚုဟ်သၠုၚ်အိုတ်တုဲ အပ္ဍဲဗွဝ်ဖျာ ဒးဆေၚ်ဒၟံၚ်မုက်ကဵု ပရေၚ်သွံရာန်ဒေါအ်ဒေၚ် ဟွံကေၚ်ဂဗမွဲလှ်ေတံရဂှ် တၠကမၠောန်ထဝ်တံ သ္ဂးအိုတ်ရ။
အပ္ဍဲဗွဝ်ဖျာထဝ်ဂှ် ကရောံၚုဟ်ထဝ်သၠုၚ်တိုန်ကၠုၚ်ဂှ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ညးမိက်ဂွံတိတ်ဍုၚ်သ္အာၚ်တံ ဂၠိုၚ်ဒၟံၚ်တုဲ ဇြဟတ်ရာန်ထဝ်ဂှ် အောန်တုဲ ဇြဟတ်သွံ ဂၠိုၚ်ဒၟံၚ်ရောၚ် ဂွံတီကေတ်ရ။
ဟိုတ်နူၚုဟ်ထဝ် သၠုၚ်တိုန်ဒၟံၚ်ဂှ်တုဲ အပ္ဍဲဗွဝ်ဖျာ ပရေၚ်သွံရာန် ထဝ်ဒကောၚ်ကလောံကလောံတံဂှ် ဒေါအ်ဇူလဝ်တုဲ ထဝ်ဂကူတၞဟ်ဟ်တံဂှ်တှ်ေ နူ ၅ ဠက်ဒ္ကေဝ် စဵုကဵုမွဲကိုဋ် ကဵုပပဵုၚုဟ်တုဲရာန်ကေတ်ဒၟံၚ်တံ နွံဒၟံၚ်ရ။
ဂကောံပံၚ်ကောံ ဌာနမဆေၚ်စပ်သၟဝ်တဲကံၚ်ဇြဳပၞာန်တံဂှ် ညံၚ်ၚုဟ်ထဝ်ဂွံတိုန် ကၠောန်ဒၟံၚ်ဂးတုဲ ဗက်ရပ်ဒက်စၟဳတ်ဒၟံၚ် တၠဆေၚ်ထဝ်တံကဵု သၟာဗၞိက်ထဝ်လ္ၚဵုတံ နွံဒၟံၚ်ဂှ် ဗွိုၚ်တၠကမၠောန်ထဝ်တံ ဟီုရ။
ဂကောံတၠကမၠောန်ထဝ် ရးဒေသဇၞော်လ္ဂုၚ် YGEA ဂှ် ညးမကၠောန်သ္ပပရေၚ်သွံရာန်ထဝ် အပ္ဍဲဗွဝ်ဖျာမ္ၚးတံကီု၊ နကဵုဆေၚ်ထဝ်ဂမၠိုၚ် သွက်ဂွံသွံတြးထဝ် သၟဝ်ၚုဟ်နှေန် နူဂကောံဏံ မစၟတ်ကဵုလဝ်ဂှ်ကီု၊ ယဝ်ရဟွံသွံရာန် အတိုၚ်ၚုဟ်ဂှ်မ္ဂး သွက်ဂွံဒေါအ်ဇူကဵု ပရေၚ်သွံရာန်တံဂှ် ပ္ဍဲဂိတုမာတ် ၁၆ တေံ လလောၚ်ပ္တိတ်လဝ်ရ။
ၚုဟ်ထဝ်စၞောန် YGEA ပ္ဍဲဂိတုမာတ် ၂၆ ဂှ်ဝွံ ထဝ်ဒကောၚ်မဳဠေန်မွဲဒ္ကေဝ်ဂှ် ၜိုန်ရပ္တန်လဝ် ဗ္ဒါဲ ၃၈ ကိုဋ်ဒ္ကေဝ်ကီုလေဝ် တၟော်ကဵုဗွဝ်ဖျာမ္ၚးဏံတှ်ေ မွဲဒ္ကေဝ်မ္ဂး တၞဟ်ခြာဒၟံၚ် ၅ ကိုဋ်ဒ္ကေဝ်ပြၚ်ရ။
ၚုဟ်ထဝ်အပ္ဍဲဍုၚ်ဝွံ ပ္ဍဲလက်ထက်အလဵုအသဳ NLD တေံ မွဲဒ္ကေဝ် ၜိုန်ဗ္ဒါဲ ၁၃ ကိုဋ်ဒ္ကေဝ်ဓဝ် နွံလဝ်ကီုလေဝ် အပ္ဍဲကာလသီအဝဵုဏံ ဒးဂဗဒၟံၚ်ကဵု အကာဲအရာၚုဟ်သၠုၚ်တိုန်ကၠုၚ် ပိဆရ။
ပရိုၚ်−သြၚ်လောန်တိုၚ်(မ်)
ဗီု−CJ