ပွမခုတ်ပ္တန်လဝ် တ္ၚဲဒပ်ပၞာန်ဂှ် ဂကောံဇြဟတ်သၟတ် ရးတၞၚ်သဳ ကေုာံ မန်တံ ဒစဵုဒစး

နေဗျဳဒဝ်၊ မာတ် ၂၈

စပ်ကဵုဂကောံပၞာန်တံ ခုတ်ပ္တန်လဝ် တ္ၚဲပၠန်ဂတးဝှေတ်သေတ် မရနုက်ကဵု ၇၉ သၞာံ ပ္ဍဲဂိတုမာတ် ၂၇ နဒဒှ်တ္ၚဲဒပ်ပၞာန်ဗၟာဂှ်တုဲ ဂကောံဇြဟတ်သၟတ် တွဵုရးမန် ကေုာံ တၞၚ်သဳတံ ဒစဵုဒစးလဝ်ရ။

ရံၚ်ကေတ်ဝၚ်ဍုၚ်ဗၟာမ္ဂး ဂိတုမာတ် ၂၇ ဝွံ ဒှ်တ္ၚဲစလဝ် ပၠန်ဂတးဝှေတ်သေတ်တုဲ နူကဵုဂကောံပၞာန်တံ ရန်ကဵုသ္ဂောံကလေံပလီုကၠေံဝၚ်တုဲ သၞာံဗွဲမလအ်လ တက်စုတ်ဝါဒ ခုတ်ပ္တန်လဝ် တ္ၚဲဒပ်ပၞာန်ဗၟာဂှ် ဒဵုကဵုတ္ၚဲဏံ ဂွံကၠုၚ် ၇၀ သၞာံပြၚ်ယျဂှ် သ္ဂးရ။

ဟိုတ်ဂှ်ရ နူကဵုဂကောံပၞာန်တံ ခုတ်ပ္တန်လဝ် တ္ၚဲပၠန်ဂတးဝှေတ်သေတ် နဒဒှ်တ္ၚဲဒပ်ပၞာန်ဗၟာဂှ်ဝွံ ဂကောံဇြဟတ်သၟတ်ရးတၞၚ်သဳ ကေုာံ မန်တံ အခါလဵုမှ သ္ပစၟတ်သမ္တီဒုၚ်တဲ ဟွံမွဲပုဟ်ဂှ် လလောၚ်ပ္တိတ်ကဵုလဝ်သမ္တီရ။

မအိအိလေန် ပါလုပ်ဒၟံၚ် ပ္ဍဲကဵုဂကောံဇြဟတ်သၟတ် နူကဵုရးဒေသတၞၚ်သဳဂှ် “ညအ်ဂှ် ဗီုဂကောံပၞာန်တံ ခုတ်ပ္တန်လဝ် တ္ၚဲဒပ်ပၞာန်ဟွံသေၚ်ပုဟ်။ သွက်ပိုယ်တံတှ်ေ ဒှ်တ္ၚဲပၠန်ဂတးဝှေတ်သေတ် ဒစဵုဒစးပၠန်ဂတးလဝ်ဝှေတ်သေတ်တံဏောၚ်။ ဗီုဏံရ ဒုၚ်တဲ။ တ္ၚဲဒပ်ပၞာန်ဗၟာဟီုဂှ် ဟွံဒုၚ်တဲပုဟ်။ ဟိုတ်ဂှ်ရ ပိုယ်တံ ဒးဒစဵုဒစးလဝ်ရ။ ညအ်ဂှ် ဂကောံပၞာန်တံ သၞာံဗွဲမလအ်လ ဒှ်သဘဴတက်ပၠောပ်ဝါဒ ကုပိုယ်တံ နကဵုဝၚ်ဗၠေတ်တ်ရဏောၚ်။ ဟိုတ်ဂှ်ရ တ္ၚဲဒပ်ပၞာန်ဟီုဂှ် နကဵုဂကောံဇြဟတ်သၟတ် မၞုံပ္ဍဲတၞၚ်သဳတံကဵု မန်တံ ဒစဵုဒစး သ္ကာတ်တ်မြဟ်ဟ်ရ” သာ်ဝွံ သ္ဂးရ။

ပြဝဂကောံပၞာန် ညံၚ်ရဴဝှေတ်သေတ် ကေုာံ ကောန်ရဲသၟဝ်တဲဍေံတံ ဒဒှ်မဂစိုတ်ဂယိုၚ်ဒၟံၚ် ဟွံမွဲကဵုပွဗ္စာရဏာ ကေုာံ ရပ်ဒက်ဍဵုဍိုက်ပျဲပျာံ လ္တူညးဍုၚ်ကွာန် အလုံဍုၚ်မွဲတံဂှ် နကဵုဇြဟတ်ပံၚ်ကောံ သၟတ်တၞၚ်သဳကဵု မန်တံ ဒစဵုဒစးဒၟံၚ် သ္ကာတ်တ်မြဟ်ဟ်ရ။

ပ္ဍဲကဵုဂကောံဇြဟတ်သၟတ် အပ္ဍဲဒေသတၞၚ်သဳ ကေုာံ မန်တံဂှ် ဂကောံ ၉ ဂကောံ မပ္တံကဵု ဇြဟတ်ရာမညဖေဝ်ဒရာခေတ်တၟိ NRFF ၊ ဂကောံတၞၚ်သဳ (ထုဆစ်မျှော်ရည် တနၚ်္သာရီ) ၊ ဇာဇၞိက်ကောဒေံစိုပ်ဒၟံၚ်ဌာန်ဒေသဇမ္ၚောဲ၊ သမဂ္ဂကွးဘာပရေၚ်ပညာသ္ဇိုၚ်၊ ဇာဇၞိက်တၞၚ်သဳ ဂကူစုၚ်တံ ဒှ်တမ်ရ။

တွဵုရးဍုၚ်မန်ကဵု ရးတၞၚ်သဳဂှ် တိဍာ်စုက်ဒၟံၚ်ညးသ္ကအ်တုဲ လ္ဂောံကဵုပရေၚ်ပၞာန် ကေုာံ အကာဲအရာတိဍာ်မ္ဂး ဒှ်ဒေသပၟိက်ဇၞော်ဂှ်ရ ပ္ဍဲဂိတုမာတ် ၁၉ ကဵု ၂၃ ဂှ် အကြာကလိန်အံၚ်ကဵု ဒဵုဟလဲ သ္ကုတ်ဂၠံၚ်ရေဝ်−ထဝါဲဂှ် ပရေၚ်ဗ္တိုက်ပံၚ်တောဲ ဒပ်ပံၚ်ကောံမဟာမိတ် မန် ကေုာံ တၞၚ်သဳတံ နွံလဝ်ရ။

သ္အာၚ်နူဂှ်ပၠန် ဗ္တိုက်သီဂွံလဝ် ဗ္ဒိုပ်ပျူသဝ်ထဳ ကွာန်(မၚ်းသား) ပွိုၚ်ဍုၚ်ဍာ်ဗု နကဵုပရေၚ်ပၞာန်ပံၚ်တောဲမာန်ဂှ် ဒုၚ်တၠုၚ်ရောၚ် ဂကောံဇြဟတ်သၟတ် မန်၊ တၞၚ်သဳတံ ကဵုလဝ်သမ္တီ ပ္ဍဲတၚ်လလောၚ်တြးဂှ်ရ။

ပ္ဍဲအရာဗ္တိုက်သရိုဟ်ဂကောံပၞာန်ဂှ် ပရေၚ်ပံၚ်တောဲရေၚ်တၠုၚ် အပ္ဍဲဒေသကီု အကြာဒေသ တိဍာ်စုက်လုက်ဒၟံၚ်တံ ပွမပံၚ်တောဲထ္မံက်ရုပ်ရဴ လ္ဂောံကဵုပရေၚ်ပၞာန် မစှ်ေကဵုဗျူဟာတံ ထပ်ဂွံသၠုၚ်တိုန်ကၠုၚ်ဂှ်လေဝ် ဖ္တိုက်ဖ္အောဝ်လဝ်ဏီရ။

အကြာဒေသ ဆက်စပ်ဒၟံၚ် နကဵုတွဵုဒၞက်တံဂှ် ညံၚ်ပရေၚ်ရေၚ်တၠုၚ်ပ္ညဳပ္ညပ်ပံၚ်တောဲ ပရေၚ်ပၞာန် ကေုာံ ပရေၚ်ဍုၚ်ကွာန်တံ ဂွံက္တဵုဒှ်ကၠုၚ် ပၟိက်ဇၞော်ဂှ် ဇြဟတ်သၟတ်တၞၚ်သဳ ကေုာံ မန်တံ ညာတ်လဝ်ရ။

ပရေၚ်ကဆံၚ်တုပ်သၟဟ်ဂကူ၊ အခေါၚ်စၞောန်ပျးအပိုၚ်၊ ကံကုသိုလ်ဇကု ဇကုဖန်ဖက်ကေတ် ဂကူညးကဵုညး မရန်တၟံလဝ်တံ သ္ဂောံကလိဂွံမာန် သွက်ဂွံဒက်ပ္တန် ပရေၚ်ပံၚ်တောဲရေၚ်တၠုၚ် အပ္ဍဲဒေသ၊ ပရေၚ်ညဳသၟဟ်တံဂှ် ဒှ်အခိၚ်အခါပၟိက်ဇၞော်ရောၚ် သ္ဂးရ။

ကုဒေသမဆက်စပ်တံဂှ်လေဝ် ကၠောန်သ္ပပရေၚ်ပံၚ်တောဲ ပရေၚ်ပၞာန်၊ ပရေၚ်ဍုၚ်ကွာန်မာန်မှဟေၚ် အကြာဂကူမၞိဟ်ဟွံတုပ်သၟဟ်တၞဟ်ခြာဒၟံၚ်တံ ခၞံဗဒှ်ထ္မံက်အာ ဗွိုၚ်မၞိဟ်ၜိုဟ်သြိုဟ်တုဲ ဒှ်သဟဇာတမွဲမာန်ဏောၚ်ဂှ် ဂကောံဇြဟတ်သၟတ် တၞၚ်သဳ ကေုာံ မန်တံ ဖ္တိုက်ဖ္အောဝ်ဆဝ်မ္ၚုဟ်လဝ် နဒဒှ်လစွံစိုတ်ပံၚ်တောဲရ။

ပရိုၚ်−သြၚ်လောန်တိုၚ်(မ်)

ဗီု−MOI