မတ်မလီု၊ မာတ် ၂၈
တွဵုရးဍုၚ်မန် ပ္ဍဲပွိုၚ်ဍုၚ်လ္ၚဵုတံဂှ် သ္ကိုပ်အုပ်ဓုပ်ကွာန်အရာပ် မဒှ်ကောန်ဂကောံသ္ဂောံကော်စပ်လုပ်ပၞာန် ကံၚ်ဇြဳပၞာန်တံ နုက်တိတ်ဒၟံၚ် ဗီုညးကုညးနွံကၠုၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန် ကျဒၟံၚ်ပၞာန် အလုံဍုၚ်မွဲဂှ်ဝွံ ပၠောပ်လမျီုသၞောဝ်ယိုက်ဂၠေၚ်လျိုၚ်ပၞာန်တုဲ ဟွံပေၚ်မွဲဂိတုဏီ သွက်ဂွံထ္မံက်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန်ဂှ် ကဵုဒၟံၚ်ဇြဟတ်ဂရိုဟ် ကုသ္ကိုပ်အုပ်ဓုပ်ကွာန်အရာပ် မဆေၚ်စပ်တံ သွက်ဂွံကံက်စရၚ်ဂွံလုပ်ပၞာန်၊ ကဵုကံက်မာဲရုဲစှ်တံ ကေုာံ ကော်စိုပ်တံရ။
ကရောံကံၚ်ဇြဳပၞာန်ကဵုဇြဟတ်ဂရိုဟ်ဂှ် သီုကဵုတၚ်ကဵုသတိ နူဂကောံဇြဟတ်ပၠန်ဂတးတံတုဲ သ္ကိုပ်အုပ်ဓုပ်ကွာန်အရာပ် အပ္ဍဲတွဵုရးဍုၚ်မန်ဂမၠိုၚ် စနူဂိတုမာတ် သတ္တာဟလက္ကရဴအိုတ်တုဲ ပ္တိုန်ကၠုၚ်လိက်နုက်တိတ် ဇရေၚ်ဌာနက္ဍိုက်ပ်ကာအုပ်ဓုပ်ပွိုၚ်ဍုၚ် မဆေၚ်စပ်တံရ။
အတိုၚ်သြၚ်လောန်တိုၚ်(မ်) ဆက်စၠောံသၟာန်သၟုက်ဂွံလဝ်ဂှ်မ္ဂး သ္ကိုပ်အုပ်ဓုပ်တွဵုရးဍုၚ်မန် နူပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု၊ ကျာ်မြဟ်၊ ဇြပ်ဗု ကေုာံ ရေဝ်တံဂှ် ပ္တိုန်လိက်နုက်တိတ်တံ နွံဒၟံၚ်တုဲ သ္ကိုပ်အုပ်ဓုပ် နူပွိုၚ်ဍုၚ်သှ်ေတံဂှ်လေဝ် ဒးမၚ်ရံၚ်ဒၟံၚ်အကာဲအရာရောၚ်ဂှ် ဂွံတီကေတ်ရ။
ပ္ဍဲကဵုဂကောံအုပ်ဓုပ် ပ္တိုန်လိက်နုက်တိတ်တံဂှ် မ္ၚးနူကဵုက္ဍိုပ်သ္ၚိကၠံဂှ် မၞိဟ်ဇၞော်ဇၞော်ပ္ဍဲအရာပ်တံဂှ်လေဝ် ပါလုပ်ဒၟံၚ်ဂှ် ညးဒေသမွဲတၠ ဟီုရ။
“က္ဍိုပ်သ္ၚိကၠံတံ၊ ညးဇၞော်ပ္ဍဲအရာပ်တံသီုဖအိုတ် နုက်တိတ်အိုတ်ရ။ ပရေၚ်ကိစ္စအရာပ် ခိုဟ်ပရေံသီုဖအိုတ်ဂှ် ညးတံရ ကၠောန်မံၚ်။ စပ်ကဵုကိစ္စဏံတုဲလေဝ် ညးတံရ နုက်တိတ်ဒၟံၚ်အိုတ်” သာ်ဝွံ သ္ဂးရ။
ပ္ဍဲတွဵုရးဍုၚ်မန် အရာပ် ၁၀၀ ၊ ဂကောံကွာန် ၃၆၈ ၊ ကွာန် ၁၀၀၀ ပြၚ် နွံဂှ် သ္ကိုပ်အုပ်ဓုပ်ကွာန်အရာပ် ဂၠိုၚ်ကဵုလ္ၚီနွံဒၟံၚ်တုဲ ဗွဲမဂၠိုၚ်ဝွံ ဒှ်ကောန်ဗော်ပျဳခိုၚ်ဖျဵုတံကဵု ကောန်ပၞာန်တြေံတြေံတံဂှ် ဂွံတီကေတ်ရ။
ကံၚ်ဇြဳပၞာန်ဂှ် စရၚ်ညးသၟတ်ဒးလုပ်ပၞာန် အပ္ဍဲတွဵုရးဍုၚ်မန်တံဂှ် ဂိတုမာတ် စွံလက္ကရဴအိုတ် သွက်ဂွံပလံၚ်ဗစိုပ်ကဵုဂှ်ကီု ညးမကံက်လဝ်စရၚ်ယၟုတံဂှ် သွက်ဂွံပ္တိုန်စွံလဝ်စရၚ်တံဂှ် စၞောန်ပ္ညုၚ်လဝ်ရ။
ဇြဟတ်ပၠန်ဂတး ဖျေံသ္ဇိုၚ်တွဵုရးဍုၚ်မန်တံဂှ် ကုသ္ကိုပ်အုပ်ဓုပ် ပလံၚ်ဗစိုပ် ညးသၟတ်တံ သ္ဂောံလုပ်ပၞာန် ဇရေၚ်ကံၚ်ဇြဳပၞာန်တံဂှ် ဒၞါဲဆဵုဂှ် ပန်ပသောၚ်အာဏောၚ် ကဵုလဝ်သတိရ။
သ္ကိုပ်ကရောၚ်ပၞာန် ကရောၚ်ပၞာန်ဒဝ်ဏ သဝ်ဒါဂှ် “မအလဂှ်တှ်ေ ကလောန်ဍေံ ဍေံကၠောန်ရ။ ၝထ္မံက်ဒၟံၚ်ရုပ်ရဴ ကလောန်ဍေံတံဂှ် သ္ကိုပ်အုပ်ဓုပ်တံ၊ က္ဍိုပ်သ္ၚိကၠံတံရဏောၚ်။ ပိုယ်တံ နူတမ်ဂှ်လေဝ် ကဵုလဝ်သတိ ဂၠိုၚ်ၚ်ကဵုဝါရ။ ဟိုတ်ဂှ်ရ ယဝ်ရသ္ကိုပ်အုပ်ဓုပ်တံ၊ က္ဍိုပ်သ္ၚိကၠံတံ ဆက်ကၠောန်ဒၟံၚ် အတိုၚ်ဏံမ္ဂး နူကဵုပိုယ်တံ ဒၞါဲဆဵုဂှ် ပန်ပသောၚ်အာဏောၚ်ဂးတုဲ ပိုယ်တံ လလောၚ်တြးလဝ်လေဝ်တုဲရ။ ကၠောန်လေဝ်ကၠောန်အာဏောၚ်” သာ်ဝွံ သ္ဂးရ။
အတိုၚ်လိက်ဒုၚ်စဳရေၚ် ဂကောံသုတေသန Data For Myanmar ဂှ်မ္ဂး အပ္ဍဲပေါဲဗ္တိုက် အလုံဍုၚ်မွဲဂှ် ကံၚ်ဇြဳပၞာန် ကျကၠုၚ်ဒၟံၚ်ဂှ်ဝွံ ထ္မံက်ဒၟံၚ်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန် ပ္ဍဲကဵု ၁၇၂ ပွိုၚ်ဍုၚ်ဂှ် ပ္ဍဲဂိတုမာတ် ၂၂ တေံ လလောၚ်ပ္တိတ်လဝ်ရ။
မွဲလ္ပာ်ဂှ်ပၠန် ပ္ဍဲကဵုလၟေၚ်ကမၠောန် ကံက်စရၚ်ညးလုပ်ပၞာန်ဂွံတံဂှ် သ္ကိုပ်အုပ်ဓုပ်ကွာန်အရာပ် ဒးရေၚ်တၠုၚ်ကဵုဒၟံၚ် အဓိကတံ၊ သၞာဲဒဴတံ၊ က္ဍိုပ်သ္ၚိကၠံတံဂှ် ဂကောံပၠန်ဂတးတံ ပသောၚ်ဒၟံၚ်တံလေဝ် နွံဒၟံၚ်ရ။
အတိုၚ်စရၚ် နူကဵုသြၚ်လောန်တိုၚ်(မ်) ၜိုတ်က္ဍစိုပ် ပ္ကောံပ္ကေဝ်ဂွံလဝ်ဂှ်မ္ဂး နူဂိတုမာတ် ၁၈ စဵုကဵု ၂၇ ပ္ဍဲကဵုမာန္တလေဝ်၊ မဂွဵု၊ သက်ကိုၚ်၊ ဗဂေါ၊ ရခေၚ် ကေုာံ တွဵုရးဍုၚ်မန်တံဂှ် သ္ကိုပ်အုပ်ဓုပ်၊ က္ဍိုပ်သ္ၚိကၠံ ကေုာံ တခဳ ကံက်စရၚ်ယၟု ကေုာံ ဖ္တိုက်ဖ္အောဝ် သွက်ဂွံယိုက်ဂၠေၚ်လျိုၚ်ပၞာန်တံ ဟွံအောန်နူကဵု ၂၀ တၠ ဒးဒုၚ်ပန်ပသောၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ