ဘာပန်၊ မာတ် ၂၉
ဗ္ဒိုပ်ဒပ်ကံၚ်ဇြဳပၞာန် မၞုံလ္တူဍုၚ်ဘာပန် တွဵုရးကရေၚ်တံသီုဖအိုတ် ဆုတ်စ္ဍးအာအိုတ်ဂှ်ရ ထိၚ်ဒက်ဂွံလဝ် အတိုၚ်ဍုၚ်မွဲယျဂှ် ညးတာလျိုၚ် ဒပ်မဟာ ၅ ဗော်သွးကောန်ဂကူကရေၚ် KNU ဟီုလဴထ္ၜးလဝ်ဂှ် ဂွံတီကေတ်ရ။
ဗ္ဒိုပ်ဒပ်ကံၚ်ဇြဳပၞာန် လ္တူဍုၚ်ဘာပန်ဂှ်ဝွံ ကလေၚ်ဆုတ်စ္ဍးပံၚ်အာတောဲ ဇရေၚ်ဌာန်ဂအုပ်တမ်ဒပ် ကေုာံ ကုန်ဗျူဟာ ဒပ်ကံၚ်ဇြဳပၞာန် မၞုံလ္ပာ်သ္ကုတ်သၠုၚ်ကျာဍုၚ်ဂှ်တုဲ လ္တူဍုၚ်ဂှ် ကောန်ဒပ်ကံၚ်ဇြဳပၞာန်တံ ဟွံမွဲရပုဟ်ဂှ် ဂွံတီကေတ်ရ။
ပပ္တံနူဂိတုမာတ် ၁၉ တုဲကၠုၚ်တေံတုဲ ကောန်ဒပ်ပံၚ်ကောံ KNLA တံ ဘိုၚ်ကၟာတ်လဒဵုထပိုတ်လဝ် ဌာန်ဂအုပ်တမ်ဒပ်ကံၚ်ဇြဳပၞာန် ကေုာံ ဗျူဟာဏံဂှ် ညးမၞုံအခေါၚ်ဟီုဂး ဒပ်မဟာ ၅ KNU ဒုသ္ကိုပ်ဗိုလ်ဇၞော် သဝ်ကလာဒိုဝ် ဟီုရ။
လ္တူဍုၚ်ဘာပန်ဂှ် အရာပ် ၁၊ ၂၊ ၃၊ ၄ အပံၚ်ဖအိုတ် ၄ အရာပ်နွံတုဲ ကောန်ဒပ်ကံၚ်ဇြဳပၞာန်တံ ဟိုတ်နူဆုတ်စ္ဍးအာဂှ်ရ ပ္ဍဲဂိတုမာတ် ၂၇ တုဲကၠုၚ်တေံ ကံၚ်ဇြဳပၞာန် ကၠောန်သ္ပလဝ်ပရေၚ်ဗ္တိုက် နကဵုလွဟ်ဇၞော် ကေုာံ ပၞာန်ကျာတံ သ္ကာတ်တ်မြဟ်ဟ်တုဲ ညးဍုၚ်ကွာန်ကောန်အရာပ် ၂ တၠ ချိုတ်တုဲ သ္ၚိဒၟံၚ်ဗွဲမဂၠိုၚ်ဂၠေၚ် ဇီုကပိုက်လီုလာ်အာလဝ်ရ။
အခိၚ်လၟုဟ် ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်စဵုဒၞါညးဍုၚ်ကွာန်တံ လုပ်စိုပ်ထိၚ်ဒက်လဝ် ဍုၚ်ဘာပန်တုဲ လ္ပာ်ကံၚ်ဇြဳပၞာန် ပန်ပှော်ဗ္တိုက်ဒၟံၚ်လွဟ်ဇၞော်တံ ဟွံပိုတ်သ္ကုတ်ရ။
ပ္ဍဲကဵုဍုၚ်ဘာပန် ကောန်ဒပ်ကံၚ်ဇြဳပၞာန်တံ ဆုတ်စ္ဍးအာဂှ် သၞာံတုဲကၠုၚ်တေံလေဝ် စက်ယန်အုပ်ဓုပ်ကံၚ်ဇြဳပၞာန်တံ ဒေါအ်ဒေၚ်အာတုဲ ဂကောံဒပ်ပၠန်ဂတးတံ ဖံက်ပလီုပလာ်လဝ် ရုၚ်ဌာနမဆေၚ်စပ်တံ ဗွဲမဂၠိုၚ်ရ။
ဒပ်ပံၚ်ကောံ KNLA တံ ထိၚ်ဒက်လဝ် ဍုၚ်ဘာပန်ကီုလေဝ် ပ္ဍဲကဵုဗျူဟာဒပ်ကံၚ်ဇြဳပၞာန်၊ ဌာန်ဂအုပ်တမ်ဒပ် ခလရ ၁၉ တံဂှ် ပလေဝ်ပလေတ်လဝ် ပၞာန်ဒုၚ်ရောၚ် ဂွံတီကေတ် အတိုၚ်ဂလာန် ပရိုၚ်တမ်ရိုဟ်ဗလးတိတံရ။
လအာတုပ်သာ်ဂှ်ကီု ဒပ်ပံၚ်ကောံ KNLA တံဝွံ အပ္ဍဲဂိတုမာတ် သတ္တာဟတတိယဂှ် ဗ္တိုက်ထိၚ်ဂွံလဝ် ဍုၚ်ကျာ်ဍုၚ် တွဵုရးကရေၚ်ဂှ်တုဲ ဂွံသီဍုၚ်ပေၚ်ၚ်မာန် ဗ္ဒိုပ်ပ္ဍဲကဵုပယျဵုသေံ−ဗၟာ ညိညရဟေၚ် သှ်ေဒၟံၚ်ရ။
ဒပ်မဟာ ၆ ဗော်သွးကောန်ဂကူကရေၚ် KNU ဂှ်လေဝ် လုပ်ဒၟံၚ်ပေါဲဗ္တိုက်သီဍုၚ်တံကဵု သီဗ္ဒိုပ်ဒပ်ကံၚ်ဇြဳပၞာန်တံယျဂှ် အပ္ဍဲဂိတုမာတ် သတ္တာဟဒုတိယဂှ် လလောၚ်တြးကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−CJ