ဇြပ်ဗု၊ မာတ် ၂၉
တွဵုရးဍုၚ်မန် ပ္ဍဲပွိုၚ်ဍုၚ်ဇြပ်ဗု နကဵုတၚ်စောဲစပ် ထံက်ပၚ်သြန် ဇရေၚ်ဒပ်စဵုဒၞါညးဍုၚ်ကွာန် PDF တံဂှ်ဂးတုဲ ညးသၟတ်ဒေသ ၆ တၠ ထပ်ဒးဒုၚ်ရပ်လဝ်ဂှ် ဂွံတီကေတ် အတိုၚ်ဂလာန် ညးဒေသတံရ။
တုဲကၠုၚ် ပ္ဍဲဂိတုမာတ် ၂၅ တေံ မာၚ်ခမေန်တူ အာယုက် ၂၀ သၞာံ ဒၟံၚ်ကွာန်ဝါခရု ဒုၚ်ကဵုဒၟံၚ်ဒါန် သွက် PDF နကဵုအကံက် (ရောၚ်နီဦး) တုဲ လၟေၚ်ဂိတု ထံက်ပၚ်လဝ်သြန် ၇ ကိုဋ်ဒ္ကေဝ်ရောၚ် နကဵုတၚ်စောဲစပ်ဏံဂှ် ဒပ်ကံၚ်ဇြဳပၞာန် လုပ်ရပ်စပ်လဝ် ပ္ဍဲသ္ၚိရ။
ကြဴနူဂှ်တုဲ ပ္ဍဲဂိတုမာတ် ၂၇ အခိၚ်ဗ္တံ ၜိုတ် ၈ နာဍဳ ဒပ်ကံၚ်ဇြဳပၞာန် ဇြဟတ်ၜိုတ် ၃၀ လုပ်စိုပ်ကၠုၚ် အပ္ဍဲကွာန်ဝါခရုတုဲ ရပ်စပ်ဏာလဝ် ညးသၟတ်ဒေသ ၅ တၠ ဒၟံၚ်လဒေါဝ်ကွာန် နကဵုဟိုတ်စုတ်လဝ်လှုဲ ဇရေၚ်မာၚ်ခမေန် မဒှ်ရ။
ဒပ်ကံၚ်ဇြဳပၞာန်ဝွံ ပ္ဍဲဂိတုမာတ် ၂၈ အခိၚ်နူဂယး ၜိုတ် ၉ နာဍဳဂှ်လေဝ် ထပ်ရပ်ဒက်ဏာလဝ် ညးတြုံဒေသ ၁ တၠ ဒၟံၚ်အရာပ်ကျခိုၚ်ယျေ ဍုၚ်ဇြပ်ဗု နကဵုတၚ်စောဲစပ်ထံက်ပၚ်ဇွောံမသြန်လှုဲတံဂှ် ညးဒေသတံ ဟီုရ။
ညးသၟတ် ဒးဒုၚ်ရပ် ၆ တၠဂှ် စၟဳတ်ဒၟံၚ် ပ္ဍဲဒၞါဲစၟဳတ်တေံတုဲ သွက်ဂွံကေတ်အာအရေဝ် နကဵုၝောံပိုဒ်သၞောဝ် ဗ္တိုက်သ္အးပကီုပရာပ် ၅၀ (ည) ဂှ် စဳဇန်လဝ်ရောၚ် ဂွံတီကေတ် အတိုၚ်တၚ်လလောၚ်တြး ညးမစုက်လုက်ကဵု ကံၚ်ဇြဳပၞာန်တံရ။
အတိုၚ်တၚ်လလောၚ်တြး ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲကာလသီအဝဵုဏံ ပ္ဍဲတွဵုရးဍုၚ်မန် ညးဍုၚ်ကွာန်ကောန်အရာပ် ဟွံအောန်နူကဵု ၁၀၀၀ ဒးဒုၚ်ရပ်ဒက်လဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ