ဇြဟတ်ပၠန်ဂတးမန်တံ ဖ္တိုက်ဖ္အောဝ် သွက်ဂွံရီုဗၚ် ညးဍုၚ်ကွာန်ဒးဘဲပၞာန်

ကျာ်မြဟ်၊ မာတ် ၂၉

ကြဴနူဒးဗလးတဲ ဗ္ဒိုပ်ဗၠာဲသၟိၚ်ကအ်ဗိန်တုဲ ဒၟါနူပရေၚ်ဗ္တိုက်ဂၠံၚ်တိုက်၊ ဂၠံၚ်ဍာ်၊ ဂၠံၚ်ကျာ ဒပ်ကံၚ်ဇြဳပၞာန်တံဂှ်တုဲ  ကုညးဍုၚ်ကွာန်ဒးဘဲပၞာန် အပ္ဍဲဒေသၜဳဂြာၚ်တံဂှ် သွက်ဂွံရီုဗၚ်ထ္ၜလ္ပာ်ညးသ္ကအ်အိုတ်ဂှ်ကဵု သွက်ဂွံကဵုအရီုဗၚ် ပရေၚ်ဗ္စာရဏာမၞိဟ်တံဂှ် ဇြဟတ်ပၠန်ဂတးမန်တံ ဖ္တိုက်ဖ္အောဝ်လဝ်ရ။

ပ္ဍဲဂိတုမာတ် ၂၇ တေံ နူကဵုဂၠံၚ်တိုက်၊ ဂၠံၚ်ဍာ်၊ ဂၠံၚ်ကျာ ကံၚ်ဇြဳပၞာန် ပန်ခ္ဍာၚ်ဏာလဝ် လွဟ်ဇၞော် ကွာန်ဓမ္မသ အပ္ဍဲဒေသၜဳဂြာၚ် ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ်တုဲ သ္ၚိဒၟံၚ်ညးအရာပ် ၃၀၀ ပြၚ် ပၟတ်တူဒှ်အာဆောံရ။

ဟိုတ်နူပရေၚ်ပန်ဗ္တိုက် ကံၚ်ဇြဳပၞာန်တုဲ ညးဍုၚ်ကွာန် ၆၀၀၀ ပြၚ် နူကွာန်ဓမ္မသကီု ကွာန်ဗ္ဒါဲဗ္ဒါဲတံကီုဂှ်ဝွံ ဒးပါဲဒဴဒၟံၚ်ဘဲပၞာန် ဒှ်ဒၟံၚ်ဒဒိုက်အိုတ်တုဲ ဗွဲမဂၠိုၚ် ဒှ်ဂကူမန်ဂှ် ကံၚ်ဇြဳဖေဝ်ဒရာဍုၚ်မန် ကဵုလဝ်သမ္တီရ။

အခိၚ်ကာလလၟုဟ် ဒၟါနူပြဝဒပ်ပၞာန်ဗၟာတုဲ ဒှ်ဒၟံၚ်ဒဒိုက်အိုတ်တုဲ ညးဍုၚ်ကွာန်သ္ၚိဌာန်ဟွံမွဲတံဂှ် ညးဍုၚ်ကွာန်မန် မၞုံအပ္ဍဲဍုၚ်မန်ကီု ဍုၚ်မ္ၚးကီု၊ ညးဍုၚ်ကွာန်အပ္ဍဲဍုၚ်တံကီု၊ ဂကောံဗော်သွးဍုၚ်သ္အာၚ်တံကီု သွက်ဂွံကဵုအရီုဗၚ်ပရေၚ်ဗ္စာရဏာမၞိဟ်တံဂှ် ကံၚ်ဇြဳဖေဝ်ဒရာဍုၚ်မန် ဖ္တိုက်ဖ္အောဝ်လဝ်ရ။

အခိၚ်ကွာန်ဓမ္မသ ပၟတ်တူဒၟံၚ် ကွာန်မၞုံဗ္ဒါဲဗ္ဒါဲဂမၠိုၚ် သွက်ဂွံကၠုၚ်စိုပ်ရီုဗၚ်ကဵု ကွဳစက်သိုဟ်ပၠိုတ်ပၟတ်ဂှ် ဒပ်ကံၚ်ဇြဳပၞာန်တံ တာဒၞါလဝ်တုဲ စပ်ကဵုဟွံကဵုအခေါၚ် ဟွံမွဲကဵုပရေၚ်ဗ္စာရဏာမၞိဟ်တံဂှ်တုဲလေဝ် ဒစဵုဒစးဗွဲမသ္ကာတ်မြဟ်ဂှ် ကံၚ်ဇြဳဖေဝ်ဒရာဍုၚ်မန် သ္ဂးရ။

နာဲမန်သာၚ် ညးမၞုံအခေါၚ်ဟီုဂး ကံၚ်ဇြဳဖေဝ်ဒရာဍုၚ်မန်ဂှ် ပၠန်ဂတးဇၞော်ပၟဝ်ကၠုၚ်က္ဍၚ် တၠအဝဵုပၞာန်တံ သာဖေက်ကၠုၚ်တုဲ စွံကၠုၚ်ပွန် ကုညးဍုၚ်ကွာန်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“တ္ၚဲဏံ ပိုယ်တံသီုဖအိုတ် ဟွံမွဲပၟိက် ကုသၞောတ်တၠအဝဵုပၞာန်ရပုဟ်။ ညးလဵုမွဲလေဝ် စိုတ်မိက်ဂွံမံၚ် နကဵုသၞောတ်ဏံဂှ် ဟွံမွဲရပုဟ်။ ဟိုတ်ဂှ်ရလေဝ် ပၠန်ဂတးဂှ် ဇၞော်ပၟဝ်ကၠုၚ်ဒၟံၚ် မွဲတ္ၚဲတုဲမွဲတ္ၚဲရ။ စပ်ကဵုပရေၚ်ဏံတုဲ တၠအဝဵုပၞာန်ဂှ် ဍေံတံသာတုဲဖေက်ကၠုၚ်ရ။ ဟိုတ်ဂှ်ရလေဝ် အတိုၚ်အခိုက်တြေံ ဍေံတံကၠောန်ဒၟံၚ်တွဵု ဆေၚ်မုက်ကဵုဂကောံပၠန်ဂတးတံတုဲ ဟွံဂံၚ်ဗ္တိုက်ရတုဲ သုၚ်စောဲနဲကဲနာနာတုဲ စွံဒၟံၚ်ပွန် ကုညးဍုၚ်ကွာန်တံရ” သာ်ဝွံ သ္ဂးရ။

ပ္ဍဲဂိတုမာတ် ၂၈ အခိၚ်နူဂယး ၅ နာဍဳဂှ်လေဝ် ဒပ်ကံၚ်ဇြဳပၞာန် ထောံမခတိုဟ် နကဵုပၞာန်ကျာ ကုကွာန် မၞုံမွဲဒမြိပ်ဒေသၜဳဂြာၚ်တံဂှ်တုဲ သ္ၚိဒၟံၚ်ကောန်အရာပ် ကွာန်အၚ်ဂစေၚ် ပွိုၚ်ဍုၚ်ကျာ်မြဟ် ဟွံအောန်နူကဵု ၁၀ မ ဇီုကပိုက်လီုလာ်အာလဝ်ရ။

အခိၚ်လၟုဟ် ဒပ်ကံၚ်ဇြဳပၞာန်ဝွံ ၜဳဂြာၚ်သြၚ်လ္ပာ်တေံ နူကွာန်သာံလှေဝ်၊ ကွာန်ခယျးမ္ၚးဂှ် ကၠောံၜဳတုဲ ဖျေံလဝ်ဒပ် ကွာန်ဗ္ဒါဲဗ္ဒါဲတံဂှ်တုဲ နူကဵုဂၠံၚ်ဒဵုခရီုမွဲကဆံၚ် လုပ်စိုပ်ဖျေံလဝ်ဒပ် အပ္ဍဲကွာန်ကြေဝ်ဏာဂှ် ဂွံတီကေတ် ဇရေၚ်ညးဒေသတံရ။

သ္အာၚ်နူဂှ်ပၠန် ပ္ဍဲဇိုၚ်ၜဳ အကြာကွာန်ကြေဝ်ဏာကဵု ကွာန်သၚ်ကၠံ အပ္ဍဲၜဳဂြာၚ်ဂှ် က္ၜၚ်ပၞာန်ဗ္ဂပ်စုတ်လဝ်အမၠံက်ပန်ဇမ္ၚောဲတံ ဟွံအောန်နူကဵု ၂ ဖ္ဍိုက် နွံဒၟံၚ်တုဲ ဖျေံလဝ်ဒပ်ရ။

ညးမကဵုဒၟံၚ်အရီုဗၚ်ပရေၚ်ပါဲဒဴဘဲပၞာန်မွဲတၠဂှ် နူလ္ပာ်ကံၚ်ဇြဳပၞာန် ဟိုတ်နူပရေၚ်ဗ္တိုက် ဂၠံၚ်တိုက်၊ ဂၠံၚ်ဍာ်၊ ဂၠံၚ်ကျာတံတုဲ ညးဒေသၜဳဂြာၚ် ဂၠိုၚ်ကဵုလ္ၚီ ဒးလဝ်ဘဲပၞာန်တုဲ ကဵုဒၟံၚ်အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“လၟုဟ် ( ဒုၚ်လဝ်တဲ) ၜိုတ် ၁၀၀ ပြၚ်ၚ် ဗ္ဒါဲ ၂၀၀ နွံဒၟံၚ်ရ။ နူကဵုပရေၚ်ရီုဗၚ်ဟံၚ်ပြာ်မှာဇန်ပိုယ်တံ ကော်လဝ် လ္တူဍုၚ်ဘာအၚ်ဖိုဟ်ရ။ အာပလံၚ် မၞိဟ်အာမတ်မလီုတံ။ အာခယျးအပ္ဍဲ ကအ်ယက္ခ ဒၞါဲလဵုအာအာ ပိုယ်တံ ပလံၚ်ကဵုရ။ တ္ၚဲဏံတှ်ေ အကာဲအရာသာပရေံကၠုၚ်ရ။ ကွာန်ဓမ္မသဂှ်တှ်ေ (နူၜဳဂြာၚ်) ဒးတတ်ခယျးအပ္ဍဲ ပိုယ်တံရ။ ဂွံတတ်ဂၠံၚ်တိုက်ဂှ် ဟွံမွဲပုဟ်။ ဂၠံၚ်ၜဳမွဲရနွံ” သာ်ဝွံ သ္ဂးရ။

ဇြဟတ်ရာမညဖေဝ်ဒရာခေတ်တၟိ NRFF ဂှ် ညးဍုၚ်ကွာန် ဒးဘဲပၞာန်တံကဵု သ္ၚိဌာန်ဒးဆောံလေၚ်လီုလာ်အာတံဂှ် သွက်ဂွံရီုဗၚ်ညးသ္ကအ်ဂှ်ကီု၊ အခါကာလလၟုဟ် ညံၚ်ဂွိုအ်ကၠောန်သ္ပဒးပေါဲသ္ဘၚ် ကေုာံ ဂဳတတံဂှ် အာတ်မိက်လဝ် ညးဍုၚ်ကွာန်တံရ။

သ္အာၚ်နူဂှ်ပၠန် ကံၚ်ဇြဳပၞာန် ကေုာံ ကောန်ရဲတဝ်ခွါဂမၠိုၚ် မတာဒၞါဒၟံၚ် အခေါၚ်အရာကောန်ဂကူမန်တံ ညံၚ်ဂွံကၠေံအာနူတိဍာ်မန် ဗွဲမပြဟ် နကဵုညးဍုၚ်ကွာန်တံ ပံၚ်တောဲကဵု ဇြဟတ်ပၠန်ဂတးတံတုဲ သွက်ဂွံပၠန်ဂတးအာ ဒပ်ပၞာန်တံဂှ် NRFF ဖ္တိုက်ဖ္အောဝ်လဝ်ရ။

ကောန်ဂကောံ NRFF မွဲတၠဂှ် “ပိုယ်တံ ကာလလၟုဟ် ဒှ်အခိၚ်လုပ်ဒၟံၚ်ပေါဲဗ္တိုက် သွက်ပရေၚ်ဗၠးၜးတုဲ ညးဍုၚ်ကွာန်မန်ပိုယ်တံသီုဖအိုတ် လ္ပာ်သ္ပမာန် သွက်ဂွံလုပ်အာပေါဲဗ္တိုက် ကုကံၚ်ဇြဳပၞာန်ပကီုပရာပ် မကလိလောန်ဒၟံၚ် ပြဝဟွံမွဲကဵုပရေၚ်ဗ္စာရဏာမၞိဟ်သာ်ဏံဂှ် နကဵုဂကောံပိုယ်တံ မိက်ဂွံဗ္ကန်ဏာ ဗွဲမဇြိုဟ်နက်ရ” သာ်ဝွံ သ္ဂးရ။

ပေါဲဗ္တိုက် အပ္ဍဲဒေသၜဳဂြာၚ်ဝွံ ဒပ်ပံၚ်ကောံရပ်လွဟ် PDF ၊ မန်၊ ကရေၚ်တံ လုပ်စိုပ်ဗ္တိုက် ဗ္ဒိုပ်ဗၠာဲသၟိၚ်ကအ်ဗိန် မၞုံပွိုၚ်ဍုၚ်ကအ်ကြိက် ပယျဵုမန်ကဵု ကရေၚ် ပ္ဍဲဂိတုမာတ် ၂၄ ဂှ်တုဲ ပ္ဍဲဂိတုမာတ် ၂၅ ဟိုတ်နူသီဂွံလဝ် ဗ္ဒိုပ်ဂှ်ရ ကံၚ်ဇြဳပၞာန် ဂလိုၚ်ပ္တိုန်ဇြဟတ် ထ္ပက်ကၠုၚ်ကရောၚ်ပၞာန်ရ။

ညးဍုၚ်ကွာန်ကောန်အရာပ် မံၚ်တန်တဴဒၟံၚ် ပ္ဍဲကွာန်မွဲဒမြိပ်ၜဳဂြာၚ် အပ္ဍဲဒေသမန် ကေုာံ ကရေၚ် ဟွံအောန်နူကဵု ၁၀ ကွာန်တံဂှ် ဖေက်ပေါဲဗ္တိုက်တံ သာသ္ကာတ်မြဟ်ကၠုၚ်တုဲ ပါဲဒလေတ်ဒၟံၚ် လ္ပာ်ကွာန်ဒၞါဲဗၠးဘဲတံကဵု လ္တူဍုၚ် မကြပ်တံဂှ်ရ။

ပရိုၚ်−သြၚ်လောန်တိုၚ်(မ်)

ဗီု−CJ