နေဗျဳဒဝ်၊ မာတ် ၂၉
အသေအဟာန်ပၠဒပ် တ္ၚဲဒပ်ပၞာန်ဗၟာ မရနုက်ကဵု ၇၉ သၞာံ ပ္ဍဲဂိတုမာတ် ၂၇ ဂှ်ဝွံ အပ္ဍဲဒပ်ပၞာန်သီအဝဵု ဒဒှ်ရဇြဟတ်ဒပ်လေၚ်ဒိုက်ဒၟံၚ်ဂှ် ထ္ၜးပျးဒၟံၚ်ပြာပြာကတ်တ်တုဲ ဒှ်အာကဆံၚ် ဒဵုကဵုကရောၚ်ပၞာန်စက်ယန်တံ တိတ်ဟွံမာန်ရ။
ပ္ဍဲအသေအဟာန်ပၠဒပ် တ္ၚဲဒပ်ပၞာန်ဗၟာ မကၠောန်ဗဒှ်လဝ်လၟေၚ်သၞာံဂှ် ကောန်ဒပ်ဂၠိုၚ်ကဵုဠက် ထ္ၜးကၠုၚ်ဇြဟတ်မာန်ကီုလေဝ် သၞာံဏံ ဟိုတ်နူဇြဟတ်ဒပ်လေၚ်ဒိုက်တုဲ သုၚ်စောဲလဝ် သ္ဂံၚ်ဗြဴသၟးရဂၠိုၚ်ဂှ် ဂွံဆဵုကေတ်ရ။
ပ္ဍဲအသေအဟာန်ပၠဒပ် သၞာံဏံဂှ် ကောန်ဒပ် ၇၀၀၀ ပြၚ် ပါလုပ်ထ္ၜးလဝ်ဇြဟတ်ရောၚ် လ္ပာ်ဒပ်ပၞာန် ဟီုဂးလဝ်ကီုလေဝ် ကရောၚ်ပၞာန်လ္ၚဵုတံဂှ် တိတ်ဟွံမာန်ရတုဲ ကၠောန်ဗဒှ်လဝ် ဗွဲခမၞောန်ရ။
ပ္ဍဲအသေအဟာန်ပၠဒပ် သၞာံတုဲကၠုၚ်တေံ ကံၚ်ဇြဳပၞာန်ဝွံ တိတ်လဝ်ကရောၚ်ပၞာန်စက်ယန် နကဵုလွဟ်လက်နက်တၟေၚ်ၚ်တၟိတၟိ ရာန်လဝ်နူဍုၚ်သ္အာၚ်တံဂှ်တုဲ သၞာံဏံဂှ် စဵုကဵုကရောၚ်ပၞာန်စက်ယန်တိတ်ဟွံမာန် သီုလွဟ်လက်နက် သီုဇြဟတ် ဒးလေၚ်ဒိုက်ကၠုၚ်ရ။
ကောန်သ္ဂံၚ်တြေံမွဲတၠဂှ် ပ္ဍဲအသေအဟာန်ပၠဒပ် ကရောၚ်ပၞာန်စက်ယန် ဟွံပါလုပ်ဂှ်ဝွံ ဒးသုၚ်စောဲဒၟံၚ် ပ္ဍဲပရေၚ်ပၞာန်တံ မဒှ်တုဲ အကာဲအရာဒပ်ကံၚ်ဇြဳပၞာန်ဝွံ စိုပ်ဒၟံၚ်အခိၚ်တ္ၚဲစှ်ေယျဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒးဟီုတပ်ပ်မ္ဂး စက်ယန်သီုဖအိုတ်ဂှ် ဒးဂေတ်ဗိုၚ်လဝ်နေဗျဳဒဝ်ဏောၚ်။ လၟုဟ်တှ်ေ ပ္တိတ်ဇြဟတ်အရန်တုဲ ပ္ဍဲဌာန်ဂအုပ်ရးတံဂှ်တှ်ေ ပလံၚ်သာ်ဏံတုဲ ဗိုၚ်လဝ်ဂှ်ရ ဟွံပြေပြံၚ်ရပုဟ်။ ဟိုတ်ဂှ်ရ ဍေံတံပ္တိတ်ဟွံမာန်ရပုဟ်။ သီုဖအိုတ်ဂှ်တှ်ေ ဒးသုၚ်စောဲဒၟံၚ်ပ္ဍဲပရေၚ်ပၞာန်တုဲ ပၠဒပ်ဟွံမာန်ရပုဟ်။ ဒးဗက်သုၚ်စောဲဒၟံၚ် ပ္ဍဲပရေၚ်ပၞာန်တေံ။ ဒးစွံလဝ်ဒတုဲဂှ်ရ ဗီုကၠာတေံ ဟွံသေၚ်ရပုဟ်။ တုဲပၠန် သုၚ်စောဲသ္ဂံၚ်ဗြဴဂၠိုၚ်ဂှ်တှ်ေ ဒှ်သဘဴဇြဟတ်ပၞာန်အောန်စှ်ေအာရဏောၚ်။ စိုပ်ကၠုၚ်အခိၚ်တ္ၚဲလုပ်ဒဵုယျဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဂှ် အသေအဟာန်ပၠဒပ် တ္ၚဲဒပ်ပၞာန်ဗၟာဂှ် သၞာဲဒဴ၊ ကောန်သ္ဂံၚ် နူဒပ်ဍာ်၊ ဒပ်တိုက်၊ ဒပ်ကျာ၊ ညးဗြဴ နူဒပ်တိုက်၊ ကောန်ဒပ် နူဒပ်ဗၠာဲသၟိၚ် သၟဝ်တဲကံၚ်ဇြဳပၞာန် ကေုာံ သ္ဂံၚ်ဗြဴဂမၠိုၚ် ကရောၚ်ပၞာန်ညးကဵုညး ပၠလဝ်ဒပ်ရောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒရ။
ညးလ္ၚတ်သ္ၚဳဂၠိပ် ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် အသေအဟာန်ပၠဒပ် တ္ၚဲဒပ်ပၞာန်ဗၟာဂှ်ဝွံ ထ္ၜးပျးဒၟံၚ် အကာဲအရာကံၚ်ဇြဳပၞာန် ကျဒၟံၚ်ပၞာန်ဂှ်တုဲ ဟွံဒေါအ်ဟွံဂွံ ဒှ်သဘဴကၠောန်လဝ် ဗွဲခမၞောန်ရောၚ် ပါ်ပါဲလဝ်ရ။
“အလန်ဏံ (၇၉) ဝါဏံ တ္ၚဲဒပ်ပၞာန်ဍေံတံဟီုဂှ် ဒးကၠောန်ဗဒှ်လဝ် ဗွဲမဗဗွဲကဵု အကာဲအရာဒပ်ပၞာန်လၟုဟ်ရ။ ကောန်သ္ဂံၚ် ဟွံရုမ်ဂပ်တုဲ စုတ်ညးဗြဴ ပ္ဍဲပၠဒပ်တံတုဲ ဒးချဳဒရာၚ်ဒၟံၚ်ဂှ် အဲချိၚ်ခယျကေတ်ရ။ မွဲပၠန်ဂှ် ကမ်လှောဝ်၊ ယာန်ကမ်လှောဝ်ဇၞော်ဇၞော် ထ္ၜးဒၟံၚ်လၟိုန်တံ၊ မွဲပၠန်ဂှ် ဒပ်စြေက်ကွဳစၚ်ခြပ်ပသဲတံဂှ် ဟွံပါရပုဟ်။ မူဟိုတ်ရောတှ်ေ အရာတံဏံလေဝ် ဒဒှ်ရညးတံကျမံၚ်ဂှ် စဵုဒၞါဟွံမာန်ပုဟ်ဟီုဂှ် ပေါဲဗ္တိုက်တုဲကၠုၚ်တေံလေဝ် ထ္မံက်ထ္ၜးဒၟံၚ်ရ။ ဟွံထ္မံက်ထ္ၜးအရာတံဏံမွဲသာ် အတိုၚ်အကာဲအရာဒပ်ပၞာန် ပကတိဏံ ကၠောန်ဗဒှ်ထောံ အသေအဟာန်ပၠန်ဂတး ဍန်န်ဂၠေံဂၠေံရောၚ်ဂှ် အဲချိၚ်ခယျကေတ်ရ” သာ်ဝွံ သ္ဂးရ။
အတိုၚ်လိက်ဒုၚ်စဳရေၚ် ဂကောံသုတေသန ISP-Myanmar ဂှ်မ္ဂး ဒပ်ပၞာန်ဝွံ အပ္ဍဲအခိၚ်ကာလဂွိုအ်သီအဝဵု သၞာံ ၂၀၂၁ တေံဂှ် ဇြဟတ် ၜိုတ်ပွဳပွူ ၁၆၀၀၀၀ နွံလဝ်တုဲ ကြဴနူသီအဝဵုတုဲ ပ္ဍဲဒပ်ပၞာန် ဇြဟတ်ပရေၚ်ဗ္တိုက် မွဲကိုဋ်ရဟွံပေၚ်ရပုဟ်ဂှ် ချိၚ်ခယျသ္ၚဳဂၠိပ်လဝ်ရ။
ဒပ်ပၞာန် လေပ်ကေတ်တဴဒုဟ် လ္တူညးဂြိပ်နူဒပ်ပၞာန်တံဂှ်ဝွံ စနူသီကေတ်အဝဵုကၟိန်ဍုၚ်တုဲ ဟိုတ်နူပၞာန်ပၠန်ဂတးတုဲ သွက်ဂွံဗပေၚ်ဇြဟတ် မလေၚ်ဒိုက်လဝ်တံမာန် ဒးကလေၚ်ဒုၚ်ဒၟံၚ်တဲ ရဲဂြိပ်ပၞာန်တံ၊ ကောန်ပၞာန်တြေံတြေံတံ ကေုာံ သီုကဵုညးကေတ်လဝ်အခေါၚ်ဂဥုဲတံဂှ်ရ။
အခိၚ်လၟုဟ်လေဝ် သွက်ဂွံကလေၚ်ဗပေၚ်ဇြဟတ်ဒပ် မလေၚ်ဒိုက်လဝ်တံဂှ်တုဲ ဂယိုၚ်ပ္တိုန်လဝ်သၞောဝ်ဒပ်အရန် မကလေၚ်ကော် ကောန်ပၞာန်တြေံတြေံ အပ္ဍဲဒပ်တံမာန်ဂှ်ကဵု သၞောဝ်ယိုက်ဂၠေၚ်လျိုၚ်ပၞာန် မစၞောန်ပျးလဝ် ပ္ဍဲလက်ထက်တၠအဝဵုပၞာန်တြေံ ဥူတာန်ယှိုဲတံဂှ်ရ။
က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ်ဂှ် ပကောံပကေဝ် ကောန်ပၞာန်တၟိတၟိ နကဵုသၞောဝ်ယိုက်ဂၠေၚ်လျိုၚ်ပၞာန်တုဲ ကလေၚ်သီကေတ်အာ ဒေသ မဒးဆောံလေၚ်လဝ်တံဏောၚ် ဟီုကြီုလဝ် ပ္ဍဲအသေအဟာန်တ္ၚဲဒပ်ပၞာန် မရနုက်ကဵု ၇၉ ဝါဂှ်ရ။
ပရိုၚ်−သြၚ်လောန်တိုၚ်(မ်)
ဗီု−MOI