နေဗျဳဒဝ်၊ မာတ် ၃၀
ဂကောံရပ်လွဟ်ကောန်ဍုၚ်အရၚ် ဒေါအ်ပန်ပှော် ၇ ဂကောံကဵု ကမ္မတဳပ္ညဳပ္ညပ်ပရေၚ်ၜိုဟ်လလမ် ကံၚ်ဇြဳပၞာန် NSPNC ဒပ်ၜါလ္ပာ် က္တဵုဒှ်ပေါဲဗ္တိုက်ဟွံမွဲတံဂှ်ဝွံ ပ္ဍဲဂိတုမာတ် ၂၈ ဂှ် သဳကၠဳလဝ်ပရေၚ်ၜိုဟ်လလမ် ပ္ဍဲနေဗျဳဒဝ်ရ။
ပ္ဍဲပရေၚ်သဳကၠဳဏံဂှ် ဥက္ကဌ NSPNC ဒုသ္ကိုပ်ဗိုလ်ဇၞော် ထောန်န်နံၚ် ကေုာံ ကောန်ဂကောံကမ္မတဳပ္ညဳပ္ညပ်တံ လ္ပာ်ဂကောံဒေါအ်ပန်ပှော် ၇ ဂကောံဂှ် နာယက PNLO သ္ကိုပ်ဗိုလ်ဇၞော် ဃောန်ဥက္ကာ၊ ဥက္ကဌ ALP ဒဝ်သဝ်မျရာဇာလေန်၊ ဒုဥက္ကဌ LDU ကျာဖူ၊ နူ DKBA သဝ်ကျဝ်တာန်ဌေ တံ မပါလုပ် ကမ္မတဳကေၚ်ကာဗဟဵု နူ KNU/KNLA-PC ၊ NMSP ကေုာံ RCSS တံ တိုန်စိုပ်လဝ်ရ။
ဒုသ္ကိုပ်ဗိုလ်ဇၞော် ထောန်န်နံၚ်ဂှ် ထပ်သောၚ်ကလး သဳကၠဳလဝ် လၟေၚ်ကမၠောန်စပ်ကဵုပရေၚ်ၜိုဟ်လလမ် မဆက်စပ်ကဵု NCA ဂလာန်သ္ကိုပ်က္ဍိုက်ပ်ပၞာန် မဟီုမြော်လဝ် ပ္ဍဲအသေအဟာန် တ္ၚဲဒပ်ပၞာန်ဂှ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန်ရ။
သ္အာၚ်နူဂှ်ပၠန် ကိစ္စစပ်ကဵု ညံၚ်ပဋိပက္ခရပ်လွဟ်ဂွံဒေါအ်ဒေၚ်အာဂှ်ကီု၊ မူဝါဒဒပ်ပၞာန် စပ်ကဵုပရေၚ်ၜိုဟ်လလမ် ၆ သာ်ဂှ်ကဵု ကိစ္စစပ်ကဵုလၟေၚ်ကမၠောန် ပရေၚ်ၜိုဟ်လလမ်သ္ဂောံဂၠိၚ်သ္ၚောဲအဓာန်ဇမၠိၚ်ဂှ်တုဲ ဟီုလဝ်ကီုရ။
ဂကောံဒေါအ်ပန်ပှော် မသဳကၠဳဒၟံၚ်ပရေၚ်ၜိုဟ်လလမ် ကုကံၚ်ဇြဳပၞာန် ၇ ဂကောံဂှ်ဝွံ ကၠာဂွိုအ်သီအဝဵုကဵု သီအဝဵုတုဲ ဂွံပေၚ်ပိသၞာံ ၜိုတ်သတ္တာဟဂှ် ပါဲနူကဵုဂအုပ်ဂကောံဗၠးၜးကောန်ဂကူပအိုဝ် PNLO တုဲ ဂကောံသှ်ေဒၟံၚ်တံ ဒှ်လဝ်ပေါဲဗ္တိုက် ကုဒပ်ကံၚ်ဇြဳပၞာန်ဂှ် ဟွံမွဲရ။
ဗော်ဍုၚ်မန်တၟိဂှ်လေဝ် အပ္ဍဲသီအဝဵုပိသၞာံဏံ အတိုၚ်လိက်ကသုက် NCA ပြသၞာပရေၚ်ဍုၚ်ကွာန် သွက်ဂွံဂၠါဲသွဟ် နနဲပရေၚ်ဍုၚ်ကွာန်ဂှ် ပ္တိတ်ကၠုၚ်ဇြဟတ် နဲကဲနာနာကီုလေဝ် ပေါဲသဳကၠဳဂမၠိုၚ်ဝွံ သွဟ်စၟဳစလဝ်ဂှ် ဟွံကလိဂွံလဝ်တုဲ က္ဍိုပ်သ္ကိုပ်ဗော်လ္ၚဵု ရုဲစှ်ကၠုၚ် သွက်ဂွံပၠန်ဂတး ကံၚ်ဇြဳပၞာန်ရ။
အပ္ဍဲပေါဲသဳကၠဳ ကံၚ်ဇြဳပၞာန် ကေုာံ ဂကောံဒေါအ်ပန်ပှော် ၇ ဂကောံဂှ် ဥက္ကဌ ALP ဒဝ်သဝ်မျရာဇာလေန်ဂှ် လၟေၚ်ကမၠောန်ပရေၚ်ၜိုဟ်လလမ်တံ ညံၚ်ဂွံမံက်က္တဵုဒှ်ကၠုၚ် ဟွံပိုတ်သ္ကုတ်ဂှ်ကီု၊ ကိစ္စသ္ဂောံဒက်ပ္တန်ကၟိန်ဍုၚ်ပံၚ်ကောံ ဒုၚ်သ္ဇိုၚ်ကဵု ဒဳမဝ်ကရေဇြဳ ကေုာံ ဖေဝ်ဒရာတံ၊ ကိစ္စကလေၚ်ဒက်ပ္တန် ဂကောံက္ဍိုက်ပ်လၟေၚ်ကမၠောန်ပရေၚ်ၜိုဟ်လလမ် PPST တံဂှ်လေဝ် သဳကၠဳလဝ်ရောၚ် သ္ဂးရ။
သ္အာၚ်နူဂှ်ပၠန် သီုကဵုကိစ္စကဵုအရီုဗၚ် ပရေၚ်ဗ္စာရဏာမၞိဟ်တံ မပါလုပ် သွက်လၟေၚ်ကမၠောန် ပရေၚ်ၜိုဟ်လလမ်ဍုၚ်ဗၟာ သ္ဂောံထ္မံက်အာရုပ်ရဴ အကြာဌာနက္ဍိုက်ပ်ဖောအ်ဗြေဝ်တောတက် ကောန်ဍုၚ်အရၚ် ကေုာံ ဒေသပယျဵု ကေုာံ ဂကောံ INGO တံဂှ် အရီုဗၚ်မၞုံပၟိက်တံဂှ် သွက်ဂွံကဵုအာမာန် သဳကၠဳပ္ညဳပ္ညပ်လဝ် အကာဲအရာ ရာရန်လဝ်ကိုန်စဳမာန်တံရောၚ်ဂှ်လေဝ် ကံၚ်ဇြဳပၞာန် လလောၚ်ပ္တိတ်လဝ်ရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ တြးလဝ်မုက်ပၞာန် ကုဂကောံရပ်လွဟ်ကောန်ဍုၚ်အရၚ်ဂမၠိုၚ် မပ္တံကဵု ဂကောံကချေၚ် KIO၊ ဂကောံရခေၚ် AA ၊ ဂကောံကရေၚ် KNU ၊ ဂကောံချေၚ် CNF ၊ ဂကောံကရေၚ်ဍာဲ KNPP ၊ ဂကောံပအိုဝ် PNLO ကေုာံ ဂကောံမန် NMSP-AD တံဂှ်တုဲ ဒးဆေၚ်ဒၟံၚ်မုက် ကုဒပ်တိုက်၊ ဒပ်ဍာ်၊ ဒပ်ကျာတံရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် သွက်သ္ဂောံကလိဂွံ ပရေၚ်ၜိုဟ်လလမ်ကၟိန်ဍုၚ်ဂှ် အပ္ဍဲပွိုၚ်ပိသၞာံဏံ ကၠောန်လဝ် ပေါဲသဳကၠဳပရေၚ်ၜိုဟ်လလမ် ၅၀၀၀ ဝါပြၚ်ဂှ် ဟီုဂးလဝ် ပ္ဍဲကဵုအသေအဟာန် တ္ၚဲဒပ်ပၞာန် မရနုက်ကဵု ၇၉ သၞာံဂှ်ရ။
ပရိုၚ်−သြၚ်လောန်တိုၚ်(မ်)
ဗီု−MOI