ကျောန်သု၊ မာတ် ၃၀
ပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲပွိုၚ်ဍုၚ်ကျောန်သု ရးတၞၚ်သဳဂှ် သီုကဵုက္ဍိုပ်သ္ကိုပ်ပျူသဝ်ထဳ သၟဝ်တဲကံၚ်ဇြဳပၞာန်ပါလုပ်ဂှ် ၄ တၠ ချိုတ်အာတုဲ ၃ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ကရောၚ်ပၞာန်ပံၚ်ကောံ ဒပ်စဵုဒၞါညးဍုၚ်ကွာန်ခရိုၚ်ဗိက်ရ။
တုဲကၠုၚ် ပ္ဍဲဂိတုမာတ် ၂၇ တေံ နဒဒှ်စၟတ်သမ္တီ တ္ၚဲပၠန်ဂတးဂှ် ဒပ်ပံၚ်ကောံစဵုဒၞါညးဍုၚ်ကွာန်တံ လုပ်စိုပ်ထ္ပက်လဝ်ပၞာန် ဗ္တိုက်လဝ် ဒၞါဲဒပ်ပံၚ်ကောံ ဒပ်ကံၚ်ဇြဳပၞာန် ကေုာံ ပျူသဝ်ထဳတံ ဖျေံလဝ်ဒပ် ပ္ဍဲကဵုကွာန် (ပဲ့တိုင်၊ ယမုံ၊ ယမုံမြစ်ဝ) တံဂှ်ရ။
အတိုင်ဂလာန် ညးဒုင်တာလျိုင် လလောင်ပရိုင် ဒပ်စဵုဒၞါညးဍုၚ်ကွာန် ကရောၚ်ပၞာန်ပံၚ်တောဲ ၂ ဂှ်မ္ဂး နူစဂိတုမာတ် ၂၆ အခိၚ်ဗ္တံတေံ ဇြဟတ်ပၠန်ဂတးတံ လုပ်စိုပ်ဗ္တိုက်လဝ် ဒၞါဲကံၚ်ဇြဳပၞာန် ကေုာံ ပျူသဝ်ထဳ ဖျေံလဝ်ဒပ်တံ မွဲအခိၚ်ဓဝ်ရောၚ် သ္ဂးရ။
အပ္ဍဲပေါဲဗ္တိုက် မက္တဵုဒှ်လဝ် ပန်ဝါဂှ် သီုကဵုက္ဍိုပ်သ္ကိုပ်ပျူသဝ်ထဳဂှ် ၄ တၠ ချိုတ်တုဲ ၃ တၠ ဇီုကပိုက်ကလိဂွံလဝ်ဝပ်ရောၚ် ညးဒုၚ်တာလျိုၚ် လလောၚ်ပရိုၚ် ဒပ်စဵုဒၞါညးဍုၚ်ကွာန် ကရောၚ်ပၞာန်ပံၚ်တောဲ ၂ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ပံၚ်ကောံ ကံၚ်ဇြဳပၞာန် ကေုာံ ပျူသဝ်ထဳတံ ဒးဒုၚ်ဗ္တိုက်တုဲ ဒဵုကဵုအခိၚ်လၟုဟ် နူကဵုကွာန်မာၚ်လှဝ်ဂှ် ဗပေၚ်လဝ်ဇြဟတ် ပွဳပွူ ၇၀ ဂှ် ဂွံတီကေတ် အတိုၚ်ဂလာန် ဂကောံဒပ်စဵုဒၞါညးဍုၚ်ကွာန်တံရ။
ပ္ဍဲကဵုကရောၚ်ပၞာန် ၂ ဒပ်စဵုဒၞါညးဍုၚ်ကွာန် ခရိုၚ်ဗိက်ဂှ် ပကဖတၞၚ်သဳ၊ တမ်ဒပ် ၂ ခရိုၚ်ဗိက်၊ ဒပ်စြေက် (၂) ၊ ပကဖ ကျောန်သု၊ ပကဖ ပဠဝ်၊ ဂကောံ (တောဗုံးကြီး) တၞၚ်သဳ၊ ဂကောံ (တောၚ်ပံနီ) ၊ ဂကောံဂီုကၠီု ပကဖရး ကေုာံ ဂကောံဒရုၚ်တံ ပံၚ်တောဲဗ္တိုက်လဝ်ရ။
တုဲကၠုၚ် ပ္ဍဲဂိတုမာတ် ၁၁ တေံဂှ်လေဝ် ဗ္ဒိုပ်ဒပ်ပံၚ်ကောံ ပျူသဝ်ထဳ ကေုာံ ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်ဂျဵုဒံၚ် ပွိုၚ်ဍုၚ်ကျောန်သု ဒးဒုၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် ၁၀ တၠ ချိုတ်အာလဝ်ဏီရ။
ပရိုၚ်−သြၚ်လောန်တိုၚ်(မ်)
ဗီု− ဒပ်စဵုဒၞါညးဍုၚ်ကွာန် ခရိုၚ်ဗိက် ကရောၚ်ပၞာန်ပံၚ်ကောံ−၂