မတ်မလီု၊ မာတ် ၃၀
တွဵုရးဍုၚ်မန် ဍုၚ်မတ်မလီု အပ္ဍဲဂိတုမာတ် သတ္တာဟလက္ကရဴအိုတ်ဏံ ၚုဟ်ကၠေၚ်စက်တံ ထပ်သၠုၚ်တိုန်ကၠုၚ်တုဲ ပ္ဍဲဆေၚ်ကၠေၚ်စက်လ္ၚဵုတံဂှ် ထပ်ဒးဂဗဒၟံၚ်ကဵု ကၠေၚ်ပိုတ်အိုတ်တံရောၚ်ဂှ် တၠကမၠောန်သွံရာန်ကၠေၚ်စက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ကၠေၚ်စက်ဝွံ အပ္ဍဲဂိတုမာတ် သတ္တာဟပထမဂှ် ကၠေၚ်ဓာတ် ၉၅ မွဲလဳတာ ၂၈၀၀ ဒ္ကေဝ်ဓဝ် နွံလဝ်ကီုလေဝ် ပ္ဍဲဂိတုမာတ် သတ္တာဟလက္ကရဴအိုတ်ဏံ မွဲလဳတာ ဗ္ဒါဲ ၃၀၀၀ ဒ္ကေဝ် ၚုဟ်သၠုၚ်တိုန်ကၠုၚ်တုဲ ကၠေၚ်ဓာတ် ၉၅ ဂှ်လေဝ် မွဲလဳတာ ၂၈၅၀ ဒ္ကေဝ်ပြၚ် ၚုဟ်မၞုံဒၟံၚ်ရ။
ၚုဟ်ကၠေၚ်စက်တံ ထပ်သၠုၚ်တိုန်ကၠုၚ်တုဲ ပ္ဍဲဆေၚ်ကၠေၚ်စက်လ္ၚဵုတံဂှ် သွံတြးကဵု ကၠေၚ်ဓာတ် ၉၂ ကဵု ၉၅ တံ ဟွံမာန်ရတုဲ ထပ်ဒးဂဗဒၟံၚ်ကဵု ကၠေၚ်ပိုတ်အိုတ်တံရ။
တၠကမၠောနသွံတြးကၠေၚ်စက်မွဲတၠဂှ် ကၠေၚ်စက်ပိုတ်အိုတ်ဂှ်ဝွံ လ္ပာ်ကံၚ်ဇြဳပၞာန် ၜိုတ်နွံပၟိက် ဟိုတ်နူဟွံသွံကဵုကီု၊ ဇြဟတ်ရာန် ဟိုတ်နူသၠုၚ်တိုန်ကၠုၚ်ကီုတံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“စက်ယန်ကၠောန်ဂွံ အခိၚ်က္ညၚ်ဏံဂှ်တှ်ေ ကမၠောန်သိုၚ်ခၞံတံ၊ စက်ယန်တံဏံဂှ် အခိၚ်ဏံ ကၠောန်ဂၠိုၚ်အိုတ်ရ။ အခိၚ်ကၠောန်ကၠုၚ်သာ်ဏံဂှ် တၚ်နွံပၟိက်ကၠေၚ်ဂှ် ဒှ်ဒၟံၚ်အခိၚ်သၠုၚ်အိုတ်ဏောၚ်။ အခိၚ်ဏံဂှ် နူကဵုသီလဝါတေံ သွံကဵုဒၟံၚ် အတိုၚ်တြေံရ။ ဟွံပပဵုပ္တိုန်ကဵုပုဟ်။ အခိၚ်အရပ်စပ်ဂၠိုၚ်တှ်ေ ဒှ်တိုန်အခက်အခုဲညိညရ။ ဒှ်အခက်အခုဲတှ်ေ သွံဟွံရုမ်ပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် နကဵုကံၚ်ဇြဳပၞာန် ကၠေၚ်စက်တံဂှ် ၜိုတ်နွံပၟိက် ယဝ်ရဟွံသွံကဵုမ္ဂး အပ္ဍဲကာလအတးဏံ ဒးဂဗကၠုၚ် ကၠေၚ်စက်ပိုတ်အိုတ် ပရေံပရေံမာန်တုဲ ပ္ဍဲဗွဝ်ဖျာမ္ၚးဂှ်လေဝ် ၚုဟ်သၠုၚ်တိုန်ကၠုၚ် ဂၠိုၚ်ကဵုဆမာန်ဏောၚ်ဂှ် ညးသ္ဂးရ။
ကာလလၟုဟ်ဂှ် ဟိုတ်နူဒှ်အခိၚ်ကၟာတ်ဘာက္ညၚ်ဂှ်တုဲ အာကၠုၚ်တရဴဂၠိုၚ်ကီု၊ ပၟတ်ပၠိုတ်ဂၠိုၚ်ကၠုၚ်တုဲ ပ္ဍဲရုၚ်စက်၊ ရုၚ်ကလောန်တံဂှ် ဒးဂေတ်ဒၟံၚ်ကဵု ပၟတ်စက်ဇၞော်ဇၞော်တံဂှ်ရ အပ္ဍဲဗွဝ်ဖျာကၠေၚ်စက်တံဂှ် ဇြဟတ်ရာန် သၠုၚ်တိုန်ဒၟံၚ်ရ။
တၠကမၠောန်ကၠေၚ်စက်တံဂှ် အခိၚ်ဏံ သွက်ဂွံဂလိုၚ်ပ္တိုန် သွံတြးကဵု ကၠေၚ်စက်ဂှ် အာတ်မိက်လဝ် ဇရေၚ်ကံၚ်ဇြဳပၞာန်ကီုလေဝ် သွံဒၟံၚ်ကဵုသၞောတ်ဗ္ၜတ် အတိုၚ်တြေံဂှ်ရ ဒးဂဗကၠုၚ်ဒၟံၚ် ကၠေၚ်စက်ပိုတ်အိုတ်တံရောၚ် သ္ဂးအိုတ်ရ။
ပ္ဍဲဍုၚ်မတ်မလီုဂှ် အပ္ဍဲကာလဒပ်ပၞာန်သီအဝဵု ပွိုၚ်ပိသၞာံပြၚ်ဏံ ၚုဟ်ကၠေၚ်စက် သၠုၚ်တိုန်ကၠုၚ် ဂၠိုၚ်ကဵုဆတုဲ ကၠေၚ်စက်ပိုတ်အိုတ်တံလေဝ် ဒးဆေၚ်ဒၟံၚ်မုက် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)
ဗီု−TLT