ကျာ်မြဟ်၊ မာတ် ၃၀
နူဒပ်ဍာ်ကံၚ်ဇြဳပၞာန် ဖျေံလဝ်ဗ္ဒိုပ်ဒပ် အပ္ဍဲၜဳဂြာၚ်ဂှ် ဟိုတ်နူပန်ပှော်နၚ်လွဟ်ဇၞော်တုဲ ညးဍုၚ်ကွာန်ပါဲဒဴဘဲပၞာန် နွံဒၟံၚ်ဗ္ဒါဲကွာန်ဓမ္မသ ပွိုၚ်ဍုၚ်ကျာ်မြဟ် ဗၞတ်လ္ၚီ ရီုပ္တိတ်မာန်လဝ်ယျဂှ် ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူအခိၚ် ဒပ်ပံၚ်ကောံ မန်၊ ကရေၚ် ကေုာံ PDF တံ သီဂွံ ဗ္ဒိုပ်ဗၠာဲသၟိၚ်တိဍာ်ကအ်ဗိန်တုဲဂှ် ဒပ်ကံၚ်ဇြဳပၞာန်ဝွံ အရိုဟ်တ္ၚဲအဆက်က် ပန်ဖျေံဒၟံၚ်လွဟ်ဇၞော် ကေုာံ ထောံမံၚ်မခတိုဟ် နူကဵုဒပ်ကျာ၊ ဒပ်ဍာ်၊ ဒပ်တိုက် ကုကွာန်မၞုံဗ္ဒါဲဗ္ဒါဲတံဂှ်ရ။
ဟိုတ်ဂှ်ရ ညးဍုၚ်ကွာန်ဂၠိုၚ်ကဵုလ္ၚီ နူကဵုကွာန်ကအ်ဗိန်၊ ကအ်ပံက်၊ ကျာ်ဇၞော်၊ ဓမ္မသ၊ သၚ်ကၠံ၊ ကြေဝ်ဏာ ကေုာံ ကအ်သိုက်တံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
ပ္ဍဲကဵုဏံ ညးဍုၚ်ကွာန် နူကဵုကွာန်ဓမ္မသ နွံဒၟံၚ် အပ္ဍဲကွာန်တံကဵု ဇိုၚ်ဒဵု၊ အပ္ဍဲထီုတၟအ်တံဂမၠိုၚ် သွက်ဂွံပါဲဒလေတ်ဒၞါဲဗၠးဘဲမာန် ဂကောံရီုဗၚ်ကွာန်ဗ္ဒါဲဗ္ဒါဲတံ ၜိုတ်ရီုပ္တိတ်မာန် ရီုပ္တိတ်လဝ်ယျဂှ် ညးမကၠောန်ဒၟံၚ်ပရေၚ်ဟံၚ်ပြာ်မွဲတၠ ဟီုရ။
“လၟုဟ်ဂှ် ဒှ်ဒၟံၚ်သဘဴမုက်ပၞာန်တုဲ ပၟတ်တူမုတူတှ်ေ ပိုယ်တံ ဟွံဂံၚ်အာပုဟ်။ နူဂယးတေံ ဇဖန်ရီုလမျီုမၞိဟ်ဂှ် ဒးရီုပ္တိတ်လဝ်ရ။ ညးမအောပ်ဒၟံၚ် ပ္ဍဲထီုတၟအ် ကွာန်ဓမ္မသတံသီုဖအိုတ် ပိုယ်တံ ၜိုတ်သ္ပမာန် ရီုပ္တိတ်ကဵုလဝ်တုဲယျ။ တိတ်ကၠုၚ်အိုတ်ယျ။ မၞိဟ်ဂှ်တှ်ေ ၜိုတ်လ္ၚီ ရီုပ္တိတ်လဝ်တုဲယျ” သာ်ဝွံ သ္ဂးရ။
မၞိဟ်သှ်ေဒၟံၚ်တံဂှ်လေဝ် သွက်ဂွံထပ်ရီုပ္တိတ်မာန် ဂကောံရီုဗၚ်ဟံၚ်ပြာ်မှာဇန်ကွာန်တံ ပ္တိတ်ဒၟံၚ်ဇြဟတ်တုဲ မၞိဟ်တြုံလ္ၚဵုတံဂှ်တှ်ေ သွက်ဂွံမၚ်ရံၚ် အကာဲအရာကွာန်ကဵု ညးမသှ်ေဒၟံၚ်ပ္ဍဲသ္ၚိတံ သွက်ဂွံမၚ်သ္ၚိတုဲ သှ်ေဒၟံၚ်တံ နွံရောၚ် ဟီုရ။
ကွာန်ဓမ္မသဝွံ နူကဵုသြၚ်ဗၟံက် ကွာန်ကအ်ဗိန်၊ ပွိုၚ်ဍုၚ်ကအ်ကြိက် ပေါဲဗ္တိုက်က္တဵုဒှ်လဝ်ဂှ် ခြာဒၟံၚ် ၄ မိုၚ်တုဲ သြၚ်ပလိုတ်ဂှ်တှ်ေ ကဵုကွာန်ကြေဝ်ဏာ ပွိုၚ်ဍုၚ်ကျာ်မြဟ်ဂှ် သ္ၚောဲဒၟံၚ် ၜိုတ် ၃ မိုၚ်ဓဝ်ရ။
ဒပ်ကံၚ်ဇြဳပၞာန် ဖျေံလဝ်ဒပ် မွဲဒမြိပ်ကွာန်ကြေဝ်ဏာဂှ် နကဵုအမိၚ် သ္ကိုပ်ရး ဌာန်ဂအုပ်ပၞာန်ရးအဂၞဲကံၚ်ဇြဳပၞာန် သ္ကိုပ်ဗိုလ်ဇၞော် ကျဝ်လေန်မာၚ် မခါန်ကၞက်ပ္တိုန်လဝ်တၟိဂှ် ထပိုတ်လဝ် ဂၠံၚ်ကွာန် ဆက်မံၚ်မွဲကွာန်ကုမွဲကွာန်တံဂှ်တုဲ ကုဂကောံရီုဗၚ်ဟံၚ်ပြာ်ညးပါဲဒဴဘဲပၞာန်တံဂှ်လေဝ် ကၟာတ်လဒဵုလဝ်အခေါၚ်လုပ်စိုပ်ရ။
ဟိုတ်ဂှ်ရ နူကဵုၜဳဂြာၚ်မွဲကဆံၚ် ညးပါဲဒဴဘဲပၞာန် ဒးဘဲပၟတ်တံ ဂွံစိုပ်သြၚ်လ္ပာ်တေံမာန် ဒးရီုဗၚ်ဟံၚ်ပြာ်ကဵုဒၟံၚ်ရောၚ် ဂွံတီကေတ် ဇရေၚ်ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံရ။
“ညးဍုၚ်ကွာန်ပါဲဒဴဘဲပၞာန် ကေုာံ ဘဲပၟတ် ဆုဲပြံၚ်ကၠုၚ် နူလ္ပာ်တေံဂှ် လ္ပာ်သြၚ်ပိုယ်တံဏံ ရီုဗၚ်ကဵုဒၟံၚ်ရ။ ဒၞါဲညးတအ်အာ ဥပမာ ဗ္ဒါဲဗ္ဒါဲဏံမ္ဂး ပိုယ်တံ ဗက်ပလံၚ်ကဵုရ။ ညးလ္ၚဵုတံဂှ်တှ်ေ အာမတ်မလီု၊ အာဘာအၚ် ပလံၚ်ကဵုဂၠံၚ်ဇၞော်တုဲမ္ဂး ပ္တိုန်ကဵုဏာကာ။ ဒၞါဲညးတံမိက်ဂွံအာဂှ် ညးတံဆက်အာရ” သာ်ဝွံ ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်မွဲတၠ ဟီုရ။
ကံၚ်ဇြဳပၞာန်ဝွံ ကွာန်ဓမ္မသ ပေါဲဗ္တိုက်ဟွံက္တဵုဒှ်လဝ်ဂှ် ပ္ဍဲဂိတုမာတ် ၂၇ တေံ နူကဵုဒပ်ဍာ်၊ ဒပ်ကျာ၊ ဒပ်တိုက် ပန်ပှော်လဝ် နကဵုလွဟ်ဇၞော်တုဲ ကွဳစက်သိုဟ်ပၠိုတ်ပၟတ်နူလ္တူဍုၚ်တေံ ဂွံပၠိုတ်ပၟတ်ဂှ် ဟိုတ်နူတာဒၞါလဝ်တုဲ သ္ၚိညးအရာပ် ၃၀၀ မပြၚ် ပၟတ်တူလီုလာ်အာလဝ်ရ။
ကြဴနူဂှ်တုဲ နူကဵုက္ၜၚ်ပၞာန်ဒပ်ဍာ် ကံၚ်ဇြဳပၞာန် ဖျေံလဝ်ဒပ် အပ္ဍဲၜဳဂြာၚ်ဂှ် ၜါဖ္ဍိုက် ၜါတ္ၚဲအဆက်က် ပန်ပှော်ဒၟံၚ်လ္ပာ်ကွာန်ဓမ္မသ နကဵုလွဟ်ဇၞော်ဂှ်တုဲ သ္ၚိဒၟံၚ်သှ်ေဒၟံၚ်လ္ၚဵု ပၟတ်ထပ်တူဒးလီုလာ်အာလဝ်ရ။
ဟိုတ်နူကံၚ်ဇြဳပၞာန် ပန်ပှော်လွဟ်ဇၞော်တုဲ ပ္ဍဲဂိတုမာတ် ၂၈ တေံ ပ္ဍဲကဵုညးဍုၚ်ကွာန် ပါဲဘဲပၞာန် ပ္ဍဲထီုတၟအ် ကွာန်ဓမ္မသဂမၠိုၚ် မိဇၞော်အာယုက် ပွဳပွူ ၆၀ သၞာံမွဲတၠ ဇီုကပိုက်ကလိဂွံဝပ်တုဲ နူကဵုကွာန်ကအ်ဗိန်မွဲကဆံၚ် တိုန်စိုပ်ဍုၚ် လွဳဒၟံၚ်ဂှ် ဂွံတီကေတ် ဇရေၚ်ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံရ။
ဒပ်ကံၚ်ဇြဳပၞာန်ဝွံ ပပ္တံနူကဵုဗ္ဒိုပ်ဗၠာဲသၟိၚ်ကအ်ဗိန်စှ်ေတုဲ နူဂၠံၚ်ဒဵုခရီု ကရောၚ်ပၞာန်ဇြဟတ်ဒပ် ပွဳပွူ ၁၀၀ ပါဂှ် လုပ်စိုပ်ဖျေံလဝ်ဒပ် အပ္ဍဲကွာန်ကြေဝ်ဏာရ။
သ္အာၚ်နူဂှ်ပၠန် သ္ကုတ်သၟဝ်ကျာကွာန်ကအ်ဗိန် ပေါဲဗ္တိုက်ၜါလ္ပာ်ဒှ်တုဲ ဗ္ဒိုပ်ဗၠာဲသၟိၚ် ဒးဒုၚ်သီလဝ်ဂှ် သြၚ်ၜဳဂြာၚ်လ္ပာ်တေံ နူကဵုကွာန်သာံလှေဝ်၊ ကအ်ယက္ခ ကေုာံ ကွာန်ခယျးအပ္ဍဲတေံဂှ်လေဝ် လုပ်စိုပ်ထ္ပက်ဒၟံၚ်ကရောၚ်ပၞာန်တံ နွံဒၟံၚ်ဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ