လ္တူဍုၚ်ကအ်ကြိက် ပေါဲဗ္တိုက်သ္ကာတ်မြဟ်တုဲ သ္ၚိဒၟံၚ်ဗွဲမဂၠိုၚ်ဂၠေၚ် ပၟတ်ထပ်တူလီုလာ်ပၠန်

ကအ်ကြိက်၊ မာတ် ၃၁

လ္တူဍုၚ်ကအ်ကြိက် တွဵုရးကရေၚ်ဂှ် ပေါဲဗ္တိုက်ၜါလ္ပာ် အကြာဒပ်ပံၚ်ကောံပၠန်ဂတးတံကဵု ဒပ်ကံၚ်ဇြဳပၞာန်တံ ဆက်က္တဵုဒှ်ဒၟံၚ်တုဲ သ္ၚိဒၟံၚ်ဗွဲမဂၠိုၚ်ဂၠေၚ် ပၟတ်တူလီုလာ်အာတံ နွံဒၟံၚ်ဂှ် ဂွံတီကေတ် အတိုၚ်ဂလာန် ပရိုၚ်တမ်ရိုဟ်အပ္ဍဲဒေသတံရ။

ပပ္တံနူဂိတုမာတ် ၂၉ အခိၚ်နူဂယး ၁၁ နာဍဳဂှ်တုဲ ပေါဲဗ္တိုက်ၜါလ္ပာ် ကလေၚ်က္တဵုဒှ်လဝ်တုဲ ဍုၚ်ကအ်ကြိက် အရာပ် စၟတ် (၄) လ္ပာ်ကွာန်(အထက်ရွာ) တံဂှ် သ္ၚိပၟတ်တူအာလဝ်တုဲ သ္ၚိဒၟံၚ်အပံၚ်ဖအိုတ် ဗ္ဒါဲ ၂၀ မ ပၟတ်တူလီုလာ်အာလဝ်ရ။

သ္အာၚ်နူဂှ်ပၠန် ဍုၚ်ကအ်ကြိက် အရာပ် စၟတ် (၇) လ္ပာ်(တံတားဦး) ဂှ်လေဝ် ပၟတ်တူက္တဵုဒှ်လဝ် အခိၚ်ဗွဲမလအ်လရောၚ် ဂွံတီကေတ် ဇရေၚ်ပရိုၚ်တမ်ရိုဟ်အပ္ဍဲဒေသတံရ။

ပၟတ်တူ အပ္ဍဲဍုၚ်ကအ်ကြိက်ဂှ်ဝွံ မ္ၚးနူကဵုဒပ်ကံၚ်ဇြဳပၞာန် စံၚ်လဝ်ဂှ် နူကဵုဒရုၚ်၊ လွဟ်ဇၞော် ကေုာံ ပၞာန်ကျာတံ ထောံဖျေံလဝ်မခတိုဟ်ကီုဂှ်ရ ပၟတ်တူက္တဵုဒှ်လဝ်ရောၚ် လ္ပာ်ဂကောံဇြဟတ်ပၠန်ဂတးတံ ဟီုဂးလဝ်ရ။

လ္ပာ်ညးထံက်ဂလာန်ကံၚ်ဇြဳပၞာန်တံဂှ် ပၟတ်တူအာဂှ်ဝွံ လ္ပာ်ဒပ်ပံၚ်ကောံ PDF တံ စစံၚ်လဝ်ဏောၚ်တုဲ သ္ၚိဌာန်ဂမၠိုၚ် ဒးတူအာလဝ်ပၟတ်ဂှ် စောဲစပ်ဟီုဂးလဝ်ရ။

ဟိုတ်နူပေါဲဗ္တိုက်ကအ်ကြိက် မစက္တဵုဒှ်လဝ် ပ္ဍဲသၞာံတုဲကၠုၚ်တေံ ဂိတုဒဳဇြေမ်ဗာ ၁ ဂှ်တုဲ သ္ၚိဒၟံၚ်ဂၠိုၚ်ကဵုကၠံ ပၟတ်တူလီုလာ်အာလဝ်တုဲ လ္ပာ်ဒပ်ကံၚ်ဇြဳပၞာန်လေဝ် ရပ်စပ်စကာလွဟ်ဇၞော်၊ ဒရုၚ်၊ အရီုဗၚ်ပၞာန်ကျာတံတုဲ ပန်ပှော်ဗ္တိုက်ဒၟံၚ် လ္တူဍုၚ်ကအ်ကြိက် မဒှ်ရ။

ဟိုတ်နူပေါဲဗ္တိုက်ကအ်ကြိက်တုဲ ညးဒေသဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တုဲ ဒဵုကဵုအခိၚ်လၟုဟ် စဴဌာန်ဒၟံၚ်ဟွံမာန်ဏီပုဟ်ဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−CJ