ကျာ်မြဟ်၊ မာတ် ၃၁
တွဵုရးဍုၚ်မန် ပွိုၚ်ဍုၚ်ကျာ်မြဟ် ပ္ဍဲကွာန်ဓမ္မသဂှ် ပေါဲဗ္တိုက်ဟွံမွဲမွဲသာ် ပရေၚ်ပန်ပှော်ဗ္တိုက် ကံၚ်ဇြဳပၞာန်ဂှ်ဝွံ ဒဒှ်ရကံၚ်ဇြဳပၞာန် ကလိလောန်စုတ် ပွပကီုပရာပ် လ္တူညးဍုၚ်ကွာန်အလုံဂကူမန်တံဏောၚ်ဂှ် ညးမၞုံအခေါၚ်ဟီုဂး ဗော်ဍုၚ်မန်တၟိ AD နာဲဗညာမန် ဟီုရ။
ဒပ်ကံၚ်ဇြဳပၞာန် ဒးဒုၚ်သီဏာလဝ် ဗ္ဒိုပ်ဗၠာဲသၟိၚ်ကအ်ဗိန်ဂှ်ဝွံ စနူဂိတုမာတ် ၂၇ တုဲကၠုၚ်တေံတုဲ ဟိုတ်နူပန်ပှော်ဗ္တိုက်လဝ် ကွာန်ဓမ္မသ ပေါဲဗ္တိုက်ဒှ်မံၚ်ဟွံမွဲဂှ် နကဵုတရဴတိုက်၊ တရဴဍာ်၊ တရဴကျာတံဂှ်တုဲ သ္ၚိဒၟံၚ် ဟွံအောန်နူကဵု ၄၀၀ မ ပၟတ်တူလီုလာ်အာလဝ်ရ။
ဟိုတ်နူပရေၚ်ပန်ပှော်ဗ္တိုက် ဒပ်ကံၚ်ဇြဳပၞာန်တံဂှ်တုဲ ညးဒေသ ၆၀၀၀ ပြၚ် နူကဵုကွာန်ဓမ္မသ၊ ကအ်ဗိန်၊ ကအ်ပံက်၊ ကအ်ကျာ်၊ ကအ်ဝါန်၊ ကအ်ဒုန်၊ ကအ်ပၞဟ်၊ အၚ်ဂစေၚ် ကေုာံ ကွာန်ဗ္ဒါဲဗ္ဒါဲတံဂှ် ဒးထောံလသာသ္ၚိဌာန် ဒးပါဲဒလေတ်ဂြိပ်ဒဴဒၟံၚ်ရ။
နကဵုတၚ်ရန်တၟံနွံနွံ စွံပွန်ဗ္တိုက်ဒၟံၚ် လ္တူညးဍုၚ်ကွာန်ကောန်အရာပ်ဒုဟ်ဒဏ်ဟွံမွဲတံဂှ်ဝွံ ဒပ်ကံၚ်ဇြဳပၞာန်တံ ကလိလောန်စုတ် ဒုဟ်ရာဇဝတ်ပၞာန် လ္တူဂကောံမၞိဟ်ညးဍုၚ်ကွာန်တံ ဗွဲမကြာန်ဓမာန်မွဲရောၚ်ဂှ် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဟီုရ။
နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ AD ဂှ် “အကာဲအရာပိုယ်လၟုဟ်ဂှ်တှ်ေ ကံၚ်ဇြဳပၞာန် သ္ပမာန်ဍဵုဍိုက်ဒၟံၚ် လ္တူညးဍုၚ်ကွာန်တံ၊ အလုံဂကူမန်တံ နကဵုပွမကြာန်ဓမာန်ဂှ် နွံရ။ ကွာန်ဓမ္မသ ကျာ်မြဟ်မွဲဓဝ်ဟွံသေၚ် ဒှ်ပွပကီုပရာပ် လ္တူအလုံဂကူမန်တံဏောၚ်။ ဟိုတ်ဂှ်ရ နကဵုညးဍုၚ်ကွာန်ကောန်ဂကူမန်တံသီုဖအိုတ် ညးဍုၚ်ကွာန် တန်တဴဒၟံၚ် ပ္ဍဲတွဵုရးဍုၚ်မန်တံသီုဖအိုတ် သွက်ဂွံဘိုၚ်ဗ္တိုက်ပ္တိတ် ပြဝပကီုပရာပ်ကံၚ်ဇြဳပၞာန် ညဳညဳသာသာအိုတ်ဂှ် ပိုယ်တံ မိက်ဂွံဖ္တိုက်ဖ္အောဝ်ရ” သာ်ဝွံ သ္ဂးရ။
ပ္ဍဲဂိတုမာတ် ၂၅ တုဲကၠုၚ်တေံ ဒပ်ပံၚ်ကောံဇြဟတ်ပၠန်ဂတး မန်၊ ကရေၚ် ကေုာံ PDF တံ ဗ္တိုက်သီဂွံလဝ် ဗ္ဒိုပ်ဗၠာဲသၟိၚ်ကအ်ဗိန် မဒှ်ရ။
ကံၚ်ဇြဳပၞာန် ဒးဒုၚ်သီလဝ် ဗ္ဒိုပ်ဗၠာဲသၟိၚ်ကအ်ဗိန်ဂှ်ဝွံ ပ္ဍဲကဵုကွာန်ဒၞါဲဂကူမန်ဂမၠိုၚ် သ္ပဒတဴဂၠိုၚ်အိုတ်တံဂှ် ပန်ပှော်ဗ္တိုက်ဒၟံၚ် နကဵုလွဟ်ဇၞော် ကေုာံ က္ၜၚ်ကျာ ကြပ်အရိုဟ်ဒဒှ်တ္ၚဲတုဲ ဆက်ကလိလောန်ဒၟံၚ်ရ။
ဟိုတ်နူပရေၚ်ပန်ပှော်ဗ္တိုက် ဒပ်ကံၚ်ဇြဳပၞာန်တုဲ ညးဍုၚ်ကွာန်ပါဲဒဴဘဲပၞာန်တံ နွံပၟိက်ဒၟံၚ်ကဵု အရီုဗၚ်ကာတၟေၚ်တံဂှ်ရ ဍုၚ်သ္အာၚ်တံကီု ညးဍုၚ်ကွာန်တံကီု သွက်ဂွံရီုဗၚ်ညးသ္ကအ်အိုတ်ဂှ် ဗော်ဍုၚ်မန်တၟိ AD ဖ္တိုက်ဖ္အောဝ်လဝ်ရ။
“ညးဍုၚ်ကွာန်ပိုယ်တံသီုဖအိုတ် ဇကုကဵုဇကု သွက်ဂွံရီုဗၚ်ညးသ္ကအ်ဂှ်ကီု၊ ဍုၚ်သ္အာၚ်တံကီု ရဲအပ္ဍဲဍုၚ်တံကီု၊ ဂကောံဗော်သွးဍုၚ်သ္အာၚ်တံကီုဂှ် ၜိုတ်သ္ပမာန် ဘိုၚ်ရီုဗၚ်ကဵု ညးဍုၚ်ကွာန်ပါဲဒဴဘဲပၞာန်တံအိုတ်ဂှ် အဲမိက်ဂွံအာတ်မိက်ဏာရ” သာ်ဝွံ နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ AD ဆက်ဟီုလဝ်ရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ သ္ၚိဒၟံၚ်ညးဍုၚ်ကွာန်ကောန်အရာပ်တံကီု၊ စမြိုၚ်ဘုတ်ဘာတံကီု၊ ဘာဗ္တောန်လိက်၊ ရုၚ်ဂဥုဲ ဗ္ဒမ်ဂဥုဲတံဂှ် စွံပွန်ဗ္တိုက်ကၠုၚ်ဂှ်ရ နကဵုညးဍုၚ်ကွာန်တံ သွက်ဂွံအာကၠုၚ် နကဵုဓဝ်သတိ ပရေၚ်ပၞာန်တံဂှ်ကီု သွက်ဂွံဖအောန်ဖျေံ ပေါဲသ္ဘၚ်တံကီုဂှ် ဗော်ဍုၚ်မန်တၟိ NMSP-AD ကဵုလဝ်သတိရ။
လ္တူပြဝဒပ်ကံၚ်ဇြဳပၞာန် မကြာန်ဓမာန်တံဂှ် နကဵုဂကူမန်ဂမၠိုၚ် နူပွမဂိက္တာန်အောန်ဒၟံၚ်စိုတ်ဂှ် ဖန်ဗဒှ်ပ္တိုန်ဇြဟတ်တုဲ နကဵုဇြဟတ်ပံၚ်ကောံ သွက်ဂွံလုပ်အာပေါဲဗ္တိုက်ဂှ် ဖ္တိုက်ဖ္အောဝ်ဆဝ်မ္ၚုဟ်လဝ်ရ။
စပ်ကဵုဒပ်ကံၚ်ဇြဳပၞာန် စံၚ်လဝ်ကွာန်ဓမ္မသဂှ်တုဲ သီုကံၚ်ဇြဳဖေဝ်ဒရာဍုၚ်မန်ကီု ဂကောံဇြဟတ်ပၠန်ဂတးမန်တံကီုဂှ် ဒစဵုဒစးလဝ် ဗွဲမသ္ကာတ်မြဟ်ရ။
စပ်ကဵုကွာန်ဓမ္မသ ပၟတ်တူလီုလာ်အာလဝ်ဂှ်တုဲ ဒဵုကဵုအခိၚ်လၟုဟ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ