မတ်မလီု၊ မာတ် ၃၁
နကဵုသၞာဲဒဴ နူဌာနမဆေၚ်စပ်ဂမၠိုၚ် ညံၚ်ဂွိုအ်ကၠောန်သ္ပ ပွမစလာပ်ဗဇဴတံဂှ် သ္ကိုပ်ဝန်ဇၞော်တွဵုရးဍုၚ်မန် ဥူအံၚ်ကျဳတုၚ် ဟီုလဝ်ကီုလေဝ် ဗလးတိဏံ ပွမဗက်စအဂတိတံ က္တဵုဒှ်ဒၟံၚ် ဇၞော်ကဵုဇြဟတ်ရောၚ် ညးဍုၚ်ကွာန်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကဝ်မယှေန်ဗ္တိုက်သ္အး ပွမဗက်စအဂတိ ကံၚ်ဇြဳပၞာန် ကေုာံ ဂကောံအလဵုအသဳတွဵုရးဍုၚ်မန်တံ ပံၚ်တောဲတုဲ ပ္ဍဲဂိတုမာတ် ၂၉ တေံ ကၠောန်ဗဒှ်လဝ် ပေါဲသဳကၠဳသောၚ်ကလးကဵုပညာ စပ်ကဵုပရေၚ်ဗ္တိုက်သ္အး ပွမဗက်စအဂတိ ပ္ဍဲကဵုၝောံခန်တွဵုရး ဍုၚ်မတ်မလီုဂှ်ရ။
ပ္ဍဲပေါဲသဳကၠဳဂှ်ဂှ် ပ္ဍဲအရာထ္မံက်ရုပ်ရဴ အလဵုအသဳသ္အးဇ္ၚးမွဲ၊ သၞောတ်အုပ်ဓုပ်ခိုဟ်မွဲဂှ် ဒက်ပ္တန်နကဵုသၞာဲဒဴ ဟွံဗက်စအဂတိတံရဟေၚ်ဂွံဂှ် ဥူအံၚ်ကျဳတုၚ် ဟီုလဝ်ရ။
ပ္ဍဲအရာရေၚ်တၠုၚ် ကမၠောန်ဒုၚ်ကာညးဍုၚ်ကွာန်တံဂှ်လေဝ် နကဵုသၞာဲဒဴဂမၠိုၚ် သွက်ဂွံယျဵုလ္ဂူတပ်တးဂှ်ကီု၊ ပွမဗက်စအဂတိတံ ညံၚ်ဂွံအောန်စှ်ေအာ သွက်ဂွံရေၚ်တၠုၚ်ပ္တိတ်ဇြဟတ် နူကဵုသွာၚ်နာနာ နဲကဲစုၚ်ဇဳဂှ် ဖ္တိုက်ဖ္အောဝ်လဝ်ရ။
ညးဍုၚ်ကွာန်ဒေသမွဲတၠဂှ် ၜိုန်ရဟီုဒၟံၚ် ကုဌာနမဆေၚ်စပ်တံ ညံၚ်ဂွိုအ်ဗက်စအဂတိကီုလေဝ် နတဲဏံ ဌာနမဆေၚ်စပ်တံသီုဖအိုတ် ဗက်စဒၟံၚ်အဂတိတံဂှ် ကၠောန်ၜိုတ်ဒၟံၚ် ဇၞော်ကဵုဇြဟတ်တုဲ ယဝ်ရတေၚ်မ္ဂးလေဝ် ကေတ်ကဵုအရေဝ် ရေၚ်တၠုၚ်ကဵုဟွံမွဲပုဟ်ဂှ် ဟီုရ။
“သ္ကိုပ်ဝန်ဇၞော်ဂှ်တှ်ေ ဟီုဂှ်ဟီုမံၚ်ရ။ ညးမွဲမှလေဝ် ကေတ်အရေဝ်ရေၚ်တၠုၚ်ကဵုဟွံမွဲပုဟ်။ စနူကဵု လဝက၊ ရုၚ်ကၠောန်လိက်ကၠောံဍုၚ်တံ၊ ဗၠာဲသၟိၚ်ထိၚ်ယာန်တံ ဒှ်တမ် စဒၟံၚ်လာပ်ဗဇဴတံ ကွေံကွေံဏောၚ်။ ကၠောန်ကၠုၚ်သာ်ဏံဟီုဂှ် စိုတ်ညးတံတှ်ေ ကဵုလဝ်အခေါၚ်ကၠောန် ကုညးတံဏောၚ်။ ညးလ္တူအဲ အဲလ္တူညး ဗီုဂွံဂွံအခေါၚ်အရာဂှ် EPC လေဝ် ဗီု EPC ။ မၞိဟ်ကဵုလှုဲဂၠိုၚ်ၚ်တံတှ်ေ တ္ၚဲဏံကဵုလှုဲ တ္ၚဲယးဂွံပၟတ်ရ။ အာအတိုၚ်ဏံရမ္ဂး မဳတာဂှ် ဟွံဂွံဟဂှ်ရ။ အာတေၚ် ဇၞော်သ္ကိုပ် နူဌာနမဆေၚ်စပ်တံဂှ်မ္ဂးလေဝ် ကေတ်အရေဝ်ရေၚ်တၠုၚ်ကဵုဂှ် ဟွံမွဲပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ဌာနမဆေၚ်စပ် သၟဝ်တဲကံၚ်ဇြဳပၞာန်တံ ဗက်စအဂတိတုဲ ယဝ်ရအာတေၚ် ဒၞါဲမဆေၚ်စပ်တံဂှ်မ္ဂးလေဝ် ညးယိုက်ဝန်ဌာနမဆေၚ်စပ်တံ စၟတ်သမ္တီလဝ် မၞိဟ်ကၠုၚ်တေၚ်တံဂှ်တုဲ ပံၚ်တောဲကဵုကံၚ်ဇြဳပၞာန်တုဲ ကဵုဒဒိုက်နာနာတံ ကၠောန်ၜိုတ်ဒၟံၚ်ရောၚ် ညးဆက်ဟီုရ။
ဌာနမဆေၚ်စပ် ရေၚ်တၠုၚ်ဒၟံၚ်ပရေၚ်ဒုၚ်ကာ ကုညးဍုၚ်ကွာန်တံ ဗွဲမဂၠိုၚ်ဂှ်ဝွံ ကြဴနူဒပ်ပၞာန်သီအဝဵုတုဲ ကဵုလှုဲမှ ကဵုကၠုၚ်ပရေၚ်ဒုၚ်ကာတံဂှ်ကီု၊ ဟွံကဵုလှုဲမ္ဂး ညံၚ်ဂွံလအ်လ ကၠောန်မံၚ်သၟးဟွံက စနူကဵုဘပဠ အာတ်သြန်တံ ဒှ်တမ် ကလိလောန်ဒၟံၚ် ပရေၚ်ဗက်စအဂတိတံ မံက်က်ထေၚ်ၚ်ရ။
ပ္ဍဲကဵုဏံ ဌာနမဆေၚ်စပ် သၟဝ်တဲကံၚ်ဇြဳပၞာန်ဂမၠိုၚ် မပ္တံကဵု ရုၚ်အုပ်ဓုပ်ကာနာနာ၊ လဝက၊ ရုၚ်ကၠောန်လိက်ကၠောံဍုၚ်၊ ကညန၊ ဗ္ဒိုပ်ဗၠာဲသၟိၚ် ကေုာံ ရုၚ်ဗၠာဲသၟိၚ်ထိၚ်ယာန်တံဂှ် ကၠောန်ၜိုတ်ဒၟံၚ် ပွမဗက်စအဂတိတံ ဇၞော်ကဵုဇြဟတ်တုဲ ပ္ဍဲကဵုဌာနမဆေၚ်စပ်တၞဟ်ဟ်သီုဖအိုတ်ဂှ်လေဝ် ပရေၚ်ဗက်စအဂတိတံ နွံဒၟံၚ်ရောၚ် ညးဍုၚ်ကွာန်ဒေသတံ ဟီုဂးလဝ်အိုတ်ရ။
အတိုၚ်လိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိ NRFF ပၞာန်သီအဝဵုပေၚ်ပိသၞာံဂှ်မ္ဂး ပ္ဍဲကဵုပွမဒုၚ်ကာညးဍုၚ်ကွာန် အပ္ဍဲဒေသမန် လက်ထက်ကံၚ်ဇြဳပၞာန်တံဂှ် ဒ္ဂေတ်ပဋိပတ်လီု၊ ဗက်စအဂတိ ကေုာံ စလာပ်ဗဇဴတံဂှ် ဒှ်ပြသၞာဇၞော်အိုတ်မွဲ ညးဍုၚ်ကွာန်တံ ဒးဂဗဒၟံၚ်ဂၠိုၚ်အိုတ်ရောၚ်ဂှ် သ္ဂးလဝ်ရ။
ပြသၞာဇၞော်အိုတ် ညးဍုၚ်ကွာန်တံ ဒးဆေၚ်ဒၟံၚ်မုက်သာ်ဏံဂှ် ဒဵုကဵုအခိၚ်လၟုဟ် နကဵုကံၚ်ဇြဳပၞာန် ရပ်စပ်သောၚ်ကလးကဵု ဟွံမွဲဂှ်လေဝ် ဂွံဆဵုကေတ်ဒၟံၚ် အဓိကဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
အတိုၚ်ဂလာန် ဂကောံမၚ်ရံၚ်ဒ္ဂေတ်ပဋိပတ်လီု စလာပ်ဗဇဴ ဍုၚ်သ္အာၚ် CPI ဂှ်မ္ဂး ပ္ဍဲကဵုဍုၚ်ကံက်လဝ်တၚ်နၚ် ဗက်စအဂတိ အလုံဂၠးမွဲ ၁၈၀ ဍုၚ်ဂှ် ဍုၚ်ဗၟာဝွံ ကဆံၚ်ဗက်စအဂတိ နွံဒၟံၚ် စဵုကဵု မရနုက်ကဵု ၁၅၇ ဂှ် ထ္မံက်ထ္ၜးလဝ် ပ္ဍဲသၞာံ ၂၀၂၂ တုဲကၠုၚ်တေံရ။
ပရိုၚ်−သြၚ်လောန်တိုၚ်(မ်)
ဗီု−MOI