မတ်မလီု၊ မာတ် ၃၁
တွဵုရးဍုၚ်မန် ပ္ဍဲဍုၚ်မတ်မလီုဂှ် ညးဒေသၜါတၠ ဒးဒုၚ်ရပ်စပ်ပံက်လဝ်ဂဗုတ် နကဵုတၚ်စောဲစပ် ထံက်ပၚ်သြန်လှုဲ ဇရေၚ်ဒပ်စဵုဒၞါညးဍုၚ်ကွာန် PDF တံဂှ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
ဒပ်ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုမာတ် ၂၄ တေံ နကဵုတၚ်ထ္ၜးဟိုတ် ဆက်စပ်ဒၟံၚ်ကဵု PDF တံဂှ်ဂးတုဲ လုပ်စိုပ်ရပ်ဒက်လဝ် ကိုဝ်နေဝေန်ထောန် ဒၟံၚ်ကွာန်ခရောန်ယှာန် ပွိုၚ်ဍုၚ်မတ်မလီုဂှ်ရ။
အခိၚ်စၟဳတ် ကိုဝ်နေဝေန်ထောန်ဂှ် ထံက်ပၚ်ကဵုလဝ်သြန် ကုဒပ်စဵုဒၞါညးဍုၚ်ကွာန်တံ နကဵု Wave Money ကေုာံ Kpay သၟးဟွံက ဆက်စၠောံကဵု Viber Group တုဲ ရေၚ်တၠုၚ်ဒၟံၚ် နဒဒှ်ညးထံက်ပၚ်သြန်တံဂှ် စၟဳတ်ဂွံဆဵုကေတ်ရောၚ် သ္ဂးရ။
ကြဴနူဂှ်တုဲ မချေတ်သုထိုဲ ဒၟံၚ်ကွာန်ကအ်ခမာ ပွိုၚ်ဍုၚ်မတ်မလီု မဟီုဂးဆက်စၠောံလဝ် ကုကိုဝ်နေဝေန်ထောန် ပ္ဍဲ Viber Group တံဂှ်လေဝ် အခိၚ်ရပ်ဒက်စၟဳတ်ဂှ် ဒဒှ်ရထံက်ပၚ်လဝ်သြန် ဇရေၚ် PDF တံဂှ် ဂွံဆဵုကေတ်လဝ်ရောၚ် သ္ဂးရ။
ဟိုတ်နူလၟေၚ်ဒဒှ်ဏံတုဲ ကံၚ်ဇြဳပၞာန် ပံက်လဝ်ဂဗုတ် ကေတ်လဝ်အရေဝ် ကိုဝ်နေဝေန်ထောန် ကေုာံ မချေတ်သုထိုဲတံ ပ္ဍဲကဵုဗ္ဒိုပ်ဗၠာဲသၟိၚ်မုဟ်ပန် နကဵုၝောံပိုဒ်သၞောဝ်ဗ္တိုက်သ္အးပကီုပရာပ် ၅၀ (ည) ၊ ၅၂ (က) တံဂှ် ဂွံတီကေတ်ရ။
လအာတုပ်သာ်ဂှ်ကီု အပ္ဍဲဂိတုဏံ ကံၚ်ဇြဳပၞာန်ဝွံ ရပ်စပ်ပံက်လဝ်ဂဗုတ် ညးသၟတ်ဒေသ ဒၟံၚ်ပွိုၚ်ဍုၚ်ဇြပ်ဗု ၇ တၠ နကဵုၝောံပိုဒ်သၞောဝ်ဗ္တိုက်သ္အးပကီုပရာပ် နကဵုတၚ်စောဲစပ် ထံက်ပၚ်သြန် PDF တံဂှ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−Social Media