ဂျေရုသလေန်၊ မာတ် ၃၁
ပေါဲသဳကၠဳဒေါအ်ပန်ပှော် ကုဂကောံဟာမာသ်ဂှ် အေဿရေ ကလေၚ်ကၠုၚ်ပၠန်ဏောၚ် သ္ကိုပ်ဝန်ဇၞော် ဗေန်ဂျမေန် နေတာန်ယျာဟု ဟီုလဝ်ရ။
သွက်ဂွံကေတ်တၚ်တုပ်စိုတ် ဒဒှ်ရအေဿရေ ဒးဒုၚ်ရပ်လဝ်တံ ညံၚ်ဂွံကလေၚ်ဗၠးကၠုၚ်ကီု၊ လ္ပာ်အေဿရေ ဗ္တိုက်ဒၟံၚ် ဂကောံဟာမာသ် ပ္ဍဲဂါဇြာတေံ ညံၚ်ဂွံဒေါအ်ဒေၚ်ကီုဂှ်တုဲ နဒဒှ်ကလေၚ်ပ္တိတ်ဇြဟတ်မွဲဝါပၠန် ညး လလောၚ်တြးလဝ် ပ္ဍဲဂိတုမာတ် ၂၉ တေံရ။
အခိၚ်ပေါဲပၞာန် စိုပ်ကၠုၚ်ပွိုၚ် ၆ ဂိတုဂှ် ပရေၚ်ပ္တိတ်ဇြဟတ် ပ္ညဳပ္ညပ်ဒေါအ်ပန်ပှော် အမေရိကာန်၊ ကာတာ ကေုာံ အဳဂျေတ်တံ ရံၚ်ကေတ်ဒေါအ်ဒေၚ်ဒၟံၚ်ဂှ် ဂွံတီကေတ်ရ။
ညးမၞုံပၟိက်ပၞာန် ဒးဒုၚ်ဖျေံလဝ်ဒဏ်ထံၚ် မွဲအာယုက်တံ မပါလုပ် သီုဂွံကလေၚ်ဗလးကဵု ကောန်ထံၚ်ပါလက်သတိုၚ်တံဂှ်ကီု၊ သွက်ဂွံလုပ်စိုပ်ကဵုအရီုဗၚ် ကေုာံ သ္ဂောံကလေၚ်ပ္တန်ပ္တူတံမာန် သွက်ဂွံပံက်ကဵုပယျဵုတံဂှ်ကီု၊ ဒပ်အေဿရေတံ သွက်ဂွံဆုတ်တိတ်ကဵု နူဂါဇြာဂှ်ကီု၊ သ္ဂောံဖအိုတ်ကၠေံပေါဲပၞာန် သွက်ဂွံကလေၚ်ဗလးကဵု ညးဒးဒုၚ်ရပ်သှ်ေဒၟံၚ်တံ မွဲကဆံၚ်တုဲမွဲကဆံၚ်တံဂှ် ဂကောံဟာမာသ် ပ္တိုန်လဝ်ဂလာန်ရ။
တၚ်အာတ်မိက်တံဏံဂမၠိုၚ်ဝွံ ဗဂေတ်မတ်ရဏောၚ်တုဲ ညးဒးဒုၚ်ရပ်လဝ်တံ ဗလးကၠုၚ်တုဲလေဝ် အေဿရေ ဆက်ဗ္တိုက်အာ ဂကောံဟာမာသ်တံရဏောၚ်ဂှ် သ္ကိုပ်ဝန်ဇၞော်အေဿရေ ဟီုလဝ်ရ။
ညးဒးဒုၚ်ရပ်လဝ် ကဵုဂကောံဟာမာသ် ၜိုတ် ၁၀၀ နွံဒၟံၚ်ဏီရောၚ် ပတှ်ေကေတ်တုဲ ပ္ဍဲတဲညးတံ ညးဒးဒုၚ်ရပ် ချိုတ်အာတံလေဝ် နွံဒၟံၚ်ရ။
ပ္ဍဲသၞာံတုဲကၠုၚ်တေံ ဂိတုအံက်တဝ်ဗာမံက်ဂှ် ဟိုတ်နူဂကောံဟာမာသ်တံ ကၠတ်ဗ္တိုက် အေဿရေ ဟွံထေၚ်လဝ်မွဲသာ်ဂှ်တုဲ မၞိဟ် ၁၂၀၀ တၠ ဒးချိုတ်အာလဝ်တုဲ ပေါဲပၞာန်စဒှ်လဝ်ရ။
ပ္ဍဲဂါဇြာ ဟိုတ်နူပရေၚ်ဗ္တိုက်အေဿရေတံတုဲ ကောန်ဍုၚ်ပါလက်သတိုၚ် ၃၂၀၀၀ ပြၚ် ချိုတ်တုဲ မၞိဟ်ကလိဂွံဝပ် ၇၄၀၀၀ နွံဂှ် ဂွံတီကေတ် အတိုၚ်တၚ်နၚ် ဌာနဝန်ဇၞော်ပရေၚ်ထတ်ယုက်ဂါဇြာရ။
ပ္ဍဲကဵုညးဒးချိုတ်အာဂမၠိုၚ် ကောန်အရာပ် ကေုာံ သၟာပရေၚ်ဗ္တိုက်တံ ပါလုပ်ဗၞတ်ၜိုတ်လဵုရောဟီုဂှ် ဌာနပရေၚ်ထတ်ယုက် ထ္မံက်ထ္ၜးလဝ် ဟွံမွဲကီုလေဝ် ပိဂအုံၜါဂအုံဂှ်ဝွံ ဒှ်ညးဗြဴတံကဵု ကောန်ၚာ်သၟတ်တံဂှ် ဂွံတီကေတ်ရ။
Ref: AP