ကျာ်မြဟ်၊ ဨပရဴ ၂
ကွာန်ဓမ္မသ မၞုံသၠုၚ်ကျာၜဳဂြာၚ် ပွိုၚ်ဍုၚ်ကျာ်မြဟ် တွဵုရးဍုၚ်မန် အပ္ဍဲပၟတ်တူဂှ် မၞိဟ်တြုံကၠေံမံၚ်မွဲတၠ တူပၟတ်ချိုတ်အာလဝ်ဂှ် ဂွံတီကေတ် ဇရေၚ်သၟာရီုဗၚ်ဟံၚ်ပြာ်ဗလးတိတံရ။
ဟိုတ်နူဒပ်ကံၚ်ဇြဳပၞာန် ပန်စုတ်လဝ် လွဟ်ဇၞော်အမၠံက် ပ္ဍဲကွာန်ဓမ္မသ နူကဵုဒပ်တိုက်၊ ဒပ်ဍာ်၊ ဒပ်ကျာတံဂှ်တုဲ ပ္ဍဲဂိတုမာတ် ၂၇ ဇိုၚ်သဝ်တ္ၚဲ ၜိုတ် ၃ နာဍဳဂှ် ဒတုံဗ္တိုဟ်ထ္ကးအာလဝ် လ္တူသ္ၚိဒၟံၚ်ကောန်အရာပ်တံတုဲ သ္ၚိဒၟံၚ် ၃၀၀ မပြၚ် ပၟတ်တူဒးလီုလာ်အာလဝ်ရ။
ကြဴနူဂှ်တုဲ လၟေၚ်ဒဒှ်တ္ၚဲ ကံၚ်ဇြဳပၞာန် ပန်ပှော်လွဟ်ဇၞော် ပ္ဍဲကွာန်ဓမ္မသ ဆက်နွံဒၟံၚ်တုဲ ညးဍုၚ်ကွာန် ကွာန်ဓမ္မသတံကီု ကွာန်ဗ္ဒါဲဗ္ဒါဲတံကီုဂှ်ဝွံ ဒးဂြိပ်ဒဴပါဲဒလေတ်လဝ် ဒၞါဲဗၠးဘဲတုဲ ဇဖန်မၚ်သ္ၚိ ညးသှ်ေဒၟံၚ်ပ္ဍဲကွာန်တံလေဝ် နွံဒၟံၚ်ရ။
အတိုၚ်ဂကောံဟံၚ်ပြာ်မှာဇန် အပ္ဍဲဒေသတံ ဂၠိုက်ဂၠါဲဂွံဆဵုလဝ် ပ္ဍဲဂိတုမာတ် ၃၁ တေံဂှ်မ္ဂး ညးတြုံ ပၟတ်တူတုဲ ချိုတ်ဒၟံၚ် ပ္ဍဲဗ္ဒမ်သ္ၚိဍာ် သ္ၚိတူပၟတ်ဒှ်အာဆောံ အကြာဂၠံၚ်ကွာန်ဓမ္မသ ဂၠံၚ် ၅ ကဵု ဂၠံၚ် ၆ ဂှ် ဂွံဆဵုကေတ်ရ။
ညးမစုတိအာဂှ်ဝွံ ဒှ်မၞိဟ်တြုံ အာယုက် ဗ္ဒါဲ ၅၀ မွဲတၠတုဲ ဒးချိုတ်အာလဝ် အပ္ဍဲပၟတ်တူ ဂိတုမာတ် ၂၇ ဂှ်ရောၚ် ညးဒေသ ရေၚ်တၠုၚ်ဒၟံၚ်ပရေၚ်ဟံၚ်ပြာ်ဗလးတိမွဲတၠ ဟီုရ။
ပ္ဍဲဂိတုဨပရဴ ၁ ဂှ် ဂကောံရီုဗၚ်ဟံၚ်ပြာ် အပ္ဍဲဒေသတံ စံၚ်ကဵုလဝ်ညးမဒးစုတိအာလဝ်ဂှ် ပ္ဍဲသုသာန် ကွာန်ကအ်ပလိုၚ်ဂှ်ကီုလေဝ် ဟိုတ်နူဟွံဂွံအဆက်ကဵု ကောန်ဇာတ်ဂြောဝ်ဂတာ ညးမချိုတ်အာဂှ်တုဲ ဒှ်ညးလဵုမွဲရောဟီုဂှ် ဟွံဂွံတီကေတ်ဏီပုဟ်ဂှ် သ္ဂးရ။
အခိၚ်လၟုဟ်လေဝ် ဟိုတ်နူက္ၜၚ်ပၞာန် ဒပ်ဍာ်ကံၚ်ဇြဳပၞာန် အပ္ဍဲၜဳဂြာၚ်ဂှ် ပန်ပှော်ဒၟံၚ်လွဟ်ဇၞော် ကေုာံ ပန်ကဵုက္ၜၚ်ကျာတံဂှ်တုဲ ဟွံဂံၚ်လုပ်ပ္ဍဲကွာန်တုဲ ညးဒေသပါဲဒဴဘဲပၞာန် ပ္ဍဲဇိုၚ်ဒဵုတံကဵု ထီုတၟအ်တံ ဗ္ဒါဲ ၂၀၀ သှ်ေဒၟံၚ်ဏီဂှ် ဟီုရ။
လ္ပာ်ကွာန်ကအ်ဗိန်၊ ကအ်ပံက် ဗ္ဒိုပ်ဗၠာဲသၟိၚ်ကံၚ်ဇြဳပၞာန် ဒးဒုၚ်သီလဝ်ဂှ်လေဝ် ပ္ဍဲဂိတုဨပရဴ ၁ နူဂယး စဵုကဵုလဒေါဝ်တ္ၚဲ က္ၜၚ်ကျာပဝ်ဒၟံၚ် ဟွံအောန်နူကဵုပိဝါတုဲ ဗြုလွဟ်ဇၞော်တံဂှ်လေဝ် ဂွံမိၚ်ကေတ်ဒၟံၚ်ဂှ် ဂွံတီကေတ် ဇရေၚ်ညးဒေသတံရ။
တုဲကၠုၚ် ပ္ဍဲဂိတုမာတ် ၂၅ တေံ ဒပ်ပံၚ်ကောံ မန်၊ ကရေၚ် ကေုာံ PDF တံ စနူသီဂွံဗ္ဒိုပ်ဗၠာဲသၟိၚ်ကအ်ဗိန်ဂှ်တုဲ ဒပ်ကံၚ်ဇြဳပၞာန်ဝွံ နူကဵုဒပ်ဍာ်၊ ဒပ်ကျာ၊ ဒပ်တိုက်တံဂှ် ဂြာတ်ထောံမခတိုဟ် ကေုာံ ပန်ပှော်လွဟ်ဇၞော် ပ္ဍဲကွာန်ဗ္ဒါဲဗ္ဒါဲတံဂှ် ဆက်ကၠောန်သ္ပဒၟံၚ် အရိုဟ်ဒဒှ်တ္ၚဲရ။
ဟိုတ်ဂှ်ရ ညးဍုၚ်ကွာန်ဒၟံၚ်ကွာန်ကအ်ဗိန်၊ ကအ်ပံက်၊ ကျာ်ဇၞော်၊ ဓမ္မသ၊ သၚ်ကၠံ၊ ကြေဝ်ဏာ ကေုာံ ကွာန်ကအ်သိုက် လ္တူဂၠံၚ်ကွဳစက် ရမ္မာဝတဳ သၠုၚ်ကျာၜဳဂြာၚ်တံ ဂၠိုၚ်ကဵုလ္ၚီ ဂြိပ်ဒဴပါဲလေတ်ဒၟံၚ် ဒၞါဲဗၠးဘဲတံရ။
ညးဍုၚ်ကွာန်ပါဲဒဴဘဲပၞာန် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်တံဂှ်ဝွံ သီုစၞစသ္ဇိုၚ်တံ မပါလုပ် နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံဂှ် ဂွံတီကေတ် အတိုၚ်ဂလာန် ညးမရီုဗၚ်ဒၟံၚ်ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်သ္ပဝ်