ရေဝ်၊ ဨပရဴ ၂
ဒက်ပ္တန်အာဍုၚ်မန် မၞုံအပ္ဍဲကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ မဒက်ပ္တန်လဝ် နကဵု တွဵုရးဍုၚ်ဂမၠိုၚ် မဍိုက်ပေၚ်ကဵု အခေါၚ်အရာကံကုသဵုဇကု ဇကုဖန်ဖက်ကေတ်မာန် ကေုာံ ပရေၚ်တုပ်သၟဟ် သွက်ကောန်ဂကူဂမၠိုၚ်တံဏောၚ်ဂှ် ဗော်ဍုၚ်မန်တၟိ AD လလောၚ်တြးလဝ်ရ။
ဗော်ဍုၚ်မန်တၟိ AD ဝွံ ပံၚ်တောဲအာကဵု ဂကောံဇြဟတ်ဂၠံၚ်တရဴပရေၚ်ဍုၚ်ကွာန် မတုပ်သၟဟ်တံတုဲ သ္ဂောံဒက်ပ္တန်အာ ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ မဍိုက်ပေၚ်ကဵုအခေါၚ်အရာကံကုသိုလ်ဇကု ဇကုဖန်ဖက်ကေတ် အတိုၚ်မရန်လဝ်ဂှ်မာန် ပ္ဍဲဂိတုဨပရဴ ၁ ဂှ် လလောၚ်ပ္တိတ်ကၠုၚ် တၚ်ဒတူလိုၚ်၊ တၚ်ပ္တဝ်က္ဍိုပ် ပရေၚ်ဍုၚ်ကွာန်ရ။
ပ္ဍဲကဵုတၚ်ပ္တဝ်က္ဍိုပ်ဂမၠိုၚ် သွက်သ္ဂောံဗ္တိုက်သရိုဟ်အာ တၠအဝဵုပၞာန် ကေုာံ တၠအဝဵုအိုဿီုဂှ်ကီု၊ သွက်သ္ဂောံပလီုအာ သၞောဝ်သ္ဇိုၚ်ဒက်ပ္တန်ဍုၚ် ၂၀၀၈ ၊ သွက်သ္ဂောံဒက်ပ္တန်အာ ကၟိန်ဍုၚ်ပံၚ်ကောံဇေတ်တ် မဍိုက်ပေၚ်ကဵု အခေါၚ်အရာ ကံကုသိုလ်ဂကူညး ညးဖန်ဖက်ကေတ်မာန် မဒုၚ်လဝ်သ္ဇိုၚ်ကဵု သၞောတ်ဖေဝ်ဒရာကဵု သၞောဝ်ဒဳမဝ်ကရေဇြဳ တံဒှ်တမ် ပါလုပ်ရ။
သ္အာၚ်နူဂှ်ပၠန် သွက်ဂွံဒက်ပ္တန်အာ ပရေၚ်ညဳသၟဟ်ဂကူ ကေုာံ ပရေၚ်ဆာန်ကၟိန်ဂကူအိုဿီုကီု၊ သွက်သ္ဂောံဒက်ပ္တန်အာဍုၚ်မန် ဂကူမန်တအ်မပါလုပ် သီုမဍိုက်ပေၚ်ကဵု အခေါၚ်အရာတုပ်သၟဟ်ကောန်ဂကူတၞဟ်ဂမၠိုၚ် ကေုာံ အခေါၚ်အရာကံကုသဵုဂကူညး ညးဖန်ဖက်ကေတ်မာန်တံဏောၚ်ဂှ် ဗော်ဍုၚ်မန်တၟိ AD သ္ဂးရ။
“ပိုယ်တံကၠိုဟ်လဝ်ဂှ်တှ်ေ တၚ်ရန်တၟံ အလုံမိမညးဍုၚ်ကွာန်မန်မွဲဂှ် သွက်ဂွံဒက်ပ္တန်ဍုၚ်မန် မၞုံကဵုအခေါၚ်ဖန်ဖက် ကံကုသိုလ်မန်တံရဏောၚ်။ ဟိုတ်ဂှ်ရ အခိၚ်ကာလဏံ ပ္ဍဲကၟိန်ဍုၚ်ပံၚ်ကောံဇေတ်တ်ဂှ် ညံၚ်ဍုၚ်မန်ဂွံမံက်ဂတဝ်ရဏောၚ်။ လညာတ်ဏံဂှ် တုပ်သၟဟ်ဒၟံၚ်ကဵု တိုၚ်ပ္ကဴတၚ်ရန်တၟံ ဗော်ဍုၚ်မန်တၟိ AD ရဏောၚ်ဂှ် အဲညာတ်ကေတ်ရ” သာ်ဝွံ ညးမၞုံအခေါၚ်ဟီုဂး ဗော်ဍုၚ်မန်တၟိ AD နာဲဗညာမန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတၚ်ဒတူလိုၚ်ပရေၚ်ဍုၚ်ကွာန်တံဂှ် ပရေၚ်သဳကၠဳပရေၚ်ဍုၚ်ကွာန်အိုဿီု မဒုၚ်လဝ်သ္ဇိုၚ် ကုလိက်ကသုက် NCA ဂှ် ဟွံဒုၚ်တဲတုဲ၊ ကမၠောန် ပွမရုန်ဂ္စါန် ကလေၚ်ပၠုပ်လမျီု ကုသၞောဝ်သ္ဇိုၚ် ၂၀၀၈ အိုဿီုတံဂှ် ဒစဵုဒစးအာဏောၚ်တုဲ အပ္ဍဲပရေၚ်ဍုၚ်ကွာန် အနာဂတ်ဂတဂှ် ဒပ်ပၞာန် ပါလုပ်ဟွံဂွံရောၚ် သ္ဂးလဝ်ရ။
သ္အာၚ်နူဂှ်ပၠန် အရာမပါ်ပရအ် အဝဵုအာဏာပရေၚ်ဍုၚ်ကွာန် အကြာသၟာပရေၚ်ဍုၚ်ကွာန် ညးမၞုံအခေါၚ်တၟေၚ် လဵုမွဲမှ ဟွံဒုၚ်တဲတုဲ အပ္ဍဲအရာမပံၚ်တောဲကၠောန်ၜိုတ်အာ ကုဂကောံပၠန်ဂတးဂမၠိုၚ် ပ္ဍဲကာလပၠန်ဂတးဝွံ မ္ဒးဒုၚ်အာသ္ဇိုၚ် ကုတၚ်နွံပၟိက်ဒေသတအ်တုဲ ကၠောန်ၜိုတ်ရေၚ်တၠုၚ်အာ အတိုၚ်သ္ဇိုၚ်ၚုဟ်မးမ္ဒးသ္ပအစာံ အရာကၟိန်ဍုၚ်ပံၚ်ကောံတံရောၚ်ဂှ် ကဵုလဝ်သမ္တီရ။
မွဲလ္ပာ်ဂှ်ပၠန် ပရေၚ်သှ်ကလေးပရေၚ်ဍုၚ်ကွာန် ဂကောံပၠန်ဂတးရပ်လွဟ်ကောန်ဍုၚ်အရၚ်ဂမၠိုၚ် ကေုာံ ဂကောံဇြဟတ်ပၠန်ဂတးတမ်ကညၚ် မပၠန်ဂတးဒၟံၚ်နဲကဲစုၚ် မပါလုပ်သီုဖအိုတ်မာန်တံဂှ် ပံၚ်တောဲပါလုပ်အာဏောၚ်တုဲ ပ္ဍဲလၟေၚ်ကမၠောန် ကုလသမဂ္ဂဂၠးကဝ် ကေုာံ ဍုၚ်အာဇြဳယာန်ဂမၠိုၚ်တအ် မဂၠါဲဒၟံၚ်သွဟ် ပြသၞာပရေၚ်ဍုၚ်ဗၟာဏံဂှ်လေဝ် ပ္ညဳပ္ညပ်ပံၚ်တောဲပါလုပ်အာဏောၚ်ဂှ် ဗော်ဍုၚ်မန်တၟိ AD သ္ဂးရ။
ဗီုတိထ္ၜးဂၠံၚ် သွက်ဂွံထ္မံက်ရုပ်ရဴ လၟေၚ်ပရေၚ်ကမၠောန်ဂမၠိုၚ်တံဂှ် ပံၚ်တောဲအာ ကုဂကောံဇြဟတ်ပၠန်ဂတးမန်တံ မပါလုပ် ဂကောံရပ်လွဟ်ပၠန်ဂတးကောန်ဍုၚ်အရၚ်၊ ဂကောံဇြဟတ်ပၠန်ဂတးက္ညၚ်တံဂှ်တုဲ ဗ္တိုက်သရိုဟ်အာ ကံၚ်ဇြဳပၞာန်သီအဝဵုဏောၚ် မဒှ်ရ။
နာဲဗညာမန်ဂှ် “ပ္ဍဲလၟေၚ်ကမၠောန် ပံၚ်တောဲကဵု မဟာမိတ်တံဂှ် ဂကောံဗော်သွး ဒစဵုဒစးဒၟံၚ် သၞောတ်တၠအဝဵုပၞာန် မၞုံအပ္ဍဲတွဵုရးဍုၚ်မန်တံအိုတ်သီု ဂကောံရပ်လွဟ်တံကီု၊ ဂကောံရပ်လွဟ်ဟွံသေၚ်တံကီုဂှ် ပံၚ်တောဲရေၚ်တၠုၚ်အာ ပ္ဍဲကဏ္ဍမဆေၚ်စပ်တံဏောၚ်တုဲ ဂကောံရပ်လွဟ်ကောန်ဍုၚ်အရၚ်တံ၊ ဂကောံဒဳမဝ်ကရေတ်တေတ်တံ ဗွဲတၟေၚ် NUG ကေုာံ KNU ဂကောံမဟာမိတ်ကောန်ဍုၚ်အရၚ်တံဂှ် ပိုယ်တံ ပံၚ်တောဲရေၚ်တၠုၚ်အာဏောၚ်” သာ်ဝွံ သ္ဂးရ။
မွဲလ္ပာ်ဂှ်ပၠန် ဗ္တိုက်သရိုဟ်အာ ကံၚ်ဇြဳပၞာန်သီအဝဵု ကေုာံ လၟေၚ်ကမၠောန်အုပ်ဓုပ်ဍေံတံတုဲ သွက်ဂွံချူဓဇက် ပွမတံၚ်ဓဇက်ဗၟံက်ရုပ်ရဴလၟေၚ်ကမၠောန်အုပ်ဓုပ်ဍုၚ်မန် ကေုာံ လၟေၚ်ကမၠောန်အုပ်ဓုပ် ကၟိန်ဍုၚ်ပံၚ်ကောံ ပ္ဍဲကာလအကြာဂှ် ဗော်ဍုၚ်မန်တၟိ AD သ္ဂောံကၠောန်ၜိုတ်အာ နွံဒၟံၚ်ရ။
ဗ္တိုက်သရိုဟ်ကၠေံ ကံၚ်ဇြဳပၞာန် မသီလဝ်အဝဵုဂှ်တုဲ ဂကောံဇြဟတ်ပၠန်ဂတးသီုဖအိုတ်မပါလုပ်တအ် ချူဓဇက်အာ သၞောဝ်သ္ဇိုၚ်ဒက်ပ္တန်တွဵုရးဍုၚ်မန်ဂမၠိုၚ် ကေုာံ သၞောဝ်သ္ဇိုၚ်ဒက်ပ္တန်ကၟိန်ဍုၚ်ပံၚ်ကောံ အပ္ဍဲကာလအပြံၚ်အလှာဲတုဲ အတိုၚ်သၞောဝ်ဥပဒေသ္ဇိုၚ်ဒက်ပ္တန် အပ္ဍဲကာလအပြံၚ်အလှာဲတအ်ဂှ်ဟေၚ် ကၠောန်သ္ပအာပေါဲရုဲမာဲတုဲ သွက်ဂွံဒက်ပ္တန်အာ အလဵုအသဳတွဵုရးဍုၚ်မန်ဂမၠိုၚ် ကေုာံ အလဵုအသဳကၟိန်ဍုၚ်ပံၚ်ကောံ အပ္ဍဲကာလအပြံၚ်အလှာဲ မဒှ်ရ။
သ္အာၚ်နူဂှ်ပၠန် ကုညးဒးဒုၚ်ကလိလောန်လဝ် နဟွံမွဲကဵုဗဗွဲဓဝ် အပ္ဍဲအခိၚ်ပဋိပက္ခတအ်ဂှ် ပွမထ္မံက်ရုပ်ရဴ ညံၚ်သ္ဂောံကလိဂွံ ဗဗွဲဓဝ်မာန်ကီု ပွမဗၟံက်အာရုပ်ရဴ လၟေၚ်ကမၠောန်ပရေၚ်ဗဗွဲဓဝ်ဂမၠိုၚ် အပ္ဍဲကာလအပြံၚ်အလှာဲတံဂှ်လေဝ် စုတ်လဝ် ပ္ဍဲဗီုတိထ္ၜးဂၠံၚ် ဗော်ဍုၚ်မန်တၟိ AD ကီုရ။
ဗော်ဍုၚ်မန်တၟိ AD ဝွံ သွက်ဍုၚ်မန် ကေုာံ ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ မဍိုက်ပေၚ်ကဵု အခေါၚ်အရာဒဳမဝ်ကရေဇြဳ၊ အခေါၚ်အရာတုပ်သၟဟ်ဂကူ ကေုာံ အခေါၚ်အရာကံကုသိုလ်ဇကု ဇကုဖန်ဖက်ကေတ်မာန်တံဂှ် သွက်ဂွံထ္မံက်ရုပ်ရဴ တၚ်နၚ်ဗွဲလ္တူဂမၠိုၚ် ပံၚ်တောဲပ္ညဳပ္ညပ်အာကု ဂကောံဇြဟတ်ပၠန်ဂတးတံရောၚ်ဂှ် လလောၚ်ပ္တိတ်လဝ်ရ။
ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ပါ်တိတ်လဝ် နူကဵုဗော်ဍုၚ်မန်တၟိဂှ်ဝွံ ပ္ဍဲဂိတုဖေဖဝ်ဝါရဳ ၁၄ တုဲကၠုၚ်တေံ ကလေၚ်ဗ္တိုက်သရိုဟ်အာ ကံၚ်ဇြဳပၞာန်ဏောၚ် လလောၚ်လဝ်ပၞာန်တုဲ အခိၚ်လၟုဟ်လေဝ် ပံၚ်တောဲကဵု ဂကောံဇြဟတ်ပၠန်ဂတးတံတုဲ ထ္မံက်ဒၟံၚ်ပေါဲဗ္တိုက် ဂမၠိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−NMSP