မတ်မလီု၊ ဨပရဴ ၂
ဟိုတ်နူရာသဳဥတုအေဝ်နဳညဵုတုဲ ပ္ဍဲတွဵုရးဍုၚ်မန် ဗ္ၜတ်ဂမ္တဴတံ သၠုၚ်တိုန်ကၠုၚ်ဒၟံၚ်တီတီတုဲ နကဵုညးဍုၚ်ကွာန်တံ စွံသတိကဵု အန္တရာယ်ဂမ္တဴလုပ် ဗွဲတၟေၚ်အိုတ်ဂှ် အ္စာဂဥုဲဂမၠိုၚ် ဖ္တိုက်ဖ္အောဝ်လဝ်ရ။
စနူဂိတုမာတ် သတ္တာဟလက္ကရဴအိုတ်တုဲကၠုၚ်တေံတုဲ ပ္ဍဲကဵုတွဵုရးဍုၚ်မန် ပွိုၚ်ဍုၚ်ဗွဲမဂၠိုၚ်ဂှ် ဗ္ၜတ်ဂမ္တဴ သာသၠုၚ်တိုန်ကၠုၚ်ဒၟံၚ်တုဲ ကလိုဟ်အာ သၞောတ်ဗ္ၜတ်တၟိ နဒဒှ်ဗ္ၜတ်ဂမ္တဴသၠုၚ်အိုတ်တံရ။
အတိုၚ်တၚ်လလောၚ်တြး ဌာနစမ်ၜတ်အကာဲအရာဗြဲကျာ လလောၚ်ပ္တိတ်လဝ် ပ္ဍဲဂိတုမာတ် ၂၆ ဂှ်မ္ဂး ဍုၚ်မတ်မလီုဝွံ အပ္ဍဲပွိုၚ် ၇၁ သၞာံဂှ် စိုပ်အာဗ္ၜတ်ဂမ္တဴသၠုၚ်အိုတ် ၃၉ ဒဿမ ၇ ဒဳဂရဳသေန်ဒဳဂြုက် ကလိုဟ်အာသၞောတ်ဗ္ၜတ်တၟိဂှ် ဂွံတီကေတ်ရ။
လအာတုပ်သာ်ဂှ်ကီု ပွိုၚ်ဍုၚ်ရေဝ်ဂှ် အပ္ဍဲပွိုၚ် ၆၀ သၞာံဂှ် ဒှ်အာဗ္ၜတ်ဂမ္တဴ ၃၉ ဒဿမ ၅ ဒဳဂရဳသေန်ဒဳဂြုက်တုဲ ပွိုၚ်ဍုၚ်မုဟ်ဍုၚ်ဂှ် အပ္ဍဲပွိုၚ် ၄၀ သၞာံ ဒှ်အာစဵုကဵု ၃၉ ဒဿမ ၂ ဒဳဂရဳသေန်ဒဳဂြုက် ဗ္ၜတ်ဂမ္တဴသၠုၚ်အိုတ်ရ။
အပ္ဍဲဒေသ ဗ္ၜတ်ဂမ္တဴသၠုၚ်တိုန်ကၠုၚ် တီတီတုဲ ညးအာယုက်ဇၞော်ဇၞော်၊ ညးအာကၠုၚ်ချဳဒရာၚ်ဒၟံၚ် ပ္ဍဲတ္ၚဲတံကီု ကေုာံ ကောန်ၚာ်သၟတ်တံဂှ် ဗွဲကြဴဏံ ဂွံဆဵုကေတ် လက္ချန်ဂမ္တဴလုပ် ဂၠိုၚ်ကၠုၚ်ရ။
ပ္ဍဲကဵုလက္ချန်ဂမ္တဴလုပ် ဂွံဆဵုကေတ်လၟုဟ်ဂှ် ဇကုဂမ္တဴ၊ ဒးချာံ၊ ကအ်ဂိ၊ က္ဍိုပ်ဂိတံသၟးဟွံက သီုကဵုယဲတံဏံဂှ် ဂွံဆဵုကေတ်ဒၟံၚ် သီုကဵုယဲဂၞဴကိတ်၊ ဂၞဴအာတံဂှ် ဂွံတီကေတ် အတိုၚ်ဂလာန် အ္စာဂဥုဲဂမၠိုၚ်ရ။
အ္စာဂဥုဲမွဲတၠဂှ် အကြာတ္ၚဲတံဏံ ဗ္ၜတ်ဂမ္တဴသ္ကာတ်မြဟ်တုဲ ဂွံဆဵုကၠုၚ် လက္ချန်ဂမ္တဴလုပ်တံ ပရေံပရေံတုဲ ညးသၟတ်တံ ဒှ်ဂၠိုၚ်ကီုလေဝ် ညးအာယုက်ဇၞော်ဇၞော်တံဂှ်တှ်ေ ယဲသ္ကာတ်မြဟ်ကၠုၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“မွဲဟူဏံ ဗ္ၜတ်ဂမ္တဴ သ္ကာတ်လောန်အာတုဲ လက္ချန်ဂမ္တဴလုပ် နူကဵုဒှ်မံၚ်ဓမ္မတာဂှ် ဒှ်တိုန်သ္ကာတ်တ်မြဟ်ဟ်ရ။ က္ဍိုပ်ဂိတံဂှ်တှ်ေ ဒှ်တိုန်ပရေံပရေံဟဂှ်ရ။ ညးအာယုက်ဇၞော်တံဂှ်တှ်ေ ဓာတ်ဍာ်ကှ်တုဲ ဗ္ၜူဒေါမ်ကီု၊ ဝိုတ်တံကီုဂှ် ဒှ်စလေပ်ရ။ ဒှ်ဂၠိုၚ်ဂှ်တှ်ေ အခိၚ်လၟုဟ်ဂှ် ညးသၟတ်တံ၊ ညးကၠောန်ဒၟံၚ်ကလောန်တံ၊ မၞိဟ်အာမ္ၚးဂၠိုၚ်တံဂှ်တှ်ေ ဒှ်ဂၠိုၚ်ရ။ ဆ္ဂး ယဲသ္ကာတ်မြဟ်ဂှ်တှ်ေ ပ္ဍဲကဵုမၞိဟ်ဇၞော်ဇၞော်တံဂှ် သာတုဲသ္ကာတ်မြဟ်ရ။ မၞိဟ်ဇၞော်ဇၞော်တံဂှ်တှ်ေ အဟိန်မံၚ်ပ္ဍဲသ္ၚိရဂှ်လေဝ် လက္ချန်ဂမ္တဴလုပ်တံ ဒှ်တုဲ မၞိဟ်ဇၞော်ဇၞော်တံဂှ် စဵုကဵုဒးဆောံလေၚ်အန္တရာယ်လမျီုဂှ် ဒှ်မာန်ရ” သာ်ဝွံ သ္ဂးရ။
နကဵုညးဍုၚ်ကွာန်တံ ယဝ်ရလက္ချန်ဂမ္တဴလုပ်တံ က္တဵုဒှ်ကၠုၚ်မ္ဂး ပ္ဍဲကဵုဗ္ဒမ်ဂဥုဲ ရုၚ်ဂဥုဲမကြပ်တံဂှ် အာထ္ၜးဗွဲမဂတာပ်အခိၚ်တုဲ ဒးဒုၚ်လွဳလွတ်ဏောၚ်တုဲ ယဝ်ရဟွံလွဳ ဗွဲမဂတာပ်အခိၚ်မ္ဂး ဒှ်ကၠုၚ်စဵုကဵုလမျီုအိုတ်မာန်ဂှ် ညးဆက်ဟီုရ။
သ္အာၚ်နူဂှ်ပၠန် ပ္ဍဲသၞာံတုဲကၠုၚ်တေံလေဝ် ဗ္ၜတ်ဂမ္တဴသ္ကာတ်တုဲ လၟေၚ်ဒဒှ်ဒးချိုတ်အာတံလေဝ် နွံလဝ်ဂှ်ရ နကဵုညးဍုၚ်ကွာန်တံ အခိၚ်ဗ္ၜတ်ဂမ္တဴ သ္ကာတ်မြဟ်ဒၟံၚ်ဂှ် စွံသတိတုဲ မံၚ်စံၚ်အိုတ်ညိဂှ် အ္စာဂဥုဲဂမၠိုၚ် ဖ္တိုက်ဖ္အောဝ်လဝ်ရ။
ဟိုတ်နူဗ္ၜတ်ဂမ္တဴသ္ကာတ်မြဟ်တုဲ ညံၚ်ဂမ္တဴလုပ်ဂွိုအ်ဒှ် လ္ပဒုၚ်တ္ၚဲ အခိၚ်လအ်လအ်ကီု၊ နူဂယး ၁၀ နာဍဳတုဲ လ္ပဟုံဍာ်ကီု၊ ကယျိုၚ်ကယျဝ် တ္ၚဲဇြောတ်တံဂှ် လ္ပလ္တက်ကီု၊ နကဵုရဲပဠက်တိတ်တံ လ္ပသုၚ်ဍာ်ဂံက်က် လွာဲဂှ်ကီုဂှ် အ္စာဂဥုဲ ဟီုရ။
ရာသဳဥတု အေဝ်နဳညဵုဝွံ ဥတုက္ညၚ်ဂၠိၚ်သ္ၚောဲကီု၊ ဗ္ၜတ်ဂမ္တဴသၠုၚ်ကီု၊ ဍာ်သ္ဂောံတဵုလွဳအောန်ကီု၊ ဍာ်သုၚ်ဟွံရုမ်ဂပ်ကီု၊ ပြသၞာပရေၚ်ထတ်ယုက်တံ က္တဵုဒှ်ပရေံပရေံမာန်ဂှ် သုတေသဳတံ ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−Social Media