ဗြဝတဳ၊ ဨပရဴ ၃
သွက်သ္ဂောံကလေၚ်ကေတ် တမ်ဒပ် ခမရ (၃၅၅) ဖျေံသ္ဇိုၚ်တေန်ဂါန်ညဳနံၚ် ဇြဟတ်ပၠန်ဂတးတံ မသီဂွံလဝ်ဂှ်တုဲ ကရောၚ်ပၞာန်ပံၚ်ကောံကံၚ်ဇြဳပၞာန် မကၠုၚ်ကဵုအရီုဗၚ်ပၞာန်တံ ဒးဒုၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် ၂၀ တၠ ချိုတ်အာလဝ်ဂှ် KNU ဗဟဵု လလောၚ်ပ္တိတ်လဝ် ပ္ဍဲဂိတုဨပရဴ ၂ တေံရ။
တမ်ဒပ်ကံၚ်ဇြဳပၞာန် ခမရ (၃၅၅) ဖျေံသ္ဇိုၚ်တေန်ဂါန်ညဳနံၚ် ပွိုၚ်ဍုၚ်ဗြဝတဳ တွဵုရးကရေၚ်ဂှ် တုဲကၠုၚ် ပ္ဍဲဂိတုမာတ် ၇ တေံ ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ပံၚ်ကောံပၠန်ဂတးတံ ဗ္တိုက်သီဂွံလဝ်ရ။
သွက်ဂွံကလေၚ်ကေတ် တမ်ဒပ်ဏံဂှ်တုဲ နူဂိတုမာတ် ၁၅ စဵုကဵု ၂၀ အကြာကရောၚ်ပၞာန်ပံၚ်ကောံဒပ်ကံၚ်ဇြဳပၞာန်တံကဵု ဒပ်ပံၚ်ကောံဇြဟတ်ပၠန်ဂတးတံဂှ် ဒှ်မံၚ်ပေါဲဗ္တိုက်တုဲ လ္ပာ်ကံၚ်ဇြဳပၞာန် ၁၅ တၠ ချိုတ်တုဲ ကလိဂွံလဝ်ဝပ် ဗွဲမဂၠိုၚ်ဂၠေၚ်ရောၚ် သ္ဂးရ။
ကြဴနူဂှ်တုဲ တုဲကၠုၚ်ပ္ဍဲဂိတုမာတ် ၂၀ စဵုကဵု ၂၅ ကရောၚ်ပၞာန် ကၠုၚ်ကဵုအရီုဗၚ်ပၞာန် ဒးဒုၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် ၅ တၠ ထပ်ချိုတ်အာလဝ်ပၠန်တုဲ လွဟ်လက်နက်မကမ်တံလေဝ် သီဂွံလဝ်ဂှ် ဂွံတီကေတ် အတိုၚ်တၚ်လလောၚ်တြးရ။
အပ္ဍဲပေါဲဗ္တိုက်ၜါလ္ပာ်ဂှ် လ္ပာ်ဒပ်ပံၚ်ကောံဇြဟတ်ပၠန်ဂတးတံ ၄ တၠ ဇီုကပိုက်ကလိဂွံလဝ်ဝပ်တုဲ ၁ တၠ ဒးပူဇဴဏာလမျီု သွက်ကၟိန်ဍုၚ် ကေုာံ သွက်ဖေဝ်ဒရာဒဳမဝ်ကရေဇြဳ ဗွဲမသၠုၚ်ပြဲဂှ် KNU ကဵုလဝ်သမ္တီရ။
အပ္ဍဲလၟေၚ်ဒဒှ် ကရောၚ်ပၞာန်ကၠုၚ်ကဵုအရီုဗၚ်ပၞာန် ဒးဒုၚ်ဗ္တိုက်ဂှ် ဟိုတ်နူလွဟ်ဇၞော် ကေုာံ ပရေၚ်ဗ္တိုက်တရဴကျာ ကံၚ်ဇြဳပၞာန်တံတုဲ ညးဍုၚ်ကွာန် ၁ တၠ ဇီုကပိုက်ချိုတ်အာလဝ်တုဲ ၃ တၠ ကလိဂွံလဝ်ဝပ်တုဲ သ္ၚိဌာန်ညးဍုၚ်ကွာန်လ္ၚဵု ဒးဇီုကပိုက်လီုလာ်အာလဝ်ဂှ် ဂွံတီကေတ် အတိုၚ်တၚ်လလောၚ်တြး KNU ရ။
အခိၚ်လၟုဟ် လ္ပာ်ဒပ်ပံၚ်ကောံပၠန်ဂတး KNLA တံ ဆက်ထ္ပက်ပၞာန်ဗ္တိုက်ဒၟံၚ် ကုန်ဗျူဟာ ကေုာံ တမ်ဒပ်ကံၚ်ဇြဳပၞာန် ၂၅၇ သှ်ေဒၟံၚ် အပ္ဍဲဒေသတေန်ဂါန်ညဳနံၚ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်ရောၚ် ဂွံတီကေတ် ဇရေၚ်ပရိုၚ်တမ်ရိုဟ်ဗလးတိတံရ။
အပ္ဍဲပေါဲဗ္တိုက်တေန်ဂါန်ညဳနံၚ်ဂှ် ဟိုတ်နူပရေၚ်ဗ္တိုက် လွဟ်ဇၞော် ကေုာံ တရဴကျာ ဒပ်ကံၚ်ဇြဳပၞာန်တုဲ ညးဒေသ ဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−KNU