ဂျေရုသလေန်၊ ဨပရဴ ၂
ပ္ဍဲအေဿရေ မၞိဟ်ဟွံပြေစိုတ် စပ်ကဵုပေါဲပၞာန်ဂါဇြာတံ သာဂၠိုၚ်ကၠုၚ်တုဲ သွက်ဂွံပလှ်ဖျေံ သ္ကိုပ်ဝန်ဇၞော် နေတာန်ယျာဟုဂှ် မၞိဟ်ဂၠိုၚ်ကဵုလ္ၚီ ထ္ၜးလဝ်ဆန္ဒရ။
ညးထ္ၜးဆန္ဒ ကၟာတ်လဝ်ဂၠံၚ်ဇၞော်ဍုၚ်ဂျေရုသလေန် သၠုၚ်ကျာသၟဝ်ကျာဂှ် ဒပ်ဗၠာဲသၟိၚ်တံ သုၚ်စောဲပိုက်သိုဟ်ပၠိုတ်ပၟတ်တုဲ ပါ်ထ္ကးလဝ်မၞိဟ် နကဵုဍာ်သၟူပရေံပရေံတံရ။
ညးထ္ၜးဆန္ဒဂမၠိုၚ်ဝွံ သွက်သ္ကိုပ်ဝန်ဇၞော် ဂွံနုက်တိတ်ဂှ်ကီု၊ ညးဒးဒုၚ်ရပ်လဝ် ပ္ဍဲဂါဇြာ ၁၀၀ ပြၚ် ဂွံကလေၚ်ဗၠးကၠုၚ် သွက်ဂွံပ္ညဳပ္ညပ်လွာဲဂှ်ဂှ် အာတ်မိက်လဝ်ရ။
ဟွံဂွံတၚ်တုပ်စိုတ်မွဲသာ် ပေါဲပၞာန်ဂၠိၚ်သ္ၚောဲဒၟံၚ်မ္ဂး ညးဒးဒုၚ်ရပ်လဝ်တံ ချိုတ်အာဂှ် ညးထ္ၜးဆန္ဒတံကဵု ဂြောဝ်ဂတာညးတံ ဒှ်ဒၟံၚ်ဓဝိၚ်အိုတ်တုဲ ပ္ဍဲဂိတုမာတ် ၃၁ ဇိုၚ်သဝ်တ္ၚဲဂှ်လေဝ် မၞိဟ်ဗွဲမဂၠိုၚ်ဂၠေၚ် ထ္ၜးလဝ်ဆန္ဒ ဂတကၠတ်ထဝ် အေဿရေဂှ်တုဲ ညးယိုက်ဂၠေၚ်လဝ်လျိုၚ်ပၞာန် ပ္ဍဲဒပ်ပၞာန်အေဿရေတံလေဝ် ပါလုပ်ဒၟံၚ်ဂှ် ဂွံတီကေတ်ရ။
နေတာန်ယျာဟုဂှ် ညံၚ်ကၟိန်ဍုၚ်ဂွံဗၠးဘဲ ညးမွဲရဟေၚ် ကၠောန်ကဵုမာန်ရောၚ် ဟီုလဝ်တုဲ ဂလာန်ညးဟီုလဝ်ဂှ်လေဝ် မၞိဟ်ဂမၠိုၚ် ပတှ်ေလဝ်အိုတ်ကီုလေဝ် ဂကောံဟာမာသ် ကြဴနူလုပ်စိုပ်ဗ္တိုက်လဝ် အေဿရေတုဲ ဒၟါနူဂီုကၠီုဟွံမွဲတုဲ မၞိဟ်ပ္တိုန်ဒုဟ် လ္တူနေတာန်ယျာဟုတံလေဝ် နွံကၠုၚ်ရ။
ဒဵုကဵုအခိၚ်လၟုဟ် မၞိဟ်ဟွံပြေစိုတ် ကုအလဵုအသဳ သာဂၠိုၚ်ကၠုၚ်တုဲ ပ္ဍဲဂကောံအလဵုအသဳ သၞဒဳမဝ်ကရေဇြဳနွံဒၟံၚ်ရောၚ် ညးထ္ၜးဆန္ဒတံကဵု ညးပါ်ပါဲနေတာန်ယျာဟုတံ ပတှ်ေစှ်ေစိုတ်ဒၟံၚ်ဂှ် ဂွံတီကေတ်ရ။
ဇၞော်သ္ကိုပ်ပရေၚ်ဂီုကၠီုဂမၠိုၚ် ကၠောန်ဒးဗၠေတ်မှာအာရောၚ် ဒုၚ်လဝ်ဝန်ကီုလေဝ် နေတာန်ယျာဟုဂှ် ပ္ဍဲညးတာလျိုၚ်နွံရောၚ် ဟွံဒုၚ်လဝ်ဝန်ဂှ်ရ မၞိဟ်ဂၠိုၚ်ကဵုလ္ၚီ ဒေါသတိတ်တုဲ ထ္ၜးဒၟံၚ်ဆန္ဒအိုတ်ရ။
မၞိဟ်ဂၠိုၚ်ကဵုလ္ၚီ ထ္ၜးဒၟံၚ်ဆန္ဒကီုလေဝ် တၠုၚ်လအာကၠောန်ဗဒှ်ပေါဲရုဲမာဲ ပြဟ်ဟ်မာန်ဂှ် နေတာန်ယျာဟု တးပါဲလဝ်တုဲ ဆက်ဗ္တိုက်အာဏောၚ် ဟီုလဝ်ရ။
သွက်ဂွံဗ္တိုက်သရိုဟ် ဟာမာသ်ဂှ် ကောန်ဍုၚ်အေဿရေ ဗွဲမဂၠိုၚ် လညာတ်ထ္ကးပြး ဟွံမွဲကီုလေဝ် ဗီုပြၚ်ရပ်စပ်ပေါဲပၞာန်၊ ညးဒးဒုၚ်ရပ်လဝ်တံ ညံၚ်ဂွံဗၠးကၠုၚ် သ္ဂောံကၠောန်ကဵုဂှ် တာလျိုၚ်လီုဒၟံၚ်တုဲ အာယုက်သ္ကိုပ်ဝန်ဇၞော် နေတာန်ယျာဟု အိုတ်အာမာန်ဏောၚ် သ္ၚဳဂၠိပ်ဒၟံၚ်တံ နွံဒၟံၚ်ရ။
Ref: BBC