တဳဟဳရာန်၊ ဨပရဴ ၃
သီုကဵုသ္ကိုပ်ဒပ် ကဆံၚ်လ္တူ ၃ တၠ မပါလုပ် သၞာဲဒဴကဵုကသပ်စပ်ကဵုလ္ပာ်ပၞာန် ၇ တၠ ဒးချိုတ်အာလဝ် ပ္ဍဲကဵုပရေၚ်ဗ္တိုက် ရုၚ်ကလုတ်အဳရာန် ဖျေံသ္ဇိုၚ်သဳရဳယျာ ဒးဒုၚ်ဗ္တိုက်ဂှ်ဝွံ ဒှ်တၠတဲအေဿရေရောၚ် အလဵုအသဳအဳရာန် စောဲစပ်လဝ်ရ။
က္ၜၚ်ကျာဗ္တိုက် မထေၚ်ဂွံ က္ၜၚ်ကျာဗ္တိုက်အေဿရဂှ်ေဝွံ ဟိုတ်နူဗ္တိုက်လဝ် ရုၚ်ကလုတ်အဳရာန်ဂှ်တုဲ ပရေၚ်ဗ္တိုက် အကြာအေဿရေ ကေုာံ သၞညးအပ္ဍဲဒေသတံဂှ် အသိၚ်သၠုၚ်တိုန်ကၠုၚ်မာန်ရောၚ် သ္ၚဳဂၠိပ်ဒၟံၚ်တံ နွံဒၟံၚ်ရ။
အပ္ဍဲဒၞါဲရုၚ်ကလုတ် မၞုံဒေသမဳဇြာ ဍုၚ်ဒမက်သကာတ်ဂှ် စမြိုၚ်ကြပ်ဒၟံၚ်ကဵု စမြိုၚ်ရုၚ်ကလုတ်အဳရာန် အဓိကမွဲ လီုအာလဝ်တုဲ ပ္ဍဲကဵုဒၞါဲစမြိုၚ်လီုအာလဝ်ဂှ် တိုၚ်အလာံဂှ်ဝွံ ပစူလဝ်အလာံအဳရာန်ဂှ်လေဝ် ဂွံဆဵုကေတ်ရ။
စပ်ကဵုပရေၚ်ဗ္တိုက် ရုၚ်ဝန်ကဵုအရီုဗၚ်အဳရာန် ညးဟွံမွဲကဵုဒုဟ်ဒဏ် ဒးချိုတ်အာလဝ် ဗွဲမဂၠိုၚ်ဂှ်တုဲ ဒဒှ်ရညးတံ ဒစဵုဒစးသ္ကာတ်တ်မြဟ်ဟ်ဂှ် စွံကၠေံဝန်ဇၞော်အပ္ဍဲဍုၚ်သဳရဳယျာ သ္ကဲညးတုဲ ဝန်ဇၞော်ကာဍုၚ်သ္အာၚ် ဖိုၚ်သဝ်မက်ခဒက် ဟီုလဝ်ရ။
အမာတ်ကလုတ်အဳရာန် စပ်ကဵုဍုၚ်သဳရဳယျာဂှ် ဟိုတ်နူပရေၚ်ဗ္တိုက်တရဴကျာတုဲ စမြိုၚ်ဝန်ကဵုအရီုဗၚ် အပ္ဍဲရုၚ်ကလုတ်ဂှ် လီုအာလဝ်တုဲ ပ္ဍဲကဵုစမြိုၚ်ဏံ လ္တူအိုတ်ၜါထပ်ဂှ်ဝွံ ဒှ်ထပ်မၞိဟ်မံၚ်ရောၚ်ဂှ် သ္ဂးလဝ်ရ။
သ္ကိုပ်ဒပ် ဂကောံရပ်လွဟ်လ္ပာ်ဒပ်ပၞာန် ကေုာံ ထံၚ်ပရိုၚ် ဍုၚ်သ္အာၚ် Quds Force မိုဝ်ဟာမက်ရဳဇြာ ဇြာဟဳဒဳ မပါလုပ် ညးကဵုကသပ်ပရေၚ်ပၞာန်အဳရာန် ၇ တၠ ချိုတ်အာလဝ်ရောၚ် ဒပ်ပၠန်ဂတး အေဿလာမ္မေတ် အဳရာန် ထ္မံက်ထ္ၜးလဝ် တၚ်လလောၚ်တြးမွဲရ။
အေဿရေ စွံပွန်ဗ္တိုက်ဒၟံၚ် အရာအဳရာန် ဗ္ဂပ်စုတ်လဝ် စပ်ကဵုပရေၚ်ပၞာန် ပ္ဍဲသဳရဳယျာ ကေုာံ ဂကောံဒပ်ညးစၞးအဳရာန် လအ်ဒၟံၚ်ယျတုဲ ပရေၚ်ဗ္တိုက်တရဴကျာ ပ္ဍဲဂိတုဨပရဴ ၁ ဂှ်ဝွံ ဒှ်ပရေၚ်ဗ္တိုက် အပ္ဍဲရုၚ်ကလုတ် အလန်ကိုပ်ကၠာအိုတ်ဂှ် ဂွံတီကေတ်ရ။
ညံၚ်ရဴပေါဲပၞာန်ဟာမာသ်ကီု ပြဟ်ဟ်ဏံ အေဿရေ သၠုၚ်ပ္တိုန်အသိၚ် ဗ္တိုက်ဒၟံၚ်ဂကောံဒပ်ညးစၞးအဳရာန်တံရ။
ဒပ်ပၞာန်အေဿရဂှ်ေ စပ်ကဵုပရေၚ်ပၞာန် မကၠောန်သ္ပလဝ် ပ္ဍဲသဳရဳယျာဂှ်တုဲ ဂွံဟီုပ္တိတ်အောန်တုဲ ပရေၚ်ဗ္တိုက်တရဴကျာ မက္တဵုဒှ်လဝ် ပ္ဍဲဂိတုဨပရဴ ၁ ဂှ်လေဝ် ဒပ်ပၞာန်အေဿရေ သဳကၠဳအာ ကုပရိုၚ် နူကဵုမဳဒဳယျာဍုၚ်သအာၚ်တံ ထ္မံက်ထ္ၜးလဝ်တံဂှ် ဟွံသေၚ်ပုဟ်ဂှ် ခၠေဝ်ပလန်လဝ်ရ။
ဟိုတ်နူပရေၚ်ဗ္တိုက်တရဴကျာဏံတုဲ သ္ကိုပ်ဒပ်အဳရာန် ကဆံၚ်လ္တူတံ မပါလုပ် ညးမၞုံဒၟံၚ်အပ္ဍဲစမြိုၚ်သီုဖအိုတ် ဒးချိုတ်အာလဝ်ရောၚ် ထ္မံက်ထ္ၜးလဝ် ပ္ဍဲကဵုမဳဒဳယျာသ္ကုတ်ဗၟံက်လဒေါဝ်တံရ။
Ref: Reuters