ဘာပန်၊ ဨပရဴ ၃
အပ္ဍဲပေါဲဗ္တိုက်ဍုၚ်ဘာပန် တွဵုရးကရေၚ်ဂှ် ဒပ်ကံၚ်ဇြဳပၞာန် စွံပွန်ဗ္တိုက်ဒၟံၚ် ဒၞါဲညးပါဲဒဴဘဲပၞာန်တံကဵု စမြိုၚ်သာသနာလ္တူဍုၚ်တံဂှ်တုဲ ညးဍုၚ်ကွာန်ပါဲဒဴဘဲပၞာန်ဗွဲမဂၠိုၚ်ဂၠေၚ်ဝွံ ထောံလသာဍုၚ်တုဲ ဒးဂြိပ်ဒဴပါဲဒလေတ်ဒၟံၚ် ဒၞါဲတၞဟ်ဟ်တံရောၚ်ဂှ် ပရိုၚ်တမ်ရိုဟ်ဒေသတံ ဟီုရ။
စနူဂိတုမာတ် ၁၉ တေံတုဲ လ္တူဍုၚ်ဘာပန်ဂှ် ဒပ်ပံၚ်ကောံပၠန်ဂတး ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA တံ ကၟာတ်ဗိုၚ်လဝ် ဗ္ဒိုပ်ဒပ်ကံၚ်ဇြဳပၞာန် လ္တူဍုၚ်ဘာပန် သီုဖအိုတ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အပ္ဍဲပေါဲဗ္တိုက်ပရေၚ်ပၞာန်ၜါလ္ပာ်ဂှ် ဒပ်ပံၚ်ကောံ ဒပ်မဟာ ၅ KNLA တံ ဗ္တိုက်သီဂွံလဝ် ဒပ်ကံၚ်ဇြဳပၞာန် ခလရ ၁၉ ကဵု တမ်ဒပ်လွဟ်လက်နက်ပၞာန် ၆၄၂ တံဂှ်တုဲ ဒပ်ကံၚ်ဇြဳပၞာန်လေဝ် ကၠောန်သ္ပလဝ် ပရေၚ်ဗ္တိုက်တရဴကျာ လ္တူဍုၚ်ဘာပန် ဗွဲမသ္ကာတ်မြဟ်ရ။
အပ္ဍဲပရေၚ်ဗ္တိုက် ဒပ်ကံၚ်ဇြဳပၞာန် ထောံမခတိုဟ် နကဵုက္ၜၚ်ကျာ ပ္ဍဲဂိတုမာတ် ၃၁ ဂှ် သီုကဵုသၚ်မွဲဇကု လ္တူဍုၚ်ဘာပန်ဂှ် မပါလုပ် ကောန်အရာပ် ၆ တၠ ချိုတ်အာလဝ်တုဲ ၁၅ တၠ ကလိဂွံလဝ်ဝပ်တုဲ ကုညးကလိဂွံဝပ်ဇီုကပိုက်တံဂှ် ရေၚ်တၠုၚ်မၚ်မွဲရီုဗၚ် လွဳလွတ်ကဵုလဝ် အရာမနွံပၟိက်တံဏောၚ်ဂှ် ဂကောံ Free Burma Ranger လလောၚ်ပ္တိတ်လဝ်ပရိုၚ်ရ။
အတိုၚ်ဂလာန် ပရိုၚ်တမ်ရိုဟ် ညးဒေသဘာပန်တံဂှ်မ္ဂး ဒပ်ကံၚ်ဇြဳပၞာန် ထောံမခတိုဟ်ဗ္တိုက်လဝ် ဘာလကျာ် (မြို့မရွှေကျောင်း) လ္တူဍုၚ်ဘာပန် ဒၞါဲညးပါဲဒဴဘဲပၞာန်တံ ဇူဒီုဒၟံၚ်တံဂှ်တုဲ ဟိုတ်နူပရေၚ်ထောံမခတိုဟ်ဂှ်တုဲ ညးဍုၚ်ကွာန်ပါဲဒဴဘဲပၞာန် ဇူဒီုဒၟံၚ် အပ္ဍဲအရှာံဘာ ၈ တၠ ချိုတ်အာလဝ်ဂှ် ဂွံတီကေတ်ရ။
ကြဴနူဒးဒုၚ်ထောံမခတိုဟ်တုဲဂှ် ညးဍုၚ်ကွာန်ပါဲဒဴဘဲပၞာန်ဂမၠိုၚ်ဝွံ နူကဵုဘာလကျာ်ဂှ် ဆုဲပြံၚ်အာ လ္ပာ်ဒၞါဲဗၠးဘဲတၞဟ်ဟ်တံဂှ် ပရိုၚ်တမ်ရိုဟ်တံ ဟီုရ။
လ္တူဍုၚ်ဘာပန်ဂှ် ဒပ်ကံၚ်ဇြဳပၞာန် ဟိုတ်နူစွံပွန်ဗ္တိုက်ဒၟံၚ် လ္တူညးဍုၚ်ကွာန်ကောန်အရာပ်တံဂှ်တုဲ ညးဒေသပါဲဒဴဘဲပၞာန် ၁၀၀၀ ပြၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် လ္ပာ်ဒပ်မဟာ ၅ လလောၚ်ပ္တိတ်ကဵုလဝ်သမ္တီရ။
သ္အာၚ်နူဂှ်ပၠန် လ္ပာ်ဍုၚ်ကမမံၚ်၊ ခရိုၚ်ဘာပန်ဂှ်လေဝ် ညးဍုၚ်ကွာန်ပါဲဒဴဘဲပၞာန် ဗ္ဒါဲ ၂၀၀ ဂြိပ်စိုပ်ကၠုၚ်တုဲ ညးဍုၚ်ကွာန်ပါဲဒဴဘဲပၞာန်ဂမၠိုၚ်ဝွံ နွံပၟိက်ဒၟံၚ်ကဵု အရီုဗၚ်တုဲ ညးရီုဗၚ်ဟံၚ်ပြာ်ဒၟံၚ်တံဂှ်လေဝ် ကၠောန်သ္ပဘိုၚ်ရီုဗၚ်ကဵုဒၟံၚ်ရောၚ် ဂွံတီကေတ်ရ။
ပ္ဍဲဘာပန် ဟိုတ်နူပရေၚ်ပန်ပှော်ဗ္တိုက် ဒပ်ကံၚ်ဇြဳပၞာန်တုဲ သွက်ညးဍုၚ်ကွာန်ပါဲဒဴဘဲပၞာန်တံဂှ် နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ် မပ္တံကဵု ဇွောံမစၞစ၊ ဂဥုဲဇဗ၊ ဒၞါဲမံၚ်တံရောၚ်ဂှ် ညးမၞုံအခေါၚ်ဟီုဂး ဒပ်မဟာ ၅ သ္ဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ