ဇြပ်ဗု၊ ဨပရဴ ၃
ပရေၚ်ပါ်ပါဲဂမၠိုၚ် နွံဒၟံၚ် ဗွဲမဂၠိုၚ်ဂၠေၚ်ကီုလေဝ် ကံၚ်ဇြဳပၞာန်ဝွံ တန်ဗ္တောန်ကွတ်ပၞာန် လၟေၚ် (၁) တွဵုရးဍုၚ်မန်ဂှ် စကဵုဒၟံၚ် ပ္ဍဲဘာပ္ကတ်ပ္ကေၚ်ဒပ်ပၞာန် ကဆံၚ်သၠုၚ် စၟတ် (၄) ယျဂှ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
တန်ဗ္တောန်ကွတ်ပၞာန် လၟေၚ် (၁) ဂှ် အတးလောန်မ္ဂး ကော်အာဏောၚ် လ္ပာ်ကံၚ်ဇြဳပၞာန် ဟီုဂးလဝ်ကီုလေဝ် နတဲဏံ ပ္ဍဲဂိတုဨပရဴ ၁ ဂှ် ကော်လဝ် ညးသၟတ်ဒးယိုက်ဂၠေၚ်လျိုၚ်ပၞာန်တံ ပြဟ်နူကဵု တ္ၚဲမစၟတ်လဝ်ဂှ်ရ။
အတိုၚ်သြၚ်လောန်တိုၚ်(မ်) ဂၠိုက်ဂၠါဲသၟာန်သၟုက်လဝ်ဂှ်မ္ဂး သွက်တန်ဗ္တောန်ကွတ်ပၞာန် လၟေၚ် (၁) ဂှ် ကော်လဝ် နူကဵု ၁၀ ပွိုၚ်ဍုၚ် တွဵုရးဍုၚ်မန်ဂှ် ဂွံတီကေတ်တုဲ ပ္ဍဲကဵုဏံ သွက်ဂွံယိုက်ဂၠေၚ်လျိုၚ်ပၞာန်ဂှ် နူပွိုၚ်ဍုၚ်ၜါသွာၚ် ကလိဂွံလဝ်လၟိဟ်မၞိဟ်ဂၠိုၚ်အိုတ်ရောၚ် ဂွံတီကေတ်ရ။
ဆ္ဂး လၟိဟ်ကဵုအာတန်ဗ္တောန် သွက်တန်ဗ္တောန်ကွတ်ပၞာန် လၟိဟ် (၁) ဂှ် ဟွံဂွံတီကေတ် ချိုတ်တ်ပၠိုတ်တ်ကီုလေဝ် အတိုၚ်ဗီုဓာတ်စၟတ်သမ္တီ ကံၚ်ဇြဳပၞာန် လလောၚ်ပ္တိတ်လဝ်ဂှ်မ္ဂး ဒုၚ်တၠုၚ်ဒၟံၚ် ညးသၟတ်ဂၠိုၚ်ကဵုကၠံ နကဵုအသေအဟာန် ပ္ဍဲကဵုဘာပ္ကတ်ပ္ကေၚ်ဒပ်ပၞာန် ကဆံၚ်သၠုၚ် စၟတ် (၄) ဂှ် ဂွံဆဵုကေတ်ရ။
ဗိုလ်ဇၞော် CDM လေန်ထက်အံၚ်ဂှ် ဂ္စါန်ကဵုဒၟံၚ်တန်ဗ္တောန်ပၞာန်ဂှ်ဝွံ ဗ္တောန်ကဵုကွတ်ပၞာန် အပ္ဍဲအခိၚ်ဍန်န်တုဲ ဒှ်သဘဴကဵုဗ္တိုက်ပၞာန်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အဓိကဂှ်တှ်ေ ပ္ဍဲဒပ်ပၞာန်ဂှ် ဇြဟတ်ပရေၚ်ဗ္တိုက် အောန်ဒၟံၚ်ယျ။ တုဲပၠန် ဇြဟတ်ဒပ်ပၞာန်ဝွံ ပ္ကောံပ္ကေဝ်ဟွံဂွံကွေံကွေံရပုဟ်။ ဗီုပြၚ်ဒက်ပ္တန်ဒပ်ပၞာန်ဂှ် လီုအာကွေံကွေံယျဂှ် ပိုယ်တံ ဟီုဂွံရ။ ကဵုတန်ဗ္တောန်ပၞာန် ၜိုတ်မွဲၜါဂိတုဏောၚ်။ တုဲတှ်ေ ဗလးဏာမုက်ပၞာန်ဏောၚ်။ တုဲတှ်ေ ကဵုဗ္တိုက်ဏောၚ်” သာ်ဝွံ သ္ဂးရ။
ညးသၟတ်ဒးဒုၚ်ဗလးဏာ သွက်တန်ဗ္တောန်ပၞာန် လၟေၚ် (၁) ဂှ် နူကဵုအရာပ်၊ ကွာန် မဆေၚ်စပ်တံ မွဲဂိတုမ္ဂး ဗွဲတွဵုမအောန် နူ ၁၀ ကိုဋ် စဵုကဵု ၁၅ ကိုဋ် ဒးထံက်ပၚ်ကဵုဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
အတိုၚ်ဂလာန် ညးဒေသတံဂှ်မ္ဂး ညးပါလုပ် ပ္ဍဲတန်ဗ္တောန်ပၞာန် လၟေၚ် (၁) ကံၚ်ဇြဳပၞာန် ကော်ကေတ်ဒၟံၚ်ဂှ်ဝွံ သၟာကမၠောန်ဆုဲပြံၚ်တံကဵု ရဲနူကဵုသ္ၚိကၟိန်ဒိုက်ဝါတ်တံ ပါလုပ်ဒၟံၚ်ဂၠိုၚ်အိုတ်ရောၚ် ဂွံတီကေတ်ရ။
သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် ကၠောန်သ္ပဒၟံၚ် တန်ဗ္တောန်ကွတ်ပၞာန် ဗွဲမပြဟ်ဂှ်ဝွံ သွက်ဂွံဗပေၚ်ဇြဟတ် ပ္ဍဲကဵုဗလးမုက်ပၞာန်တံကီုလေဝ် ဒးဒုၚ်ပ္ကောံ အတေၚ်အဓမ္မကီု၊ ဟိုတ်နူတၚ်ဆဵုဂဗ ကွတ်ပၞာန်သ္ဇိုၚ် ဍိုန်လျတုဲ ဍာ်ဇမၠိၚ် သွက်ကံၚ်ဇြဳပၞာန် အရာမဆောံလေၚ်တံ ဒှ်ကၠုၚ်မာန်ရောၚ် သ္ၚဳဂၠိပ်လဝ်ရ။
“ဟိုတ်ဂွံကၠောန်တိုန်ကၠုၚ် ပြဟ်ဟ်ဂှ်လေဝ် မၞိဟ်တံဏံ ဂွံစိုပ်မုက်ပၞာန် ပြဟ်ဟ်ဂှ် ဒှ်ဒၟံၚ်အဓိက။ သွက်ဂွံဗပေၚ်ဇြဟတ်ရဏောၚ်။ ဆ္ဂး ညအ်ဂှ်လေဝ် ကွတ်ပညာပၞာန် ဇြဟတ်ဍိုန်လျဂှ်ကီု၊ တၚ်ဆဵုဂဗ ဇြဟတ်ဍိုန်လျကီု၊ စိုတ်မိက်ဂွံကၠောန်ၜိုတ် ဟွံမွဲတုဲ ဒးဒုၚ်ကော်ပၠောပ်ပ္ဍဲဒပ် အတေၚ်အဓမ္မကီု၊ အရာတံဏံဂှ် ဍာ်ဇမၠိၚ် သွက်ကံၚ်ဇြဳပၞာန် ကျဗြံကၠုၚ် ဒှ်မာန်ဏောၚ်။ ဟွံကဵုဖဵုပုဟ်။ စိုပ်အာအကာဲအရာတံဏံဏောၚ်ဂှ် ထေၚ်ကေတ်ရ” သာ်ဝွံ သ္ဂးရ။
ကံၚ်ဇြဳပၞာန်ဂှ် ပ္ဍဲတွဵုရးဍုၚ်မန် အရာပ်အပံၚ် ၁၀၀၊ ဂကောံကွာန် ၃၆၈ နွံတုဲ မွဲမွဲလၟေၚ် တန်ဗ္တောန်ပၞာန်ဂှ် ကော်အာ ညးသၟတ်တံ အောန်အိုတ် ၅၀၀ ဏောၚ်ဂှ် ဟီုလဝ်ရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်တုဲ ညးသၟတ်အပ္ဍဲဒေသတံဝွံ တိတ်အာဍုၚ်မ္ၚး နကဵုဇြဟတ်လၟိဟ်ဗွဲမဂၠိုၚ်ဂၠေၚ်တံ၊ လုပ်စိုပ်အာ ပ္ဍဲဒပ်ပၠန်ဂတးတံ နွံဒၟံၚ်ရ။
အတိုၚ်တၚ်လလောၚ်တြး ကံၚ်ဇြဳပၞာန်ဂှ်မ္ဂး တန်ဗ္တောန်ကွတ်ပၞာန် လၟေၚ် (၁) ဂှ် နေဗျဳဒဝ်၊ လ္ဂုၚ်၊ မာန္တလေဝ် မပါလုပ် ပ္ဍဲကဵုရးဒေသ ကေုာံ တွဵုရး ၉ ပ္ဍဲဘာတန်ဗ္တောန် ၁၃ ဘာဂှ် စကဵုဒၟံၚ်တန်ဗ္တောန်ပၞာန်ယျဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−ချာန်နေဝ်တြးဝါဒကံၚ်ဇြဳပၞာန်