ပရေင်ကြံင်မ္ၚိုဟ်ၜါဍုၚ် ဂွံဒေါအ်ဒေၚ်ဂှ် က္ဍိုပ်သ္ကိုပ်အမေရိကာန် ကေုာံ ကြုက်တံ သဳကၠဳ

ဝါယှေန်တာန်၊ ဨပရဴ ၄

ပရေၚ်ကြံၚ်မ္ၚိုဟ် သၠုၚ်တိုန်ကၠုၚ်ဒၟံၚ် ညံၚ်ဂွံဒေါအ်ဒေၚ်အာဂှ် သမ္မတအမေရိကာန် ဂျဵုဗိုၚ်ဒေန် ကေုာံ သမ္မတကြုက် ယှဳကျေန်ဖျေန်တံဝွံ ကြဴနူဆဵုဂဗ ပ္ဍဲဂိတုနဝ်ဝေမ်ဗာတေံတုဲဂှ် နဒဒှ်အလန်ကိုပ်ကၠာအိုတ် ပ္ဍဲဂိတုဨပရဴ ၂ တေံ သဳကၠဳလဝ်ဂှ် ဂွံတီကေတ်ရ။

သဳကၠဳလဝ် ကၠာပေါဲယဵုသစ္စာ သမ္မတထိုၚ်ဝါန် ပ္ဍဲဂိတုမေတေံဂှ်တုဲ ထပ်သ္ပဒတန်အာ ဒဒှ်ရဗိုၚ်ဒေန် ထံက်ဂလာန် ကုမူဝါဒ ကြုက်မွဲဍုၚ်ဂှ်ဏောၚ်တုဲ မွဲဒမြိပ်ကလိုဟ်ၜဳထိုၚ်ဝါန် ပရေၚ်ၜိုဟ်လလမ် ကေုာံ ပရေၚ်ညိၚ်ဝတ် ပၟိက်ဇၞော်ဂှ် ထပ်ဟီုအာဏောၚ် ကၠာသမ္မတၜါတၠ ဂွိုအ်ဆက်စၠောံကဵုဖုၚ်ဏီဂှ် သၞာဲဒဴအလဵုအသဳကဆံၚ်သၠုၚ်မွဲတၠ ဟီုရ။

ဗိုၚ်ဒေန် ကေုာံ ယှဳတံဝွံ သွက်ဂွံကလေၚ်ဆက်စၠောံ လ္ပာ်ပရေၚ်ပၞာန် ၜါဍုၚ်ဂှ်ကီု၊ သွက်ဂွံပံၚ်တောဲရေၚ်တၠုၚ်အာ ပရေၚ်တာဒၞါ ဂဥုဲၜူမာဲ ဖာန်တနာၚ်ဂှ် ပ္ဍဲဂိတုနဝ်ဝေမ်ဗာတေံ တုပ်လဝ်စိုတ်ရ။

ဆ္ဂး က္ဍိုပ်သ္ကိုပ်ၜါတၠဝွံ ကြဴနူသၞာံ ၂၀၂၂ ဂိတုဂျူလာၚ်တုဲ ဆက်စၠောံသဳကၠဳလဝ် ကုဖုၚ် ဟွံမွဲရပုဟ်ဂှ် ဂွံတီကေတ်ရ။

ကြဴနူဆဵုဂဗသဳကၠဳ ပ္ဍဲဂိတုနဝ်ဝေမ်ဗာတုဲ ဗိုၚ်ဒေန်ဂှ် ယှဳကျေန်ဖျေန်ဝွံ တၠအဝဵုပၞာန်မွဲဏောၚ် ဟွံပြံၚ်လှာဲ လညာတ်ညးပုဟ် ဟီုလဝ်ဂှ်ရ သ္ကဵုဗဒှ်လဝ်ကြုက် ဒုၚ်ဒဝ်ဟွံမာန်ဂှ် ဂွံတီကေတ်ရ။

တ္ကအ်ထိုၚ်ဝါန် အုပ်ဓုပ်ဒၟံၚ် နကဵုသၞောတ်ဒဳမဝ်ကရေဇြဳဂှ် ကြုက် ညာတ်လဝ် နဒဒှ်တိဍာ်ညးတံ မွဲဒကုတ်မွဲဒကဴဏောၚ်တုဲ ခြာဟွံလအ်တေံ ပြံၚ်လှာဲကၠုၚ်လဝ် ရမျာၚ်ကလေၚ်ပံၚ်ကောံ ဗွဲမၜိုဟ်လလမ်ရောၚ် သ္ဂးရ။

ကြုက် ဟီုဂးဒၟံၚ် ဒဒှ်ရအဝဵုအပိုၚ်အခြာတန် လ္တူညးတံဂှ်လေဝ် ထိုၚ်ဝါန် တးပါဲလဝ်တုဲ အနာဂတ်ညးတံဂှ် ညးဍုၚ်ကွာန်ထိုၚ်ဝါန်တံရ သ္ဂုတ်သွာတ်အာဏောၚ်ဂှ် ခၠေဝ်ပလန်လဝ်ရ။

သမ္မတထိုၚ်ဝါန် လိုၚ်ချေန်တဳ လ္ပာ်ကြုက်တံ ညာတ်လဝ် နဒဒှ်သၟာပါ်တိတ်ဂှ်ဝွံ ပ္ဍဲဂိတုဂျာန္နဝါရဳဂှ် ဂွံဇၞးလဝ်ပေါဲရုဲမာဲသမ္မတတုဲ ကၠာပေါဲယဵုသစ္စာ အပ္ဍဲဂိတုမေကၠုၚ်စိုပ်ဏံဂှ် ကြုက်ကဵုဒၟံၚ်ဇြဟတ်ဂရိုဟ် ထိုၚ်ဝါန်ရောၚ် ဂွံတီကေတ်ရ။

ပ္ဍဲပေါဲသဳကၠဳ ဂိတုဨပရဴ ၂ ဂှ် ဗိုၚ်ဒေန်ဂှ် စပ်ကဵုဒ္ဂေတ်ပရေၚ်ပိုန်ဒြပ်ကြုက် ကေုာံ ပရေၚ်ထံက်ဂလာန်ကြုက် လ္တူရုယှာ ၜက်ၜေတ် ယူကရုၚ်ဂှ်ကီု၊ ပရေၚ်ဖံက်ပ္ကဝ်အခေါၚ်အရာမၞိဟ် ပ္ဍဲဒေသသေန်ကျာန်တံဂှ်တုဲ ဒဒှ်ရဒှ်ဓဝိၚ်ဂှ် ဟီုလဝ်တုဲ သဳကၠဳလဝ် သီုကဵုပရေၚ်သ္ဂောံပလှ်သီလွဟ်လက်နက်နျူ ပ္ဍဲတ္ကအ်ကိုဝ်ရဳယျာဂှ် သၞာဲဒဴအမေရိကာန်မွဲတၠ ဟီုရ။

သ္အာၚ်နူဂှ်ပၠန် ပ္ဍဲၜဳကြုက်သၠုၚ်ကျာ ကြုက် ဒစဵုဒစးသၞောဝ်ဍုၚ်သ္အာၚ်တုဲ ဟီုလဝ်ညးတံပိုၚ်ပြဳ အလုံဒေသမွဲဂှ် ပရေၚ်ကြံၚ်မ္ၚိုဟ် သၠုၚ်တိုန်ဒၟံၚ်ဂှ်လေဝ် ဗိုၚ်ဒေန် ဂွံကဵုလဝ်သတိရောၚ် သ္ၚဳဂၠိပ်ဒၟံၚ်တံ နွံဒၟံၚ်ရ။

Ref: Agencies