ၜဳကလေၚ်၊ ဨပရဴ ၆
တွဵုရးဍုၚ်မန် ပွိုၚ်ဍုၚ်ၜဳကလေၚ် ကွာန်ယှိုဲယံၚ်ပျ လ္တူဂၠံၚ်ကွဳစက် လ္ဂုၚ်−မတ်မလီုဂှ် ယာန်ကွဳစက်ညးအာတရဴမွဲဖ္ဍိုက် ဒးဒုၚ်ဗ္တိုဟ်မာၚ် ပန်ပှော်တုဲ ညးဗက်လက္ကရဴယာန်မွဲတၠ ချိုတ်အာတုဲ သီုညးဒဳယာန် မပါလုပ် ပန်တၠ ကလိဂွံလဝ်ဝပ်ဂှ် ညးဒေသတံ ဟီုရ။
တုဲကၠုၚ် ဂိတုဨပရဴ ၄ အခိၚ်ဗ္တံ ၜိုတ် ၉ နာဍဳ ယာန်ညးအာတရဴ “အောၚ်ကျော်မိုး” နူမတ်မလီု ဒဳကၠုၚ် လ္ပာ်လ္ဂုၚ်ဂှ်ဝွံ စိုပ်အကြာဂၠံၚ်ကွဳစက် တိုၚ်သမ္တီမိုၚ် ၁၃၁/၁ ကဵု ၁၃၁/၂ ဂှ် ဒးဒုၚ်ဗ္တိုဟ်မာၚ် ပန်ပှော်လဝ်ရ။
ယာန်ညးအာတရဴ ဒးဒုၚ်ဗ္တိုဟ်မာၚ် ဗ္တိုက်လဝ်တုဲ ညးဗက်လက္ကရဴယာန် ကိုဝ်ဇြေန်ကိုဝ်လက်ဝွံ ပ္ဍဲကအ် မကမ်ဖံက်လုပ် ကလိဂွံလဝ်ဝပ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်တုဲ သီုညးဒဳယာန်မွဲတၠ မပါလုပ် မၞိဟ်တြုံပိတၠကဵု မၞိဟ်ဗြဴမွဲတၠ ဇီုကပိုက်ကလိဂွံလဝ်ဝပ်ဂှ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး ယာန်ညးအာတရဴ “အောၚ်ကျော်မိုး” ဝွံ ဒးဒုၚ်ဗ္တိုဟ်မာၚ် ကၠာအိုတ်တုဲ ထပ်ဒးဒုၚ်ပန်ဒၟံၚ် သီုလွဟ်ဍောတ်တံဂှ်ရ ညးဍုၚ်ကွာန်အာတရဴတံ ဇီုကပိုက်ချိုတ်အာတံ က္တဵုဒှ်လဝ်ရ။
ယာန်ညးအာတရဴ “အောၚ်ကျော်မိုး” ညးအာတရဴ ၄၅ တၠ ပါဗက်ကၠုၚ်ဂှ်ဝွံ ဒးဒုၚ်ဗ္တိုဟ်မာၚ် ပန်ပှော်လဝ်တုဲ ဒ္ၚေါဝ်ကွဳစက် လီုလာ်အာလဝ်တုဲ ပ္ဍဲကဵုကွဳစက်ဂှ်လေဝ် ဒးအာကဝေက်မခတိုဟ် အရာမလီုလာ်တံ က္တဵုဒှ်လဝ်ရ။
ယာန်ညးအာတရဴ ဒးဒုၚ်ဗ္တိုဟ်မာၚ် ပန်ပှော်လဝ်တုဲ ညးဇီုကပိုက်ချိုတ်အာတံဂှ် ကြဴနူပလံၚ်ဗစိုပ် ရုၚ်ဂဥုဲညးဍုၚ်ကွာန်ခရိုၚ်သဓီုကဵု (သိမ်ဆိပ်)တုဲ ဆက်တိတ်အာတရဴ လ္ပာ်လ္ဂုၚ် ကရောံညးအာတရဴသှ်ေတံဂှ် ဂွံတီကေတ်ရ။
စပ်ကဵုလၟေၚ်ဒဒှ်ယာန်ညးအာတရဴ ဒးဒုၚ်ဗ္တိုဟ်မာၚ် ပန်ပှော်ဂှ်တုဲ ဒဵုကဵုအခိၚ်လၟုဟ် ကံၚ်ဇြဳပၞာန်သၟးဟွံက ဒပ်ပံၚ်ကောံဇြဟတ်ပၠန်ဂတးတံလေဝ် လလောၚ်ပ္တိတ်လဝ်ပရိုၚ်ဂှ် ဟွံဂွံဆဵုကေတ်ဏီရ။
တုဲကၠုၚ် ပ္ဍဲဂိတုမာတ် ၂၇ တေံဂှ်လေဝ် လ္တူဂၠံၚ်ကွဳစက်လ္ဂုၚ်−မတ်မလီု ကွာန်(ကမာစိုၚ်) ပယျဵုပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်သဓီုဂှ် ကွဳစက်ဂကောံပရဟိတ (အကြၚ်နာတွဲလက်) ဒးဒုၚ်ပန်ပှော်တုဲ ညးဒဳယာန်ကဵု ညးမဒှ်မၞိဟ်ယဲတံ ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram