ဘာပန်၊ ဨပရဴ ၆
တွဵုရးကရေၚ် သၠုၚ်ကျာဍုၚ်ဘာပန် ညံၚ်ကုန်ဗ္ဒိုပ်ဗျူဟာ ကေုာံ တမ်ဒပ်ပိဒပ် ဂကောံဇြဟတ်ပၠန်ဂတးတံ မဗိုၚ်ကၟာတ်လဒဵုလဝ်တံ ဂွိုအ်စှ်ေအာဂှ် ဒပ်ကံၚ်ဇြဳပၞာန် ပန်ပှော်ဒၟံၚ်ပၞာန်ကျာ အရိုဟ်ဒဒှ်တ္ၚဲရောၚ် ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော် သဝ်ကလေဝ်ဒိုဝ် ဟီုရ။
တမ်ဒပ်လွဟ်လက်နက် ၆၄၂ ကေုာံ တမ်ဒပ်ခလရ ၁၉ သၟဝ်တဲကံၚ်ဇြဳပၞာန် မၞုံဗ္ဒါဲဍုၚ်ဘာပန်တံဂှ် စနူဂိတုမာတ် တုဲကၠုၚ်တေံတုဲ ဒပ်ပံၚ်ကောံ ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA သ္ကိုပ်သ္ကတံ ဗ္တိုက်သီဂွံလဝ်ရ။
အခိၚ်လၟုဟ် ဒပ်ပံၚ်ကောံ ဒပ်မဟာ ၅ KNLA တံ ဆက်ဗိုၚ်ကၟာတ်လဒဵုလဝ် ကုန်ဗျူဟာ ကေုာံ တမ်ဒပ်ကံၚ်ဇြဳပၞာန် ခမရ ၄၃၄၊ ခမရ ၃၄၀၊ ခမရ ၃၄၁ သၠုၚ်ကျာဍုၚ်ဘာပန် မသှ်ေဒၟံၚ်တံဂှ်ရ။
လ္ပာ်ကံၚ်ဇြဳပၞာန်ဂှ် ညံၚ်ဗျူဟာ ကေုာံ ဌာန်ဂအုပ်တမ်ဒပ် သှ်ေဒၟံၚ်တံ ဂွိုအ်စှ်ေအာဂှ် လၟေၚ်ဒဒှ်တ္ၚဲ ကၠုၚ်စိုပ်ဘိုၚ်ပန်ဒၟံၚ်ကဵု က္ၜၚ်ကျာရောၚ် ဒုသ္ကိုပ်ဗိုလ်ဇၞော် သဝ်ကလေဝ်ဒိုဝ် သ္ဂးရ။
စနူဂိတုဨပရဴ ၁ တုဲကၠုၚ်တေံတုဲ ဒပ်ကံၚ်ဇြဳပၞာန် သုၚ်စောဲက္ၜၚ်ကျာဗ္တိုက်တံကဵု ဒရုၚ်တံဂှ်တုဲ ထောံဖျေံမခတိုဟ် ဗ္တိုက်ဒၟံၚ် ပ္ဍဲကွာန် နူကဵုခရိုၚ်ဘာပန် သီုကဵုမခတိုဟ်ကလက်သတာ လျိုၚ်ပံၚ် ၅၀၀ နွံတံဂှ် မပါလုပ် မခတိုဟ်တၞဟ်ဟ်ဗွဲမဂၠိုၚ်ဂှ်တုဲ သ္ၚိဒၟံၚ်ဗွဲမဂၠိုၚ်ဂၠေၚ် ဇီုကပိုက်လီုလာ်အာလဝ်ရောၚ် ဒပ်မဟာ ၅ လလောၚ်ပ္တိတ်လဝ်ရ။
သ္အာၚ်နူဂှ်ပၠန် ဟိုတ်နူပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တုဲ လ္တူဍုၚ်ဘာပန်ဂှ် စမြိုၚ်ဘာသာဂမၠိုၚ် မပ္တံကဵုဘာကျာ်ခရေတ်ယာန်၊ ဘာလကျာ် ကေုာံ သ္ၚိဒၟံၚ် ၆၀ မပြၚ် ဇီုကပိုက်လီုလာ်အာလဝ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
အပ္ဍဲပေါဲဗ္တိုက်ဍုၚ်ဘာပန်ဂှ် ဟိုတ်နူဒပ်ကံၚ်ဇြဳပၞာန် ထောံမခတိုဟ်ပန်ပှော်ဗ္တိုက်ဒၟံၚ်ဂှ်တုဲ သီုခမဳသၚ် ကေုာံ ညးမၞုံကဵုဒၟုၚ်ဒၠေၚ်တံ မပါလုပ် ကောန်အရာပ် ၉ တၠ ချိုတ်အာလဝ်တုဲ ဗ္ဒါဲ ၃၀ တၠ ကလိဂွံလဝ်ဝပ်တုဲ ညးဍုၚ်ကွာန်ကောန်အရာပ် ၁၆၀၀ ပြၚ် ဒးဂြိပ်ဒဴပါဲဒလေတ်ဒၟံၚ်ဒၞါဲဗၠးဘဲတံရ။
အပ္ဍဲပေါဲဗ္တိုက်သီဍုၚ်ဘာပန် စလဝ်နူဂိတုမာတ် တုဲကၠုၚ်တေံဂှ် ဒပ်ပံၚ်ကောံဇြဟတ်ပၠန်ဂတးတံ ဗ္တိုက်ထိၚ်ဂွံလဝ် ဍုၚ်ဘာပန်တုဲ ဆက်ကၟာတ်လဒဵုလဝ် ဌာန်ဂအုပ်တမ်ဒပ်ကံၚ်ဇြဳပၞာန် သှ်ေဒၟံၚ်ဗ္ဒါဲဍုၚ်တံဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ