ကျာ်မြဟ်၊ ဨပရဴ ၆
ပ္ဍဲကဵုကၟိန်ဍုၚ် ဌာန်ဒေသဗွဲလ္ၚဵုဂမၠိုၚ် ဝေၚ်မံၚ်ပေါဲဗ္တိုက်သီဍုၚ်သီကွာန် သီတိဍာ်ဂှ် ကိတ်ညဳကဵုအကာဲအရာဒှ်ကၠာကီုလေဝ် ဒၞါဲဒေသမန်ပိုယ်ဂှ် အကာဲအရာသ္ဂောံဝေၚ်ပၞာန် ကေတ်ဒၞါဲ အခိၚ်ဟွံစိုပ်ဏီရောၚ် ဗော်ဍုၚ်မန်တၟိ ဟီုရ။
စပ်ကဵုပေါဲဗ္တိုက်ဒေသၜဳဂြာၚ် ကေုာံ စပ်ကဵုပရေၚ်ဆောံလေၚ် ကွာန်ဓမ္မသ စလဝ်ကၞောတ်ဂိတုမာတ်တေံဂှ်တုဲ ကမ္မတဳရေၚ်တၠုၚ်ကေၚ်ကာဗဟဵု ဗော်ဍုၚ်မန်တၟိ လလောၚ်ပ္တိတ်ကၠုၚ်လစွံစိုတ် နကဵုစၟတ်တ္ၚဲ ဂိတုဨပရဴ ၅ ရ။
အတိုၚ်တၚ်လလောၚ်တြး ဗော်ဂှ်မ္ဂး ဒပ် KNU, PDF, MLA ကေုာံ ဗော်ဍုၚ်မန်တၟိ NMSP AD တံဝွံ ပ္ဍဲဂိတုမာတ် ၂၄ ဂှ် လုပ်စိုပ်ကေတ်လဝ်ဒၞါဲ အပ္ဍဲကွာန်မန်ဂမၠိုၚ် မပ္တံ ကွာန်ကျာ်ဇၞော်၊ ကွာန်ကအ်ဗိန်၊ ကွာန်ကအ်ပံက်၊ ကွာန်ဓမ္မသ ဒှ်တမ် ကွာန် ၈ ကွာန်ဂှ်တုဲ ပ္ဍဲဂိတုမာတ် ၂၅ ဂှ် လုပ်သီလဝ် ဗ္ဒိုပ်ဗၠာဲသၟိၚ်ကံၚ်ဇြဳပၞာန် ကွာန်ကအ်ဗိန်ရောၚ် ထ္မံက်ထ္ၜးလဝ်ရ။
ၜိုန်သီဗ္ဒိုပ်ဗၠာဲသၟိၚ်ကအ်ဗိန်တုဲကီုလေဝ် ပ္ဍဲကဵုကွာန်မန်ဗွဲမဂၠိုၚ်ဂှ် ဂကောံပံၚ်ကောံပၠန်ဂတးတံ လုပ်စိုပ်ကေတ်ဒၞါဲ ဖျေံလဝ်ဒပ်တုဲ ပန်လဝ်ကံၚ်ဇြဳပၞာန်တုဲ လ္ပာ်ကံၚ်ဇြဳပၞာန်တံ ကလေၚ်ပန်နၚ် နကဵု ဒပ်ဍာ်၊ ဒပ်ကျာ၊ ဒပ်အမၠံက်တံဂှ်တုဲ ပ္ဍဲဂိတုမာတ် ၂၇ ဂှ် ကွာန်ဓမ္မသ သ္ၚိတူအာ ၃၀၀ မပြၚ် ချိုတ် ဒးဝပ်တံလေဝ် နွံလဝ်ရောၚ် သ္ဂးရ။
ညးဍုၚ်ကွာန်ဗွဲမဂၠိုၚ် ထောံလသာသ္ၚိဌာန် ဒးပါဲဒဴဘဲပၞာန်တုဲ ဆောံလေၚ်ဒှ်ဒဒိုက် ဇၞော်ကဵုဇြဟတ်တုဲ ညံၚ်ပေါဲဗ္တိုက်ဂွံဒေါအ်ဒေၚ်အာဂှ် အယောၚ်အလာဟွံညာတ်မွဲသာ်ဏီရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး လစွံစိုတ် ဗော်ဍုၚ်မန်တၟိရ။
ဟိုတ်ဂှ်တုဲ အပ္ဍဲအနာဂတ်ဂတတေံမ္ဂး ပရေၚ်ဂီုကၠီုဍုၚ်ကွာန် ဌာန်ဒေသမန် ဂွံခိုဟ်၊ ပရေၚ်စဵုဒၞါမၚ်မွဲဂွံစိုပ်တရဴဂှ် နကဵုဗော်ဍုၚ်မန်တၟိ ကေတ်ဇြဟတ်ညးဍုၚ်ကွာန်တအ်တုဲ ပတိတ်အာလွဳရောၚ်ဂှ်ကီု၊ နကဵုညးဝေၚ်ပၞာန်တံ ထေက်ကဵုမ္ဒးဗ္စာရဏာ တၟော်တော်ဆ သ္ပဂရု ကုပရေၚ်လေၚ်ဒိုက် ညးဍုၚ်ကွာန်တအ်ကီုဂှ် သ္ဂးရ။
လၟေၚ်ဒဒှ်ဏံဝွံ ဟိုတ်နူလးလဝ်မုက်ပၞာန် ကေတ်ဒၞါဲပ္ဍဲကွာန်မန်ဂမၠိုၚ်၊ ကွာန်မန်တအ် ဒှ်အာဒၞါဲမုက်ပၞာန်အိုတ်ဂှ်ရ ဂကူမန်တအ် လေၚ်ဆောံအာဂၠိုၚ် ညာတ်ဂှ် ကမ္မတဳရေၚ်တၠုၚ်ကေၚ်ကာဗဟဵု ဗော်ဍုၚ်မန်တၟိ လလောၚ်ပ္တိတ်ကၠုၚ်ရ။
စပ်ကဵုတၚ်လလောၚ်တြးဏံတုဲ နူကဵုသြၚ်လောန်တိုၚ်(မ်) သၟာန်သၟုက်လဝ် ညးဒုၚ်တာလျိုၚ် လလောၚ်ပရိုၚ် ကေုာံ ညးမၞုံအခေါၚ်ဟီုဂး မပါလုပ်လဝ် ပ္ဍဲပေါဲဗ္တိုက်သီဗ္ဒိုပ်ဗၠာဲသၟိၚ်ကအ်ဗိန်တံ မပ္တံကဵုဗော်ဍုၚ်မန်တၟိ AD ၊ ဒပ်ပၞာန်ဗၠးၜးဍုၚ်မန် MLA ကေုာံ ကရောၚ်ပၞာန်သ္ပဝ်တံကီုလေဝ် ကလေၚ်သှ်ကဵုလဝ်ဂှ် ဟွံမွဲရ။
နာဲဗညာမန် ညးမၞုံအခေါၚ်ဟီုဂး NMSP-AD ပါ်တိတ်နူဗော်ဍုၚ်မန်တၟိဂှ် စပ်ကဵုတၚ်လလောၚ်တြးဗော်ဍုၚ်မန်တၟိတုဲ သၟာန်ဗော်ဍုၚ်မန်တၟိရဂှ် ကလေၚ်ကၠုၚ်ပရိုၚ် ကုသြၚ်လောန်တိုၚ်(မ်) ရ။
အခိၚ်ကာလလၟုဟ် ပဋိပက္ခရပ်လွဟ် ဒုၚ်သ္ဇိုၚ်ကဵု ပရေၚ်ဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ က္တဵုဒှ်ဒၟံၚ် အလုံဍုၚ်မွဲ ဗွဲမသ္ကာတ်မြဟ်တုဲ ညးပြိုၚ်ပ္ကာန်ပေါဲပၞာန်တအ် ညံၚ်ညးသ္ဂောံကလိဂွံပေါဲအံၚ်ဇၞး ချဳဒရာၚ် ဂိုတ်ဂ္စါန်မံၚ်သေဲသေဲအိုတ်ဂှ် နကဵုဗော်ဍုၚ်မန်တၟိ ကၠိုဟ်ကေတ်မာန်ဂှ် ဗော်ဍုၚ်မန်တၟိ သ္ဂးရ။
ဆ္ဂး လ္တူညးဝေၚ်ပၞာန်တအ် သၞညးညးဗ္တိုက်ဂှ် သွက်သ္ဂောံဟီုဂးဂလာန်တာဒၞါဟွံမွဲကီုလေဝ် တိဍာ်ပရေၚ်အုပ်ဓုပ် ဂကူညး ဗော်ညးဂှ် မ္ဒးသ္ပသမ္တီထေက်ရောၚ် ညာတ်ကေတ်တုဲ လးမုက်ပၞာန် ကေတ်ဒၞါဲပ္ဍဲကွာန်မန်ဂမၠိုၚ်တံဂှ် ထေက်ကဵုမ္ဒးဗ္စာရဏာ တၟော်တော်ဆဏောၚ်ဂှ် ဗော်ဍုၚ်မန်တၟိ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု− NMSP