မတ်မလီု၊ ဨပရဴ ၆
ဟိုတ်နူပေါဲဗ္တိုက် မက္တဵုဒှ်ဒၟံၚ် အပ္ဍဲပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ်တုဲ ညးဍုၚ်ကွာန်ပါဲဒဴဘဲပၞာန် ကၠုၚ်စိုပ်ပါဲဒလေတ် ဇရေၚ်ဍုၚ်မတ်မလီုတံ ဒးဂဗဒၟံၚ်ကဵု စၞစသုၚ် ဟွံရုမ်ဂပ်တံတုဲ အာတ်မိက်ဒၟံၚ် အရီုဗၚ်ဂမၠိုၚ်ရောၚ် ညးရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံ ဟီုရ။
ဟိုတ်နူပေါဲဗ္တိုက် စက္တဵုဒှ်လဝ် ပ္ဍဲဂိတုမာတ် ၂၄ တုဲကၠုၚ်တေံတုဲ ညးဍုၚ်ကွာန်ဒေသ နူကဵုကွာန်ကအ်ဗိန်၊ ကအ်ပံက်၊ ကျာ်ဇၞော်၊ ဓမ္မသ၊ သၚ်ကၠံ၊ ကြေဝ်ဏာ ကေုာံ ကအ်သိုခ်တံ မပါလုပ် ကွာန်ဗ္ဒါဲဗ္ဒါဲတံဂှ် ဂၠိုၚ်ကဵုလ္ၚီ ဒးပါဲဒဴဒၟံၚ်ဘဲပၞာန်ရ။
ပ္ဍဲကဵုဏံ ညးဍုၚ်ကွာန်ပါဲဒဴဘဲပၞာန် ၁၀၀၀ ပြၚ်ဝွံ ပါဲဒလေတ်ကၠုၚ်ဘဲပၞာန် ပ္ဍဲဘာလကျာ် ၂၁ ဘာ လ္တူဍုၚ်မတ်မလီုတံကဵု သ္ၚိမသကလောကောဒေံ မစုက်လုက်တံဂှ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန် တွဵုရးဍုၚ်မန်ရ။
ဘာလကျာ် ကေုာံ တၠဒါန်ဂမၠိုၚ် ကၠုၚ်စိုပ်ဗ္စဖျုၚ်ကဵုဒါန် ကုညးပါဲဒဴဘဲပၞာန်တံကီုလေဝ် လအ်ကၠုၚ်ညိညတုဲ တၚ်နွံပၟိက်စၞစသုၚ်တံ နွံကၠုၚ်ရ။
ညးရီုဗၚ်ပါဲဒဴဘဲပၞာန်မွဲတၠဂှ် ညးဍုၚ်ကွာန်ပါဲဒဴဘဲပၞာန် ထောံလသာသ္ၚိဌာန် ဒးပါဲကၠုၚ်ဘဲပၞာန်တံဂှ်ဝွံ ဟိုတ်နူအခက်အခုဲစၞစတုဲ အာတ်မိက်ကၠုၚ်အရီုဗၚ်တံ နွံကၠုၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဂွံစဴသ္ၚိဂှ်လေဝ် လၟုဟ်ဂှ် ဒှ်မံၚ်ပၞာန်တုဲ မၞိဟ်စဴဟွံဂွံဂှ်နွံ။ ညးတံ မိက်ဂွံစဴသ္ၚိအိုတ်ရ။ အတေံဂှ် ဂွံစဂွံသုၚ်ဂှ် ဝါတ်ညိဏောၚ်။ နူဏေံတေံ မွဲဒၞါဲ ၜိုတ် ၁၀၀ တၠ ညးတံဂွံစဂွံသုၚ် ဟွံမွဲတုဲ ဆက်ဖုၚ်ကဵုအဲ။ အဲဂှ်တှ်ေ ဒၞါဲနွံ ဂၠိုၚ်ဂှ် ကလေၚ်ပါ်ပရအ်ကဵု။ နူဂယးဏံ ဆက်ကၠုၚ်ဖုၚ် မွဲဒၞါဲပၠန်။ ဆက်ကၠုၚ်ဖုၚ်တုဲ ဂွံစသုၚ်အတေံဂှ် ညးတံ အာတ်ကၠုၚ်အရီုဗၚ်” သာ်ဝွံ သ္ဂးရ။
ညးဍုၚ်ကွာန်ပါဲဒဴဘဲပၞာန်တံဝွံ အခိၚ်လၟုဟ် စဴဌာန်ဒၟံၚ်ဟွံမာန်ဏီဂှ်တုဲ သ္ပပဓာန်ကဵု ညးတၠဒါန်တံတုဲ ဒးမံၚ်တန်တဴဒၟံၚ်အိုတ်ဂှ်ရ အခိၚ်ကာလပါဲဒဴဘဲပၞာန် ဂၠိၚ်သ္ၚောဲကၠုၚ်ဗက် တၚ်နွံပၟိက်စၞစသုၚ် ဒှ်ကၠုၚ်ပြသၞာဇၞော်ဇၞော်မာန်ဂှ် ညးဆက်ဟီုရ။
ညးတာလျိုၚ် ဂကောံရီုဗၚ်ဟံၚ်ပြာ်မှာဇန်မွဲတၠဂှ်လေဝ် ၜိုန်ရဍုန်တိုပ်ဗ္စဖျုၚ်ဒၟံၚ် ညးပါဲဒဴဘဲပၞာန်တံ ပ္ဍဲဘာလကျာ်တံကီုလေဝ် အရာမနွံပၟိက် ကုဇွောံမစၞစသုၚ်တံ က္တဵုဒှ်မံၚ်ရောၚ် ဟီုရ။
“ပြဟ်ဟ်ဏံ ဇွောံမစၞစဂှ်တှ်ေ သၞေဝ်ကေဝ်၊ ကဖျုန်တံ၊ တုဲတှ်ေ သ္ၚု၊ ကၠေၚ်၊ မတံဏံဂှ် ပြဟ်ဟ်ဏံ ဒှ်ကိစ္စဒးပသောၚ်ဒၟံၚ်ရ။ အခိၚ်လၟုဟ် ညအ်ဂှ် အဓိကရ။ ဘာလကျာ်တံဂှ်တှ်ေ ညးတံဍုန်ဗ္စကေတ်တ်ဏောၚ်။ ဍုန်တိုပ်တှ်ေ ပြဟ်ဟ်ဏံ နွံပၟိက် အရာတံဏံရ” သာ်ဝွံ သ္ဂးရ။
ညးပါဲဒဴဘဲပၞာန်ကျာ်မြဟ်ဂမၠိုၚ်ဝွံ ပါဲဒလေတ်ကၠုၚ် လ္ပာ်ပွိုၚ်ဍုၚ်မတ်မလီု၊ ၜါသွာၚ်၊ ပံၚ် ကေုာံ ပွိုၚ်ဍုၚ်ဘာအၚ် ဂၠိုၚ်အိုတ်တုဲ ညးတံဂှ်တှ်ေ ညးဍုၚ်ကွာန်ရေၚ်သ္ကအ် ရီုဗၚ်ထ္ၜလ္ဘာ်တံ နွံကီုလေဝ် ဍာ်ဇမၠိၚ်တှ်ေ သွက်ဇွောံမစၞစတံဂှ် ဒးဂဗကၠုၚ်အခက်အခုဲဇၞော်ဇၞော်မာန်ရောၚ် ညးမရီုဗၚ်ဒၟံၚ်ပရေၚ်ပါဲဒဴဘဲပၞာန်တံ သ္ဂးအိုတ်ရ။
ဒပ်ကံၚ်ဇြဳပၞာန် ဒးဒုၚ်သီလဝ် ဗ္ဒိုပ်ဗၠာဲသၟိၚ်ကအ်ဗိန်ဂှ်ဝွံ စနူဂိတုမာတ် ၂၇ တုဲကၠုၚ်တေံတုဲ ပေါဲဗ္တိုက်ဟွဲမွဲမွဲသာ် ဟိုတ်နူဗ္တိုက်လဝ် ကွာန်ဓမ္မသ နူကဵုဒပ်ဍာ်၊ ဒပ်ကျာ၊ ဒပ်တိုက်တံဂှ်တုဲ သ္ၚိဟွံအောန်နူကဵု ၄၀၀ မ ပၟတ်တူလီုလာ်အာလဝ်ရ။
အတိုၚ်တၚ်လလောၚ်တြး ကံၚ်ဇြဳဖေဝ်ဒရာဍုၚ်မန် MSFC ဂှ်မ္ဂး ဟိုတ်နူဒပ်ကံၚ်ဇြဳပၞာန် ပန်ပှော်ဗ္တိုက်တုဲ ညးဒေသ အပ္ဍဲဒေသၜဳဂြာၚ် ၆၀၀၀ ပြၚ်ဝွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ်ရ။
ပ္ဍဲဍုၚ်ဗၟာ ကြဴနူဒပ်ပၞာန်သီအဝဵုတုဲ ဟိုတ်နူပဋိပက္ခရပ်လွဟ် မက္တဵုဒှ်ကၠုၚ်ဒၟံၚ်တံဂှ်တုဲ အလုံဍုၚ်မွဲ ထောံလသာသ္ၚိဌာန်တုဲ ဒးဂြိပ်ဒဴပါဲဒလေတ်ဒၟံၚ် နွံကၠုၚ် စဵုကဵု ၂ ဒဿမ ၈ ပြကောဋိကိုဋ်ဂှ် ပ္ဍဲဂိတုဨပရဴ ၅ တေံ ရုၚ် UNOCHA လလောၚ်ပ္တိတ်ကၠုၚ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ