မတ်မလီု၊ ဨပရဴ ၇
ဂကောံသ္ကိုပ်ဗိုလ်ဇၞော် မျထောန်ဥူ ကၠုၚ်စိုပ်စၟဳတ် ကိုန်စဳမာန်သၞေဟ်က္ၜၚ်ကျာကဆံၚ်ဍုၚ်သ္အာၚ် မသိုၚ်ခၞံအာ ပ္ဍဲကွာန်ကအ်ပြာၚ် ပွိုၚ်ဍုၚ်မုဟ်ဍုၚ် ဗ္ဒါဲဍုၚ်မတ်မလီု တွဵုရးဍုၚ်မန်ဂှ် ဒးဒုၚ်ဗ္တိုက်လဝ်ကဵုဒရုၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဨပရဴ ၆ အခိၚ်နူဂယးဂှ် ဒုသ္ကိုပ်ဝန်ဇၞော် ပရေၚ်ဆက်စၠောံ ကေုာံ ပရေၚ်ပလံၚ်ဗစိုပ် ဝန်ဇၞော်ကၟိန်ဍုၚ် သ္ကိုပ်ဗိုလ်ဇၞော် မျထောန်ဥူ၊ ဒုဝန်ဇၞော် ဥူအံၚ်ကျဝ်ထောန် ကေုာံ သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန် ခါန်ကၞက်ပ္တိုန်လဝ်ဂှ် မပါလုပ် ညးတာလျိုၚ်ဌာနမဆေၚ်စပ်တံ စိုပ်ကၠုၚ်လဝ် ကိုန်စဳမာန်သၞေဟ်က္ၜၚ်ကျာရ။
ကြဴနူဂှ်တုဲ ဌာနမဆေၚ်စပ်သၟဝ်တဲကံၚ်ဇြဳပၞာန်တံ အခိၚ်သောၚ်ကလးပ္တိုန်ထ္ၜးဒၟံၚ် စပ်ကဵုကိုန်စဳမာန်သၞေဟ်က္ၜၚ်ကျာ ပ္ဍဲကဵုဗ္ဒမ်သ္အးဇ္ၚးယာယဳ ကိုန်စဳမာန်သၞေဟ်က္ၜၚ်ကျာ ၜိုတ်နူဂယး ၁၀ နာဍဳဂှ် ဒးဒုၚ်ဗ္တိုက်လဝ်ကဵုဒရုၚ်ရ။
ဟိုတ်နူဒးဒုၚ်ဗ္တိုက်ကဵုဒရုၚ်တုဲ ဒတုံဗ္တိုဟ်ထ္ကးအာလဝ် ခြာဇမ္ၚောဲ ဗၞတ် ၁၀၀ ဟတ် ဗ္ဒါဲဗ္ဒမ်သ္အးဇ္ၚးယာယဳ ကိုန်စဳမာန်သၞေဟ်က္ၜၚ်ကျာဂှ်တုဲ မၞိဟ်၊ စမြိုၚ်တံဂှ်တှ်ေ ဇီုကပိုက်ဒးဟွံမွဲပုဟ်ဂှ် ညးမစုက်လုက်ကဵု ကံၚ်ဇြဳပၞာန်တံ ဟီုဂးဒၟံၚ်အိုတ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်ဏီရ။
ကြဴနူလၟေၚ်ဒဒှ်ဏံတုဲ ဂကောံသ္ကိုပ်ဗိုလ်ဇၞော် မျထောန်ဥူဝွံ ကလေၚ်စဴအာဍုၚ်မတ်မလီု လွာဲဂှ်ဂှ် ဂွံတီကေတ်တုဲ ပ္ဍဲကဵုဒၞါဲကိုန်စဳမာန်တံကဵု ဒၞါဲအပ္ဍဲဍုၚ်တံဂှ် ကၟာတ်လဒဵုဂၠိုက်ဂၠါဲစၟဳတ် ကေုာံ ပတေၚ်ဂြတ်လဝ်ပရေၚ်ဂီုကၠီုတံရောၚ် ဂွံတီကေတ် အတိုၚ်ဂလာန်ညးဒေသတံရ။
စပ်ကဵုအကာဲအရာ ဂကောံဝန်ဇၞော်ကၟိန်ဍုၚ် ကံၚ်ဇြဳပၞာန်ခါန်ကၞက် ဒးဒုၚ်ဗ္တိုက်ကဵုဒရုၚ်တုဲ ဂကောံဇြဟတ်ပၠန်ဂတးတံ ဒဵုကဵုအခိၚ်လၟုဟ် လလောၚ်ပ္တိတ်လဝ်ပရိုၚ်ဂှ် ဟွံဂွံဆဵုကေတ်ဏီရ။
ကံၚ်ဇြဳပၞာန်ဝွံ သွက်ဂွံသိုၚ်ခၞံ သၞေဟ်က္ၜၚ်ကျာ ကေုာံ သၞေဟ် ကဆံၚ်ဍုၚ်သ္အာၚ် ဗ္ဒါဲဍုၚ်မတ်မလီုဂှ်ဂးတုဲ ပ္ဍဲဂိတုဒဳဇြေမ်ဗာ ၁၀ သၞာံ ၂၀၂၁ တေံ ဒက်ပ္တန်လဝ် ကမ္မတဳကောပ်ကာဲထ္မံက်ရုပ်ရဴကိုန်စဳမာန်ဗဟဵု ဝန်ဇၞော်ကၟိန်ဍုၚ်ကံၚ်ဇြဳပၞာန်ခါန်ကၞက်ပ္တိုန်လဝ်တံ မပါလုပ်ဂှ်ရ။
ပ္ဍဲဍုၚ်မတ်မလီုဂှ် တုဲကၠုၚ် ပ္ဍဲဂိတုမာတ် ၂၄ တေံဂှ်လေဝ် သၞေဟ်က္ၜၚ်ကျာမတ်မလီု ကေုာံ သေန်တာယေန်သၞာၚ်ကောန်ဍုၚ်အရၚ် ကံၚ်ဇြဳပၞာန် မသိုၚ်ခၞံဒၟံၚ်တံ ဒးဒုၚ်ဗ္တိုက်ကဵုဒရုၚ်တုဲ ဂၠံၚ်က္ၜၚ်ကျာဂြိပ်ညိည ဇီုကပိုက်ဒးအာလဝ်နွံရ။
သ္အာၚ်နူဂှ်ပၠန် အပ္ဍဲဂိတုတုဲကၠုၚ်တေံဂှ်လေဝ် ဌာန်ဂအုပ်ပၞာန်ရးအဂၞဲ ကံၚ်ဇြဳပၞာန် ဖျေံသ္ဇိုၚ်ဍုၚ်မတ်မလီု၊ ဒၞါဲသ္ၚိဒတန်ဝန်ဇၞော် မပါလုပ် ထံၚ်စာတ်လ္ၚဵုတံဂှ်လေဝ် ဂကောံဒပ်ပံၚ်ကောံဇြဟတ်ပၠန်ဂတးတံ ဗ္တိုက်လဝ်ကဵုဒရုၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI