နျူယျံက်၊ ဨပရဴ ၆
ပွပကီုပရာပ် ဒပ်ကံၚ်ဇြဳပၞာန်တံ ညံၚ်ဂွံအိုတ်အးအာဂှ် ကံၚ်ဇြဳဂီုကၠီုကုလသမဂ္ဂ သွက်ဂွံကေတ်အရေဝ်ရေၚ်တၠုၚ်ကဵု ပိုတ်တ်သ္ကုတ်တ်ဂှ် ညးစၞးဍုၚ်သ္အာၚ်တံ ဖ္တိုက်ဖ္အောဝ်လဝ်ရ။
သွက်ဂွံသောၚ်ကလး အကာဲအရာပရေၚ်ဗ္စာရဏာမၞိဟ်တံဂှ် သ္ဂောံခါန်ကၞက်ပ္တိုန် ညးစၞးတၟေၚ် စပ်ကဵုဍုၚ်ဗၟာမွဲတၠဂှ်လေဝ် ကလုတ်တမာန်ဂမၠိုၚ် အာတ်မိက်လဝ်ရ။
အလုံဍုၚ်မွဲ ပဋိပက္ခရပ်လွဟ်တံ သၠဲလးကၠုၚ်တုဲ ပရေၚ်ဒုၚ်ကာ မ္ဒးရပ်စပ် ဟွံမွဲဟွံဂွံတံဂှ်ကဵု တၚ်နွံပၟိက်သ္ဇိုၚ် ညးဍုၚ်ကွာန်တံဂှ် ဟွံကလိဂွံ ဒှ်ဒၟံၚ်ရောၚ် လစှ်ေညးအုပ်ကာ စပ်ကဵုအာယှသ္ကုတ်ဗၟံက်လ္ဒေါဝ် ကေုာံ စပ်ကဵုပသိဝှေတ် ဌာနဒက်ပ္တန် ပရေၚ်ဍုၚ်ကွာန်၊ ပရေၚ်ၜိုဟ်လလမ် မၞုံယၟု ခါလေတ်ခဳယာရဳ ဟီုကဵု ကံၚ်ဇြဳဂီုကၠီုရ။
ပ္ဍဲအရာသောၚ်ကလး ပြသၞာက္တဵုဒှ်ဒၟံၚ်လၟုဟ်တံဂှ် သွက်သ္ဂောံရပ်စပ် အခေါၚ်အရာမၞိဟ် ညးဍုၚ်ကွာန်ဍုၚ်ဗၟာတံ ဗွဲမဗၠးၜး၊ ဗွဲမၜိုဟ်လလမ်ဂှ် ပၟိက်ဇၞော်ရောၚ် ညးစၞးဍုၚ်သ္အာၚ်ဂမၠိုၚ် သ္ဂးလဝ်ရ။
စပ်ကဵုကံၚ်ဇြဳပၞာန်သီအဝဵု ပ္တိတ်ဒၟံၚ်ဇြဟတ် သွက်ဂွံကၠောန်ဗဒှ်ပေါဲရုဲမာဲဂှ်တုဲ ဒဒှ်ရဒှ်ဓဝိၚ်ဂှ်ကီု၊ စပ်ကဵုအရာမကလေၚ်ဇီုကပိုက် သၞောဝ်ယိုက်ဂၠေၚ်လျိုၚ်ပၞာန်ဂှ်တုဲလေဝ် ဒဒှ်ရဒှ်ဓဝိၚ်ဂှ်လေဝ် ခါလေတ်ခဳယာရဳ ဟီုလဝ်ရ။
အပ္ဍဲတ္ၚဲအကြာကၠုၚ်စိုပ်ဏံ နကဵုဂကောံမဆက်စပ်ဂမၠိုၚ် ဍုၚ်မလုပ်ဂကောံ သ္ဂောံပ္ညဳပ္ညပ် ကုအာဇြဳယာန်ဂမၠိုၚ် သ္ဒးဂၠါဲအာသွဟ် စပ်ကဵုပရေၚ်ဍုၚ်ကွာန် သွက်ပြသၞာကၟိန်ဍုၚ်ဗၟာဏောၚ်ဂှ် ညးဟီုလဝ်ဏီရ။
သၞာဲဒဴကုလ ကဵုအရီုဗၚ်စပ်ကဵုပရေၚ်ဗ္စာရဏာမၞိဟ် လဳဇြာဒံက်တာန်ဂှ်လေဝ် ပ္ဍဲဍုၚ်ဗၟာ လၟိဟ်မၞိဟ် အပံၚ် ၂ ဒဿမ ၈ ပြကောဋိကိုဋ် ဒးဂြိပ်ဒဴပါဲဒလေတ်ဒၟံၚ်တုဲ ကြဴနူသီအဝဵုတုဲ ဒးဂြိပ်ဒဴပါဲဒလေတ်ဒၟံၚ်ရောၚ် သ္ဂးလဝ်ရ။
အလုံဍုၚ်မွဲ စၞစသုၚ် အောန်စှ်ေကၠုၚ်ဒၟံၚ်တုဲ အကြာကောန်ၚာ်သၟတ်တံကဵု ညးမၞုံကဵုဒၟုၚ်ဒၠေၚ်တံဂှ် ဓာတ်အဟာရဟွံဍိုက်ပေၚ်တံ ပရေံစှ်ေကၠုၚ်တုဲ အပ္ဍဲပိသၞာံတုဲကၠုၚ်တေံ ကွးဘာ ၁၂ ပြကောဋိကိုဋ် ဒးဇီုကပိုက်လဝ် ပရေၚ်ပညာဂှ်လေဝ် ညးဟီုလဝ်ဏီရ။
ညးစၞးဗျိတိၚ်ဂှ် ပြသၞာဍုၚ်ဗၟာဂှ် ကဵုဒှ်အာ ပြသၞာဒးဒုၚ်ဝိုတ်မွဲ ဟွံသေၚ် သ္ဂးလဝ်တုဲ ပရေၚ်ဗ္တိုက်ပၞာန်ကျာ ဒပ်ပၞာန် အလုံဍုၚ်မွဲဂှ်လေဝ် ပ္တိုန်ဒုဟ်ဒစဵုဒစးလဝ်တုဲ ဒပ်ပၞာန်ဗၟာဝွံ အပ္ဍဲပွိုၚ် ၅ ဂိတုတုဲကၠုၚ်တေံ ပရေၚ်ဗ္တိုက်ပၞာန်ကျာ ဗ္ဒါဲ ၆၀၀ ဝါ ကလိလောန်လဝ်ရောၚ် ကဵုလဝ်သမ္တီရ။
ညးစၞးဗေန်ဂလာဒေတ်ဂှ် အတိုၚ်တုပ်လဝ်စိုတ်ကုဍုၚ်ဗၟာ အကာဲအရာကဵုမ္ဂး သွက်ဂွံကလေၚ်ဒုၚ်အာတဲ ညးဒဒိုက်ရိုဝ်ဟေန်ဂျာတံဂှ် ဟီုဂးလဝ်ရ။
ညးစၞးရုယှာဂှ် ပရေၚ်ဍုၚ်ဗၟာဝွံ သွက်ပရေၚ်ဂီုကၠီုဍုၚ်သ္အာၚ်ဂှ် ဒှ်ပရေၚ်ဘပဠမွဲ ဟွံသေၚ်ပုဟ်ဂှ် ဟီုလဝ်တုဲ ညးစၞးကြုက်ဂှ် အကာဲအရာက္တဵုဒှ်ဒၟံၚ် ပ္ဍဲရခေၚ်ဂှ်ဝွံ ဒှ်ပရေၚ်အပ္ဍဲဍုၚ်ဗၟာတုဲ သွက်ဂွံလုပ်စိုပ်ပ္ညဳပ္ညပ်ကဵုအကြာဂှ် ညးစၞးပိုယ်တံမွဲတၠ စိုပ်ဒၟံၚ်နေဗျဳဒဝ်ရောၚ် ဟီုလဝ်ရ။
ညးစၞးဗျိတိၚ်ဂှ် စပ်ကဵုဒပ်ပၞာန် ကဵုရိုဝ်ဟေန်ဂျာတံ လုပ်ပၞာန် ဗွဲအနိၚ်အထက်ဂှ်ကဵု ထပိုတ်လဝ် ပရေၚ်ဆက်စၠောံ ပ္ဍဲရခေၚ်ဂှ်တုဲ ဒဒှ်ရဒှ်ဓဝိၚ်ဂှ် ဟီုလဝ်တုဲ ဒပ်ပၞာန်ဗ္တိုက်လဝ်ပၞာန်ကျာဂှ် ပ္တိုန်ဒုဟ်ဒစဵုဒစးလဝ်ရောၚ် ဂွံတီကေတ်ရ။
Ref: UNNews