ကိဗ်၊ ဨပရဴ ၇
ယူကရုၚ် ဗ္တိုက်လဝ် ပွန်မၞုံသ္ကုတ်သၠုၚ်ကျာ ရုယှာဂှ်တုဲ ပလီုဂွံလဝ် က္ၜၚ်ကျာ နူဗ္ဒိုပ်ဒပ်ကျာရုယှာ ဖျေံသ္ဇိုၚ် ဒေသရံက်သတပ် ၆ ဖ္ဍိုက်ဂှ် ဟီုလဝ်ရ။
ဟိုတ်နူပရေၚ်ဗ္တိုက် ကဵုဒရုၚ်တုဲ ကောန်သ္ဂံၚ် နူဗ္ဒိုပ်ဖျေံသ္ဇိုၚ်ဂှ် ဗ္ဒါဲ ၂၀ ဇီုကပိုက်ချိုတ်လဝ်တံ နွံလဝ်တုဲ က္ၜၚ်ကျာ ၈ ဖ္ဍိုက် လီုလာ်အာလဝ် ဇၞော်ကဵုဇြဟတ်ရောၚ် ဒပ်ပၞာန်ယူကရုၚ် သ္ဂးလဝ်ရ။
ဗ္တိုက်လဝ် ဗ္ဒိုပ်ဖျေံသ္ဇိုၚ်ဒပ်ကျာရုယှာ ဒၞါဲဗ္ဒိုပ်က္ၜၚ်ကျာ Su-27 ကဵု Su-34 မဒးရပ်စပ်ဒၟံၚ် ပ္ဍဲမုက်ပၞာန်တေံဂှ် တမ်ရိုဟ်ပရိုၚ်ပရေၚ်ဂီုကၠီုတံ ဟီုရ။
ပ္ဍဲပၞာန်ၜက်ၜေတ်ရုယှာဂှ် သီုၜါဍုၚ် သုၚ်စောဲဒရုၚ် ဗ္တိုက်ဒၟံၚ်တုဲ လ္ပာ်ရုယှာ ရပ်စပ်ဒၟံၚ် ဒရုၚ်အဳရာန်တံတုဲ ယူကရုၚ်ဂှ် မ္ၚးနူကဵုက္ၜၚ်ကျာဒရုၚ်ဂှ် သွက်ဂွံဗ္တိုက်ပလီု က္ၜၚ်ဒပ်ဍာ် မၞုံၜဳဗ္စံက်ဂှ် သုၚ်စောဲဒၟံၚ် သီုဂၠုၚ်ဒရုၚ်တံရ။
ဒရုၚ် ယူကရုၚ် သုၚ်စောဲဒၟံၚ်တံဂှ်ဝွံ အေန်ဂျေန်နဳယျာ အပ္ဍဲဍုၚ်တံ ကၠောန်ပ္တိတ်လဝ် နကဵုၚုဟ်တန်တန်တုဲ ရပ်စပ် အပ္ဍဲကဵုပေါဲဗ္တိုက်တံဂွံဂှ် ဂွံတီကေတ်ရ။
စမြိုၚ်ဇြဟတ်ဓာတ် ကေုာံ လ္ပာ်ပၞာန် ရုယှာတံဂှ် ခြာဟွံလအ်တုဲကၠုၚ်တေံ သၠုၚ်ပ္တိုန်အသိၚ် ဗ္တိုက်လဝ် နကဵုဒရုၚ်ရောၚ် ယူကရုၚ် ကဵုလဝ်သမ္တီရ။
ဒပ်ပၞာန်ယူကရုၚ်ဝွံ ဒးဆေၚ်ဒၟံၚ်မုက်ကဵု မကမ်လွဟ်လက်နက် ပိုတ်အိုတ်တံရောၚ် ဟီုလဝ်ကီုလေဝ် ပ္ဍဲသၞာံဏံ သ္ဂောံကၠောန်ပ္တိတ်အာ ဒရုၚ် ဂၠိုၚ်ကဵုပြကောဋိကိုဋ် နွံဂှ် ဟီုကြီုလဝ်ရ။
သ္အာၚ်နူဂှ်ပၠန် ပ္ဍဲဂိတုဨပရဴ ၂ တေံဂှ်လေဝ် ဒရုၚ်ယူကရုၚ်တံဝွံ ဗ္တိုက်ပလီုလဝ် ရုၚ်စက်ကၠောန်ပ္တိတ်ဒရုၚ် ကေုာံ ရုၚ်စက်သ္အးဇ္ၚးကၠေၚ်ဍေန် အပ္ဍဲတွဵုဒၞက်ရုယှာတံဂှ် ဂွံတီကေတ်ရ။
Ref: BBC