မနဳလာ၊ ဨပရဴ ၉
ဒၟါနူပရေၚ်ကယျာန်ဓဝါန် ဆေၚ်စပ်ကဵုတိဍာ်တုဲ ပရေၚ်ကြံၚ်မ္ၚိုဟ် သၠုၚ်တိုန်ကၠုၚ်ဒၟံၚ်ဂှ် အခိၚ်ကြုက် ပြံၚ်လှာဲစွံကၠုၚ်အာရီု လ္တူဖဳလေတ်ဖေန် ဂၠိုၚ်ကၠုၚ်ဂှ် ပ္ဍဲၜဳကြုက်သၠုၚ်ကျာ ပၞာန်ဂၠးကဝ်တတိယ စက္တဵုဒှ်မာန်ဏောၚ် ညးစိုန်သ္ကီုပရေၚ်ကြုက် ကဵုလဝ်သတိရ။
ဖဳလေတ်ဖေန် ကေုာံ ဇကုတံဂှ် တၚ်တုပ်စိုတ် ပရေၚ်စဵုဒၞါၜါလ္ပာ်တံ နွံဒၟံၚ်ကီုလေဝ် ကြုက် ဓဝ်ရှ်ေသှ်ေဟွံမွဲပုဟ်ဂှ် ညးစိုန်သ္ကီုပရေၚ်ကြုက် ကောန်ဂကောံ Gatestone Institute ဂဝ်ဒါန်ယှာန် ဟီုလဝ်ရ။
အတိုၚ်တၚ်တုပ်စိုတ် ပရေၚ်စဵုဒၞါ အမေရိကာန်−ဖဳလေတ်ဖေန် သ္ကုတ် ၄ ဂှ်မ္ဂး သွက်ဂွံထ္မံက်ရုပ်ရဴ သ္ဂောံရပ်စပ်ဇြဟတ်ဂှ် ပလေဝ်ပလေတ်လဝ်ရောၚ် ဌာနဝန်ဇၞော်ကာဍုၚ်သ္အာၚ် ချူလဝ်လိက်စဵုကဵုၜါဝါတုဲ ကဵုလဝ်သတိ ကုကြုက်ရောၚ် ညးစိုန်သ္ကီုဂှ် သ္ဂးလဝ်ရ။
ဣဏံဝွံ ဒစးဒုၚ်ပလေဝ်ပလေတ်လဝ် သွက်ဂွံဗ္တိုက်ပၞာန်ဂှ် ကဵုလဝ်သတိရောၚ် ညးဟီုလဝ်ဏီရ။
ညံၚ်ပေါဲပၞာန် အကာဲအရာပရေံပရေံဂွိုအ်က္တဵုဒှ်ကၠုၚ်ဂှ် ဒးကဵုသတိ ကုအလဵုအသဳမနဳလာရောၚ် ခြာဟွံလအ် ကြုက်ဟီုလဝ်ရ။
ဟိုတ်နူအမေရိကာန် လုပ်သောၚ်ကလးပရေၚ်ပၞာန်အကြာ စၞးဖဳလေတ်ဖေန်ဂှ်တုဲ သွက်ဍုၚ်ဇိုၚ်ဝုတ်ဒိုဟ်တံဂှ်လေဝ် ပရေၚ်ဇီုကပိုက်ဆောံလေၚ်တံ က္တဵုဒှ်မာန်ဟီုဂှ် ညးဖျေံစၟတ်တၚ်သ္ဂုတ်သွာတ် အမေရိကာန်တံ သ္ဂောံချပ်လဝ်ခိုဟ်ဏောၚ်ဂှ် ကြုက် သ္ဂးလဝ်ရ။
ပေါဲဗ္တိုက်ဒှ်ကၠုၚ်မ္ဂး ညးဟၟဲကဵုဒုဟ်ဒဏ် နူအာယှဒိုဟ်အဂၞဲတံဝွံ ဒးဒုၚ်ဘဲပေါဲပၞာန်မာန်ဂှ်ရ ပ္ဍဲၜဳကြုက်သၠုၚ်ကျာ ပရေၚ်ၜိုဟ်လလမ်ကဵု ပရေၚ်ပံၚ်တောဲရေၚ်တၠုၚ်တံ ပၟိက်ဇၞော်ရောၚ် အလဵုအသဳကြုက် ကဵုလဝ်သတိရ။
ၜဳကြုက်သၠုၚ်ကျာ ကပေါတ်ဗၞိက်ဍာ် သၟုဟ်ဓာတ်သဘာဝ ကေုာံ ကၠေၚ်ဍေန်တံ ဂၠိုၚ်တုဲ မဒှ်ဂၠံၚ်ဗၞိက်ဇွောဝ် အဓိကဂှ် ကြုက် ညးတံပိုၚ်ပြဳလဝ်ရောၚ် ဟီုလဝ်ဂှ်ရ ဖဳလေတ်ဖေန် မပါလုပ် သီုကဵုဍုၚ်တၞဟ်သ္အာၚ်တံဂှ် ပရေၚ်ကယျာန်ဓဝါန်တံ နွံဒၟံၚ်ရ။
ကြုက်ဟီုဂးဒၟံၚ် ဒဒှ်ရပိုၚ်ပြဳတိဍာ်သာ်ဏံဂှ်ဝွံ ဟွံလုပ်သၞောဝ်ပုဟ်ဂှ် ရုၚ်သၞောဝ်ဓဝ် သောၚ်ကလးပရေၚ်ကယျာန်ဓဝါန်ဍုၚ်သ္အာၚ်တံ ပ္ဍဲသၞာံ ၂၀၁၆ တေံ သ္ဂုတ်သွာတ်လဝ်ကီုလေဝ် ကြုက် တးပါဲလဝ်ရ။
ပ္ဍဲၜဳကြုက်သၠုၚ်ကျာဂှ် အမေရိကာန်၊ ဂျပါန်၊ အဝ်သတြေလျ ကေုာံ ဖဳလေတ်ဖေန်တံ ပ္ဍဲဂိတုဨပရဴ ၇ တေံ ပံၚ်တောဲကၠောန်သ္ပလဝ် ပွပ္ကတ်ပ္ကေၚ်ပရေၚ်ပၞာန်တံတုဲ ကြုက်လေဝ် ကၠောန်သ္ပပ္ကတ်ပ္ကေၚ်ဒၟံၚ်ပရေၚ်ပၞာန်တံကီုဂှ် ဂွံတီကေတ်ရ။
Ref: FoxNews