မတ်မလီု၊ ဨပရဴ ၉
တွဵုရးဍုၚ်မန် ပ္ဍဲဍုၚ်မတ်မလီုဂှ် နကဵုတၚ်စောဲစပ် ထံက်ဂလာန်ကဵုဇြဟတ် ဂကောံဒစဵုဒစးတံဂှ်တုဲ ကံၚ်ဇြဳပၞာန် ဗက်ရပ်ဒက်ဒၟံၚ် ညးဍုၚ်ကွာန်ဒေသတံ အဆက်က်ဂှ် ဂွံတီကေတ် အတိုၚ်ဂလာန် ညးလ္တူဍုၚ်တံရ။
ဒပ်ကံၚ်ဇြဳပၞာန် ကေုာံ ဒပ်ဗၠာဲသၟိၚ်တံဝွံ နကဵုတၚ်ထ္ၜးဟိုတ်ပရေၚ်ဂီုကၠီုဂှ် အလုံဍုၚ်မွဲ ကၟာတ်လဒဵုဂၠိုက်ဂၠါဲစၟဳတ်တုဲ ရပ်ဒက်ဒၟံၚ် အဆက်က်တုဲ နူကဵုဇာဇၞိက်ပရေၚ်မၞိဟ်မွဲကဆံၚ် မၚ်ရံၚ်တုဲရပ်ဒက်တံလေဝ် ကၠောန်သ္ပကၠုၚ်ဒၟံၚ်စေအ်အ်ရ။
ပ္ဍဲကဵုဏံ ပ္ဍဲဂိတုဨပရဴ ၄ တုဲကၠုၚ်တေံ နကဵုတၚ်စောဲစပ် ထံက်ပၚ်သြန်လှုဲ ဇရေၚ်ဒပ်စဵုဒၞါညးဍုၚ်ကွာန် PDF နူကဵုအောန်လိုၚ်ဂးတုဲ ရပ်ဒက်လဝ် ညးဒေသမတ်မလီု ဥူဇေန်မေန်ဥူ ကေုာံ မချဵုချဵုခိုၚ်တံရ။
ပ္ဍဲဂိတုဨပရဴ ၇ တေံဂှ်လေဝ် နကဵုတၚ်စောဲစပ် ထံက်ပၚ်သြန်လှုဲ လအာတုပ်သာ်ဏံဂှ် ထပ်ရပ်ဒက်လဝ် ညးဒေသမတ်မလီု မပွိဖျူအံၚ် ကေုာံ မကျဳဝါထောန်တံရ။
ညးဒေသမတ်မလီုမွဲတၠဂှ် အပ္ဍဲဍုၚ်ဂှ် ကောန်ဒပ်ကံၚ်ဇြဳပၞာန်တံ စၟဳတ်ဖုၚ် နကဵုတၚ်ထ္ၜးဟိုတ်ပရေၚ်ဂီုကၠီုတုဲ ရပ်စပ်ကၠုၚ်အဆက်က်ဂှ်ရ အရာမဒှ်ဓဝိၚ်တံ သၠုၚ်တိုန်ကၠုၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အဓိကဂှ်တှ်ေ သၟတ်တံရဏောၚ်။ သွက်ပရေၚ်ဂီုကၠီုတုဲ ကဵုပံက်ဗုၚ်ကွဳ။ ဖုၚ်ပါဟာ သၟာန်တုဲ အာတ်ဗဵုဖုၚ်။ ညးလ္ၚဵု ဟွံဆက်စပ်တံဂှ်တှ်ေ ထ္ၜးဖုၚ်။ လ္ၚဵုဂှ်လေဝ် ဟွံထ္ၜးပုဟ်။ ဟွံထ္ၜးတှ်ေ ရပ်ဒက်။ အခိၚ်ဗ္တံတှ်ေလေဝ် လုပ်စိုပ်စၟဳတ်အပ္ဍဲသ္ၚိတံ နွံဒၟံၚ်ရ။ လၟုဟ်ဂှ် ဟၟဲကဵုသၞောဝ် ဗီုမိက်ဂွံကၠောန် ကၠောန်ဒၟံၚ်ရ။ ရေၚ်တၠုၚ်ဒၟံၚ် ဗီုပၟိက်စိုတ်တုဲ မၞိဟ်တံဂှ်တှ်ေ ဒးဂွိၚ်ဖေက်လကိုတ်ဒၟံၚ်ရ” သာ်ဝွံ သ္ဂးရ။
မွဲလ္ပာ်ဂှ်ပၠန် ကောန်ဒပ်ကံၚ်ဇြဳပၞာန်တံဝွံ နကဵုတၚ်ထ္ၜးဟိုတ်ပရေၚ်ဂီုကၠီု ပ္ဍဲအရာစၟဳတ်ဖုၚ်တံဂှ် ပါ်ပရအ်အရာမဆက်စပ်ကဵုပၠန်ဂတး၊ လုပ်ချူတၚ်စၟတ်တံသၟးဟွံက လုပ်ချူလညာတ် ပ္ဍဲကဵုဌာန်ပရိုၚ် ဒးဒုၚ်ကၟာတ်သီလဝ်လာၚ်ဇြေန်တံဂှ်မ္ဂးလေဝ် ကဵုဇြဟတ်ပွပကီုပရာပ်ဂးတုဲ ရပ်စပ်ပံက်ဂဗုတ်တံ နွံဒၟံၚ်ရ။
အတိုၚ်တၚ်နၚ် သြၚ်လောန်တိုၚ်(မ်) ၜိုတ်က္ဍစိုပ် ပ္ကောံပ္ကေဝ်ဂွံလဝ်ဂှ်မ္ဂး ပ္ဍဲသၞာံဏံ နူဂိတုဂျာန္နဝါရဳ စဵုကဵုဂိတုမာတ် ပ္ဍဲဍုၚ်မတ်မလီု ညးဒေသ ဟွံအောန်နူကဵု ၂၀ ဒးဒုၚ်ရပ်လဝ်တုဲ ဗွဲမဂၠိုၚ်ဝွံ ပံက်လဝ်ဂဗုတ် နကဵုၝောံပိုဒ် သၞောဝ်ဗ္တိုက်သရိုဟ်ပကီုပရာပ်တံရ။
အတိုၚ်လိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိ NRFF ပၞာန်သီအဝဵုပေၚ်ပိသၞာံဂှ်မ္ဂး ပ္ဍဲတွဵုရးဍုၚ်မန် ကောန်အရာပ် ၉၀၀ ပြၚ် ဒးဒုၚ်ရပ်လဝ်တုဲ ၁၀၅ တၠ ဒးဒုၚ်ဂစိုတ်လဝ်ရောၚ် တုဲကၠုၚ်ပ္ဍဲဂိတုဖေဖဝ်ဝါရဳ ၁ တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တို(မ်)
ဗီု−CJ