မတ်မလီု၊ ဨပရဴ ၉
သွက်ဂွံလုပ်အာပေါဲဗ္တိုက် ညံၚ်သၞောတ်တၠအဝဵုပၞာန် ဂွံသရိုဟ်စှ်ေအာဂှ်ကီု၊ သီုဂွံဒက်ပ္တန်ဍုၚ်မန်မာန်ဂှ် ဒပ်ပၠန်ဂတးရပ်လွဟ်မန် ကေုာံ ဂကောံပရေၚ်ဍုၚ်ကွာန်မန် မဍတ်ပါ်ကၠုၚ် နူပၠန်ဂတးက္ညၚ်ဏံ သွက်ဂွံပံၚ်တောဲရေၚ်တၠုၚ်အာဂှ် တုပ်လဝ်စိုတ်ရောၚ် ဂကောံမဆေၚ်စပ်တံ လလောၚ်တြးလဝ် ပ္ဍဲဂိတုဨပရဴ ၇ တေံရ။
ယဵုဒုၚ်ဂိုၚ်ကေတ် လညာတ်ညးဍုၚ်ကွာန်မန်တံတုဲ တၞဟ်နသ္ဂောံဒှ်ပရေၚ်ညဳသၟဟ် အကြာဒြဟတ်ပရေၚ်ဍုၚ်ကွာန်မန်၊ ဒြဟတ်ပၞာန် အပ္ဍဲပၠန်ဂတးတံဂှ် ကံၚ်ဇြဳဖေဝ်ဒရာဍုၚ်မန် MSFC ၊ ဒပ်ပၠန်ဂတးဍုၚ်မန် MSRF ကေုာံ ဒပ်စဵုဒၞါညးဍုၚ်ကွာန်မန် MSDF တံ ဆဵုဂဗသဳကၠဳလဝ်ညးသ္ကအ်ရ။
နူကဵုပရေၚ်ဆဵုဂဗသဳကၠဳ အကြာပိဂကောံဂှ် ညးမအာက္ဍိုပ် ပရေၚ်ဍုၚ်ကွာန် ပရေၚ်ပၞာန် နူကဵုဒပ်စဵုဒၞါဍုၚ်မန် (MSDF) လ္ၚဵုတံဂှ် ပံၚ်တောဲပါလုပ် ကေတ်အာတာလျိုၚ် အရာပရေၚ်ဍုၚ်ကွာန် ပ္ဍဲကံၚ်ဇြဳဖေဝ်ဒရာဍုၚ်မန်ရောၚ်။
ညးမၞုံအခေါၚ်ဟီုဂး ကံၚ်ဇြဳဖေဝ်ဒရာဍုၚ်မန် နာဲမန်သာၚ်ဂှ် “သွက်ဗၠးၜးဂကူမန်ဒှ်ဒှ်၊ အခိၚ်ဒက်ပ္တန် ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ ဂတဏံဂှ် နကဵုတွဵုရးဍုၚ်မန် သွက်ဂွံဒက်ပ္တန် နဒဒှ်ယူနေတ်တွဵုရးဇကုမာန်ဟီုဂှ် ဒးဗ္တိုက်သရိုဟ်သၞောတ်တၠအဝဵုပၞာန် မၞုံပ္ဍဲတွဵုရးဍုၚ်မန်လၟုဟ်ဂှ်ဏောၚ်။ ဂွံဗ္တိုက်သရိုဟ်သာ်ဏံဂှ် ညးမွဲဂကောံ အဲမွဲဂကောံတှ်ေ ကၠောန်မာန်ဟွံသေၚ်ပုဟ်။ နကဵုဇြဟတ်ပံၚ်ကောံ ဂကောံနွံဒၟံၚ်အဏံတံသီုဖအိုတ် ကၠောန်ၜိုတ်မှ အံၚ်ဇၞးဏောၚ်ဂှ် ကံၚ်ဇြဳဖေဝ်ဒရာဍုၚ်မန်ပိုယ်တံ ပတှ်ေစှ်ေစိုတ်ဂှ်ရ မွဲဂကောံကုမွဲဂကောံ သွက်ဂွံပံၚ်တောဲရေၚ်တၠုၚ်ပရေၚ်ပၞာန်၊ ပရေၚ်ဍုၚ်ကွာန်တံဂှ် ပိုယ်တံ စဳဇန်လဝ်ရ” သာ်ဝွံ ဟီုရ။
ပ္ဍဲကဵုပရေၚ်ပံၚ်တောဲရေၚ်တၠုၚ်ဏံဂှ် ညံၚ်ဒပ်စဵုဒၞါဍုၚ်မန် MSDF ဂွံတန်တဴအာကီု ဂွံဇၞော်မောဝ်တိုန်ကီု နူကဵုကံၚ်ဇြဳဖေတ်ဒရာဍုၚ်မန် MSFC ကဵုအာရီုဗၚ်ရောၚ် ကလိဂွံလဝ်တၚ်တုပ်စိုတ် နူကဵုပရေၚ်သဳကၠဳအကြာပိဂကောံဂှ်ရ။
မွဲလ္ပာ်ဂှ်ပၠန် MSRF ကေုာံ MSDF တံ လုပ်အာပေါဲဗ္တိုက် စဵုကဵုတၠအဝဵုပၞာန် ကေုာံ သၞောတ်တၠအဝဵုနာနာ ရိုဟ်ကၞက်ဂွံပိုတ်အာဂှ်တုဲ စဵုကဵုဒက်ပ္တန်ဍုၚ်မန် မဍိုက်ပေၚ်ကဵုအဝဵုအပိုၚ်အခြာတံမာန်ဂှ် သွက်ဂွံပံၚ်တောဲ လုပ်အာပေါဲဗ္တိုက် နဒဒှ်ဒပ်မဟာမိတ်ဂှ် တုပ်လဝ်စိုတ်ရ။
ညးမၞုံအခေါၚ်ဟီုဂး ဒပ်စဵုဒၞါဍုၚ်မန် MSDF ဒံက်တာ သဳရိမန်ဆာန်ဂှ် သွက်ဂွံဝေၚ်ပၞာန် ပေါဲဗ္တိုက်သီဍုၚ် သီဗ္ဒိုပ် ပ္ဍဲတွဵုရးဍုၚ်မန်မာန်ဂှ် ဒပ်ပၠန်ဂတးရပ်လွဟ်မန်တံ ဒးဒှ်မွဲဂကောံမွဲကရောံဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲတွဵုရးဍုၚ်မန် သွက်ဂွံဝေၚ်ပရေၚ်ပၞာန်၊ ပေါဲဗ္တိုက်သီဍုၚ် သီဗ္ဒိုပ်တံမာန်ဂှ် နဒဒှ်ကဆံၚ်ပထမ ဒပ်ရပ်လွဟ်ပၠန်ဂတးမန်တံ ဒးဒှ်မွဲဏောၚ်။ နူကဵုဒပ်ပၠန်ဂတးမန် ဒှ်ကၠုၚ်မွဲဂကောံမွဲကရောံဏံဂှ်မွဲကဆံၚ် ပံၚ်တောဲကဵု ဂကောံပၠန်ဂတး၊ ဂကောံမဟာမိတ် မံက်ဂတဝ်ကၠုၚ် အပ္ဍဲပၠန်ဂတးက္ညၚ်ဏံတုဲတုဲတံဂှ်တုဲ ပ္ဍဲတွဵုရးဍုၚ်မန်ဏံဂှ်တှ်ေ သွက်ဂွံကၠောန်သ္ပပေါဲဗ္တိုက်သီဍုၚ်၊ သီဗ္ဒိုပ်ဂှ် ပၟိက်ဇၞော်ရ” သာ်ဝွံ သ္ဂးရ။
သွက်ဂွံလုပ်ပေါဲဗ္တိုက်ပံၚ်တောဲအာ နဒဒှ်ဒပ်မဟာမိတ်ဂှ် ဒပ်ပၠန်ဂတးရပ်လွဟ်မန် MSRF ကဵု MSDF တံ ပ္ဍဲအရာပကတ်ပ္ကေၚ်ဘာပၞာန်ကီု၊ အရာကၠောန်ပ္တိတ်ကပေါတ်ပၞာန်တံဂှ် သွက်ဂွံကၠောန်အာမွဲစွံနွံဒၟံၚ်ရ။
သ္အာၚ်နူဂှ်ပၠန် ပရိုၚ်သ္ဇိုၚ်စပ်ကဵုပၞာန်ကီု ပရေၚ်ဆဵုဂဗပၞာန်နာနာတံကီုဂှ် သွက်ဂွံသၠာဲဂတးအာလညာတ်ညးသ္ကအ်ကီု၊ ပေါဲဗ္တိုက်ပရေၚ်ပၞာန်တံ မံက်ဂတဝ်ကၠုၚ်မ္ဂး သ္ဂောံပံၚ်တောဲလုပ်အာပေါဲဗ္တိုက် နဒဒှ်မဟာမိတ်ဂှ် တုပ်လဝ်စိုတ်ရ။
ညးဗြဴမန်မွဲတၠဂှ် “ နကဵုညးဍုၚ်ကွာန်မွဲ ညးဍုၚ်ကွာန်တံ ဍောၚ်ၜိုတ်ဒၟံၚ် ကုသၞောတ်တၠအဝဵုပၞာန်တံယျ။ မိက်ဂွံကလိဂွံဒၟံၚ်ပေါဲအံၚ်ဇၞးပြဟ်ဟ်ယျ။ ဗ္တိုက်သရိုဟ်ကၠေံ သၞောတ်တၠအဝဵုပြဟ်ဟ်မာန်မ္ဂး သာခိုဟ်ရ။ ပရေၚ်ပံၚ်တောဲဂှ်လေဝ် ဒုၚ်ဒၟံၚ်တၠုၚ်ရ။ ဂကောံသှ်ေဒၟံၚ်တံဂှ်လေဝ် ပံၚ်တောဲအာတုဲ ချူဓဇက် အစဳဇန်ခိုဟ်ဟ်တုဲ လုပ်အာပေါဲဗ္တိုက်မ္ဂး တိုၚ်ပ္ကဴမိက်ဂွံဂွံဂှ် စိုပ်ဏောၚ်။ နကဵုညးဍုၚ်ကွာန်မွဲ မိပ်သၠောၚ်ကွေံကွေံရ” သာ်ဝွံ သ္ဂးရ။
ပ္ဍဲကဵုဂကောံပၠန်ဂတးရပ်လွဟ် ချဳဒရာၚ်ဒၟံၚ် ပ္ဍဲဒေသမန်တံဂှ် ဒပ်စဵုဒၞါဍုၚ်မန် MSDF ၊ ဒပ်ပၠန်ဂတးဍုၚ်မန် MSRF ၊ ဂကောံပၠန်ဂတးဖျေံသ္ဇိုၚ်တွဵုရးဍုၚ်မန် MSRO ၊ ဒပ်ဗၠးၜးဍုၚ်မန် MLA ၊ ဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်) NMSP-AD တံ နွံဒၟံၚ်ရ။
ပ္ဍဲကဵုဏံ ဒပ်ဗၠးၜးဍုၚ်မန် MLA ဝွံ ဒက်လဝ်မဟာမိတ် ကုဗော်ဍုၚ်မန်တၟိ NMSP-AD ကဵု ဂကောံပၠန်ဂတးဖျေံသ္ဇိုၚ်တွဵုရးဍုၚ်မန် MSRO တံတုဲ ဒပ်ပၠန်ဂတးဍုၚ်မန် MSRF ဂှ်လေဝ် ဒက်လဝ်မဟာမိတ် ကု MSRO ရ။
ကံၚ်ဇြဳဖေဝ်ဒရာဍုၚ်မန်ဝွံ အပ္ဍဲကာလပၠန်ဂတးဏံ နဒဒှ်ဂကောံပရေၚ်ဍုၚ်ကွာန်ဂှ် နူကဵုကမ္မတဳပံၚ်ကောံရေၚ်တၠုၚ်ကေၚ်ကာဍုၚ်မန် MSICC မဒက်ပ္တန်လဝ်ကြဴနူပၞာန်သီအဝဵုတုဲဂှ် ပ္ဍဲသၞာံ ၂၀၂၃ မံက်တေံ ပြံၚ်လှာဲလဝ် နဒဒှ်ကံၚ်ဇြဳဖေဝ်ဒရာဍုၚ်မန်ရ။
ဒပ်စဵုဒၞါဍုၚ်မန် MSDF ကဵု ဒပ်ပၠန်ဂတးဍုၚ်မန် MSRF တံဂှ် သွက်သၞောတ်တၠအဝဵုပၞာန် ဂွံသရိုဟ်စှ်ေအာဂှ်ကီု သွက်ဂွံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳဂှ်တုဲ ဒှ်ဒပ်ပၠန်ဂတးရပ်လွဟ် ဒက်ပ္တန်လဝ် ပ္ဍဲကာလသီအဝဵုဏံရ။
ပရိုၚ်−သြၚ်လောန်တိုၚ်(မ်)
ဗီု−Voice TV