လံၚ်လုၚ်၊ ဨပရဴ ၁၀
ကောန်ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲရုၚ်ကောပ်ကာဲပရေၚ်မၞိဟ်လုပ် မၞုံဍုၚ်လံၚ်လုၚ် ရးတၞၚ်သဳ ဒးဒုၚ်ကၠတ်ဗ္တိုက်တုဲ ကောန်ဒပ်ကံၚ်ဇြဳပၞာန် ၅ တၠ ချိုတ်အာဂှ် ဂွံတီကေတ် ဇရေၚ်ဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ်ရ။
ပ္ဍဲဂိတုဨပရဴ ၈ အခိၚ်လဒေါဝ်တ္ၚဲ ၜိုတ် ၁၂ နာဍဳ ကောန်ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲရုၚ်လဝက နကဵုဇြဟတ် ပွဳပွူ ၁၀ တၠဂှ် ဂကောံဒပ်ပံၚ်ကောံ ဒပ်စဵုဒၞါညးဍုၚ်ကွာန်တံ လုပ်စိုပ်ဗ္တိုက်လဝ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ဘာ်နာဍဳပြၚ် က္တဵုဒှ်လဝ်တုဲ ကောန်ဒပ်ကံၚ်ဇြဳပၞာန် ၅ တၠ ချိုတ်တုဲ ၃ တၠ ဇီုကပိုက်ကလိဂွံလဝ်ဝပ်ဂှ် ညးဒုၚ်တာလျိုၚ်လလောၚ်ပရိုၚ် ဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ကလေၚ်ပန်ပှော်လဝ် နကဵုလွဟ်ဇၞော်၊ လွဟ်ဍောတ်တံကီုလေဝ် လ္ပာ်ဒပ်စဵုဒၞါညးဍုၚ်ကွာန်ပံၚ်တောဲတံ ဇီုကပိုက်ဒးဟွံမွဲ ဆုတ်ကလေၚ်မာန်လဝ်ဂှ် သ္ဂးရ။
ပရေၚ်ဗ္တိုက်ဏံဂှ် ဂကောံဒပ်စၟလော်လေဝ် (ပကဖ) လံၚ်လုၚ်၊ ဒပ်ဒမၠုက်အယဴ (ပကဖ) လံၚ်လုၚ် ကေုာံ ဂကောံဒပ်သၞံၚ်တိုၚ်၊ ဂကောံ Modern Punk ၊ ဂကောံ Student Revolutionary Force တံ ပံၚ်တောဲဗ္တိုက်လဝ်ရ။
တုဲကၠုၚ် ပ္ဍဲဂိတုမာတ် ၂၇ တေံဂှ်လေဝ် ကွဳစက်ကံၚ်ဇြဳပၞာန်မွဲဖ္ဍိုက် ဒးဒုၚ်ဗ္တိုက် ဗ္ဒါဲၝောံခန်ပွိုၚ်ဍုၚ် လ္တူဍုၚ်လံၚ်လုၚ်ဂှ်တုဲ ကောန်ဒပ်ကံၚ်ဇြဳပၞာန် ၃ တၠ ချိုတ်အာလဝ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−LLPDF