ဟံၚ်ကံၚ်၊ ဨပရဴ ၁၀
ဌာနအကံက်ခေါၚ်ဟံၚ်ကံၚ် ရပ်ဂွံလဝ် ထဝ် ၁၄၆ ကဳလောဂရာမ် နဒဒှ်ပရေၚ်သွံရာန်ထဝ်ဒမၠုက် ပလီုလဝ်ရုပ် နဒဒှ်ကိရိယာဇြဟတ်ပိန်ကျာဂှ် ဟီုလဝ် ပ္ဍဲဂိတုဨပရဴ ၈ တေံရ။
ထဝ်လၚ်ၚ်စဝ်လဝ် ပ္ဍဲကဵုကပေါတ်စက် ညံၚ်ရဴမဝ်တာ၊ ကြုတ်ကၠိက် (ဝက်အူ) ကေုာံ ဂဳယာတံဂှ် နူဟံၚ်ကံၚ် ပ္တိတ်ဇြဟတ် သွက်ဂွံပလံၚ်ဂျပါန်ဂှ် ရပ်ဂွံလဝ်တုဲ ၚုဟ်မး ၁၀ ဒဿမ ၇ ပြကောဋိကိုဋ်ဒဝ်ဠာနွံရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ဌာနအကံက်ခေါန်ရ။
ပ္ဍဲကဵုစၟတ်သမ္တီ ဌာနအကံက်ခေါန်ဟံၚ်ကံၚ်ဂှ် ထဝ်သီဂွံလၟုဟ်တံဂှ်ဝွံ ဇၞော်အိုတ်ဏောၚ်ဂှ် လဝ်ယုလံၚ် ဇၞော်သ္ကိုပ် ဗ္တိုက်သရိုဟ်အမှုရာဇဝတ် ဌာနအကံက်ခေါန် သ္ဂးလဝ်ရ။
လ္တူဂၠးတိဏံ ဟံၚ်ကံၚ်ဂှ် ဒှ်ဌာန်ကောံသွံရာန်ထဝ် ဇၞော်အိုတ်တုဲ ဟိုတ်နူပရေၚ်ဍုၚ်ကွာန်ပထဝဳ ဟွံချိုတ်ပၠိုတ်၊ ဟိုတ်နူသြန်ဖောဝ်တံတုဲ ညးဓလိုက်တမ်ရိုဟ်တံဂှ် ကၠောန်သ္ပဒၟံၚ် ညံၚ်ၚုဟ်မး ညးတံပိုၚ်ပြဳဂွံချိုတ်ပၠိုတ်ဂှ်တုဲ ၚုဟ်ထဝ် သၠုၚ်တိုန်ကၠုၚ်ရ။
ထဝ်ကၠတ်သွံရာန်ဒၟံၚ် ပ္ဍဲဟံၚ်ကံၚ် ဗွဲမဂၠိုၚ်ဂှ် လေပ်ရပ်ဂွံ ပ္ဍဲဂၠံၚ်သၞေဟ်ကၚ် ဒဒန်တံတုဲ ပ္ဍဲကဵုစၟဳတ် ကွဳစက်ဖ္ဍိုက်ဗၞိက် ဒဳကၠောံဒၟံၚ်ပယျဵုတံဂှ် ရပ်ဂွံလဝ် သာ်ဏံရ။
ဂိုဏ်ကၠတ်သွံထဝ်တံဂှ်ဝွံ ထဝ်သ္ဂောံပလံၚ်အာဂျပါန်တံဂှ် ဟိုတ်နူဟွံမိက်ကဵုအကံက်အခေါန်တုဲ ပ္တိတ်ကၠုၚ်ဇြဟတ် သွက်ဂွံကၠတ်ပလံၚ် သာ်ဏံရောၚ်ဂှ် ဌာနအကံက်ခေါန်ဟံၚ်ကံၚ် ကဵုလဝ်သမ္တီရ။
မၞိဟ်တြုံ အာယုက် ၃၁ သၞာံမွဲတၠ သ္ဂးတဴဒါရိုက်တာကမ္ပဏဳဂှ် ၜိုန်ရရပ်ဂွံလဝ်ကီုလေဝ် ဗွဲကြဴဏံ ကလေၚ်ဗလးကဵုလဝ် နကဵုလျိုၚ်တုဲ ညးဒဳယာန်တံဂှ်တှ်ေ ရပ်ဒက်လဝ်ဖိုဟ်ဂှ် ဂွံတီကေတ်ရ။
အတိုၚ်သၞောဝ်ဟံၚ်ကံၚ်ဂှ်မ္ဂး သွက်ပရေၚ်သွံရာန်ထဝ်ဒမၠုက်ဂှ် ဖျေံစၟတ်ဒဏ်ထံၚ် စဵုကဵု ၇ သၞာံ၊ ဒဏ်သြန်သၠုၚ်အိုတ် စဵုကဵု ၂ ပြကောဋိကိုဋ် ဟံၚ်ကံၚ်ဒဝ်ဠာမာန်ရ။
Ref: AFP