ဗြဝတဳ၊ ဨပရဴ ၁၀
ပပ္တံနူဂိတုဨပရဴ ၉ အခိၚ်လဒေါဝ်တ္ၚဲဂှ်တုဲ ဒပ်ပံၚ်ကောံပၠန်ဂတး KNLA တံ စဗ္တိုက်ဒၟံၚ် ဌာန်ဂအုပ်တမ်ဒပ်ကံၚ်ဇြဳပၞာန် ခလရ ၂၇၅ မသှ်ေဒၟံၚ် ပ္ဍဲဍုၚ်ဗြဝတဳ တွဵုရးကရေၚ် မဒှ်ဍုၚ်ပယျဵုသေံ−ဗၟာဂှ်ယျဂှ် ဂွံတီကေတ် နူကဵုတမ်ရိုဟ်ပရိုၚ်အပ္ဍဲဒေသတံရ။
ဌာန်ဂအုပ်တမ်ဒပ်ကံၚ်ဇြဳပၞာန် ခလရ ၂၇၅ ဖျေံသ္ဇိုၚ် ဍုၚ်ဗြဝတဳ ဂကောံဒပ်ပံၚ်ကောံပၠန်ဂတး KNLA တံ မဗိုၚ်ကၟာတ်လဒဵုလဝ်ဂှ် ကြဴနူသဳကၠဳပ္ညဳပ္ညပ် သွက်ဂွံဖျေံလွဟ် ဟွံပြေပြံၚ်တုဲဂှ် စနူဂိတုဨပရဴ ၉ အခိၚ်လဒေါဝ်တ္ၚဲ ၁၂ နာဍဳဂှ်တုဲ ဒပ်ပံၚ်ကောံတံ စဗ္တိုက်လဝ်ရ။
အပ္ဍဲပေါဲဗ္တိုက်ဂှ် ဒပ်ကံၚ်ဇြဳပၞာန် ဗ္တိုက်လဝ်နကဵုပၞာန်ကျာ အပ္ဍဲကွာန်အေသုခ ဗ္ဒါဲတမ်ဒပ် ခလရ ၂၇၅ တံဂှ်တုဲ သ္ၚိဒၟံၚ်လ္ၚဵု ပၟတ်တူလီုလာ်အာ က္တဵုဒှ်ဒၟံၚ်ဂှ်လေဝ် ညးဒေသတံ ဟီုရ။
ပ္ဍဲဂိတုဨပရဴ ၅ တေံ ဂကောံဒပ်ပံၚ်ကောံပၠန်ဂတး KNLA တံ ဗ္တိုက်သီဂွံလဝ် တမ်ဒပ် ၃ ဒပ် ကေုာံ ဗျူဟာပၞာန် ကံၚ်ဇြဳပၞာန် ဖျေံသ္ဇိုၚ်တေန်ဂါန်ညဳနံၚ် ဗ္ဒါဲဍုၚ်ဗြဝတဳဂှ်တုဲ ဆက်ဗိုၚ်ကၟာတ်လဒဵုလဝ် ခလရ ၂၇၅ ဒပ်ကံၚ်ဇြဳပၞာန် သှ်ေဒၟံၚ် ပ္ဍဲဍုၚ်ဗြဝတဳဂှ်တုဲ ပ္ညဳပ္ညပ်လဝ် သွက်ဂွံဖျေံလွဟ်ရ။
အခိၚ်ကၠောန်သ္ပပ္ညဳပ္ညပ်တက်ကျာ ၜါလ္ပာ်သာ်ဏံဂှ် ပ္ဍဲဍုၚ်ဗြဝတဳ ပေါဲဗ္တိုက်ညိၚ်အာ ၜိုတ် ၃ တ္ၚဲတုဲ ဟိုတ်နူအကာဲအရာပရေၚ်ပၞာန်တုဲ ညးဍုၚ်ကွာန်ဒေသ မံၚ်တန်တဴဒၟံၚ် ဗ္ဒါဲခလရ ၂၇၅ ဂမၠိုၚ်ဝွံ ကၠောန်သ္ပဆုဲပြံၚ်ဒၟံၚ်ဒၞါဲအိုတ်ရ။
ဟိုတ်နူပေါဲဗ္တိုက်တုဲ ပ္ဍဲဍုၚ်ဗြဝတဳလေဝ် ပရေၚ်အာကၠုၚ်သိၚ်ဒၟံၚ်တုဲ လ္ၚဵုတံဂှ်တှ်ေ ဒစးဒုၚ်ပါဲဒလေတ်အာ လ္ပာ်မာဲချံက် ဍုၚ်သေံတုဲ အပ္ဍဲဍုၚ်ဂှ်တှ်ေ သီုကဵုတိုက်သြန်မပါလုပ် ဆေၚ်ဖျာဗွဲမဂၠိုၚ် ကၟာတ်လဝ်အိုတ်ဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ