မတ်မလီု၊ ဨပရဴ ၉
ပေါဲဗ္တိုက်အလုံဍုၚ် ကံၚ်ဇြဳပၞာန် ဇၟာပ်ဗ္တိုက်ကျဒၟံၚ်ဂှ်ဝွံ ကၠာဂွိုအ်စိုပ်အခိၚ်မခုတ်ပ္တန်လဝ်ဂှ် ပံက်လဝ်တန်ဗ္တောန်ကွတ်ပၞာန် ဇၟာပ်ကောန်ဍုၚ်အာယုက်ပေၚ်တုဲ ဒးလုပ်ယိုက်ဂၠေၚ်လျိုၚ်ပၞာန် လၟေၚ် (၁) ဂှ်ယျဂှ် လလောၚ်ပ္တိတ်ကၠုၚ်ရ။
အတးလောန်မ္ဂး စကော်အာ တန်ဗ္တောန်ကွတ်ပၞာန်တံဏောၚ် လ္ပာ်ကံၚ်ဇြဳပၞာန် လလောၚ်တြးလဝ်ကီုလေဝ် ညးမဒးလုပ်ပၞာန်တံဂှ် အပ္ဍဲဂိတုမာတ် သတ္တာဟလက္ကရဴအိုတ်တေံ စကော်လဝ်တုဲ ပ္ဍဲဂိတုဨပရဴ ၈ ဂှ် စကဵုဒၟံၚ်တန်ဗ္တောန် ပ္ဍဲဘာတန်ဗ္တောန်ပၞာန်တံရ။
လၟေၚ် (၁) ဂှ် စကဵုဒၟံၚ်တန်ဗ္တောန် ပ္ဍဲကဵုဘာပၞာန် ၁၅ ဒၞါဲ ရးဒေသ ကေုာံ တွဵုရး ၉ တံဂှ်တုဲ စပ်ကဵုလၟိဟ်ကောန်တန်ဗ္တောန်တံဂှ်တုဲ လ္ပာ်ကံၚ်ဇြဳပၞာန် လလောၚ်ပ္တိတ်လဝ်ဂှ် ဟွံဂွံဆဵုကေတ်ဏီရ။
သၞာဲဒဴဒပ်ပၞာန်တြေံမွဲတၠဂှ် ပြဝကံၚ်ဇြဳပၞာန်ဝွံ ပ္ဍဲအခိၚ်ဍန်န် ပလေဝ်ပလေတ်ဒၟံၚ် သွက်ဂွံကဵုတန်ဗ္တောန် ကုသၟတ်တံတုဲ ကဵုတိတ်မုက်ပၞာန်ဏောၚ်တုဲ ကဵုညးသၟတ်တံဒုၚ်ချိုၚ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကဵုတန်ဗ္တောန်ဏောၚ်မ္ဂး ကျာတ်ညိဏောၚ်ထေၚ်။ အောန်အိုတ် ပိဂိတုဂှ် ဒးကဵုဏောၚ်။ ပိပန်ဂိတု ဟွံကဵုမွဲသာ် ကဵုထောံၜိုတ်မွဲဂိတုဓဝ်မ္ဂး ၜိုတ်ပန်ပှော်လေပ်ညိရတှ်ေ ချိုတ်ညးသ္ကအ်အိုတ်ဏောၚ်။ မၞိဟ်နွံဒၟံၚ်လၟုဟ်တံရဂှ် ဟွံပြေပြံၚ်ပုဟ်။ ရဲလၟုဟ်မှ ဂွံရပ်လွဟ်တံဂှ်တှ်ေ ပြေပြံၚ်ညိဟာ။ ဒှ်အာညံၚ်ရဴ ကဵုညးသၟတ်တံ ဒုၚ်ချိုတ်ရဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဂှ် ညးပါလုပ်ယိုက်ဂၠေၚ်လျိုၚ်ပၞာန် လၟေၚ် (၁) ဂှ်ဝွံ ဒှ်ရဲကဵုလဝ်စရၚ် ဆန္ဒညးကဵုညးရောၚ် ဟီုလဝ်ကီုလေဝ် နတဲဏံဂှ် ကဵုညးသၟတ်တံ ကံက်မာဲတုဲရုဲစှ်ကီု၊ ပကောံကောန်ပၞာန် ဗွဲအနိၚ်အပိုၚ်တံဂှ် နွံလဝ်ရ။
ညးရေၚ်တၠုၚ်ဂဗုတ်ကၠတ်ထဝ်သၞောဝ်ဓဝ်ဝှ်ကြံၚ် ဥူကျဳမျေတ်ဂှ် ကၠာနဲဥပဒေယိုက်ဂၠေၚ်လျိုၚ်ပၞာန် ဂွိုအ်တိတ်ဏီတေံဂှ်ရ ကဵုဒၟံၚ်တန်ဗ္တောန်ပၞာန်တံဂှ်ဝွံ ဒှ်ပြဝ ဂိုဏ်ရာဇဝတ်တံတုဲ ဟိုတ်နူဒှ်ဒပ်ပၞာန် ဍဵုဍိုက်ဒၟံၚ် ကၟိန်ဍုၚ် နကဵုနဲနာနာသာ်ဂှ်ရ ဟီုဂလာန်သၞောဝ်ဟွံဂွံပုဟ်ဂှ် ပါ်ပါဲလဝ်ရ။
“နဲဥပဒေဟွံမွဲဂှ်တှ်ေ ဒှ်ပြဝဒမၠရဏောၚ်။ ဒှ်ပြဝ ရဲဂိုဏ်ကမၠတ်ဒမၠမတာတံရဏောၚ်။ အကြာဥပဒေ ဟွံလုပ်ဒၟံၚ်သၞောဝ်ဂှ် နဲဥပဒေတံ၊ လၟေၚ်ကမၠောန်တံဂှ် ထပ်တုဲ နွံပၟိက်မံၚ်ဏီဏောၚ်။ ဗီုလဵုဂွံပရော။ ဂွံဟီုသာ်လဵုရောဟီုဂှ် ဒးဒုၚ်ကဵုလျိုၚ် ကၟိန်ဍုၚ်ဏောၚ်။ မဆဵုဂှ် ကော်ဓဇက်အာ ဟွံဂွံပုဟ်လေဝ်။ ဒက်လဝ်ဂကောံ ညံၚ်ဂိုဏ်ဒမၠတုဲ ပၠံၚ်ၜးပိုန်ဒြပ်ကၟိန်ဍုၚ်၊ ဂစိုတ်ဂယိုၚ်မၞိဟ်၊ ပလီုကောန်သမ္ဘာ၊ စံၚ်ယတ် ဒပ်ပၞာန်ကၠောန်ဒၟံၚ်သာ်ဏံဂှ် ဟီုဂလာန်သၞောဝ်ဟွံဂွံပုဟ်” သာ်ဝွံ သ္ဂးရ။
ဗွဲမဗဗွဲကဵုသၞောဝ် ကြဴနူလလောၚ်ပ္တိတ် သၞောဝ်မွဲမွဲတုဲမ္ဂး နဲဥပဒေတံ၊ လၟေၚ်ကမၠောန်တံ ဒးလလောၚ်ပ္တိတ်ဏောၚ်တုဲ နဲဥပဒေတံ၊ လၟေၚ်ကမၠောန်တံ နွံမှဟေၚ် ကော်မၞိဟ်တံကီု၊ ဂွံအခေါၚ်ဗၠးၜးတံကီု ဒှ်တမ် ဒးတီချိုတ်တ်ပၠိုတ်တ်ဏောၚ်ဂှ် ညးဆက်ဟီုရ။
အခိၚ်လၟုဟ် ကံၚ်ဇြဳပၞာန်ဝွံ ကၠာနဲဥပဒေ၊ လၟေၚ်ကမၠောန်တံ ဂွိုအ်တိတ်ဂှ် ကဵုဒၟံၚ်တန်ဗ္တောန်ကွတ်ပၞာန်တံဂှ်ဝွံ ဟွံဒ္ဂေတ်ဗက်သၞောဝ်တုဲ ဝးပ္ကဝ်ဒၟံၚ်သၞောဝ် မံက်က်ထေၚ်ၚ်ဏောၚ်ဂှ် ပါ်ပါဲလဝ်ရ။
ညးသၟတ်မွဲတၠဂှ် ဂယိုၚ်ပ္တိုန်သၞောဝ်ယိုက်ဂၠေၚ်လျိုၚ်ပၞာန်တုဲ ကဵုဒၟံၚ်တန်ဗ္တောန်ကွတ်ပၞာန်ဂှ်ဝွံ သွက်သ္ဂောံစဵုဒၞါ အခေါၚ်အရာသ္ဇိုၚ်ညးဍုၚ်ကွာန်တံ ဟွံသေၚ် တၞဟ်နသ္ဂောံစဵုဒၞါ ဒတုဲဖဵုဍေံတံဂှ်တုဲ သွက်ညးသၟတ်တံဂှ် ဒှ်ပြဝအန္တရာယ်မၞုံမွဲရောၚ် ဟီုရ။
“လ္ပာ်ကံၚ်ဇြဳပၞာန် ဂယိုၚ်ပ္တိုန်သၞောဝ်ယိုက်ဂၠေၚ်လျိုၚ်ပၞာန်လၟုဟ်ဂှ် သ္ဂောံစဵုဒၞါအခေါၚ်အရာသ္ဇိုၚ် ညးဍုၚ်ကွာန်တံ ဟွံသေၚ်ပုဟ်။ သွက်ဂွံစဵုဒၞါ ဒတုဲဖဵုဍေံတံတုဲ ညအ်ဂှ် ရံၚ်အာလ္ပာ်တၞဟ်ဟ်မ္ဂး တုပ်တဴညံၚ်ရဴ ဖံက်ပ္ကဝ်ဒၟံၚ် အခေါၚ်ဗၠးၜးညးဍုၚ်ကွာန်တံဏောၚ်။ ဘပဠ အန္တရာယ်လမျီု ညးဍုၚ်ကွာန်တံရ။ ဒှ်ဒၟံၚ်ဗီုပြၚ် ပၠောပ်ထောံ စဵုကဵုအကာဲအရာဂွံညိၚ်ဝတ်ဂှ်တုဲ ညအ်ဂှ် ဒှ်ပြဝအန္တရာယ်နွံမွဲဏောၚ်” သာ်ဝွံ သ္ဂးရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဂှ်မ္ဂး ဇၟာပ်ကောန်ဍုၚ် နူအာယုက် ၁၈ စဵုကဵု ၃၅ ဒးယိုက်ဂၠေၚ်လျိုၚ်ပၞာန်ဏောၚ်တုဲ ယဝ်ရကယျာန်ပါဲဟွံယိုက်ဂၠေၚ်လျိုၚ်ပၞာန်ဂှ်မ္ဂး ဒးဒုၚ်ဖျေံဒဏ်ထံၚ် စဵုကဵု ၅ သၞာံမာန်ဏောၚ်ဂှ် စၞောန်ပျးလဝ်ရ။
သၞောဝ်ယိုက်ဂၠေၚ်လျိုၚ်ပၞာန်ဝွံ စၞောန်ပျးလဝ် ပ္ဍဲသၞာံ ၂၀၁၀ လက်ထက်တၠအဝဵုတြေံ ဥူတာန်ယှိုဲတေံဂှ်တုဲ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ကျဒၟံၚ်ပၞာန်ဂှ် ပၠောပ်လဝ်လမျီု ပ္ဍဲဂိတုဖေဖဝ်ဝါရဳ ၁၀ တေံရ။
အလဵုအသဳညဳသၟဟ်ဂကူ NUG ဂှ် ပ္ဍဲအရာထ္မံက်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန်ဂှ် ပူဂဵုသ္ပအထံက်အပၚ်ကီု ဂကောံဆက်စပ် အဆံၚ်ၚ်တံဂှ် စၟတ်အာ နဒဒှ်သၞညးဍုၚ်ကွာန် ကလိလောန်အမှုရာဇဝတ်ပၞာန်ဏောၚ်တုဲ ကေတ်အာအရေဝ် သ္ကာတ်တ်မြဟ်ဟ်ဏောၚ်ဂှ် ပ္ဍဲဂိတုဖေဖဝ်ဝါရဳ ၁၃ တေံ လလောၚ်တြးလဝ်ရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ သၟတ်အယုက်ပေၚ်တုဲတံဝွံ တိတ်အာဍုၚ်မ္ၚးတံ၊ လုပ်စိုပ်အာဂကောံပၠန်ဂတးတံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram