ကျာ်မြဟ်၊ ဨပရဴ ၁၀
ကွာန်ဓမ္မသ မၞုံဇိုၚ်ၜဳဂြာၚ်သ္ကုတ်သၠုၚ်ကျာ ပွိုၚ်ဍုၚ်ကျာ်မြဟ် တွဵုရးဍုၚ်မန် ပၟတ်တူဒှ်အာဆောံဂှ် ဒပ်ကံၚ်ဇြဳပၞာန် ဆက်ထောံမခတိုဟ် နကဵုပၞာန်ကျာတံရောၚ် ဂွံတီကေတ် ဇရေၚ်ညးဒေသတံရ။
ဒပ်ပံၚ်ကောံပၠန်ဂတးရပ်လွဟ်တံ ချဳဒရာၚ်ဒၟံၚ် အပ္ဍဲကွာန်ဓမ္မသတံနွံဂှ်ရ ပ္ဍဲဂိတုမာတ် ၈ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ် ပေါဲဗ္တိုက်က္တဵုဒှ်ဟွံမွဲမွဲသာ် ကံၚ်ဇြဳပၞာန် ထောံလဝ်မခတိုဟ် နကဵုပၞာန်ကျာရ။
ညးဒေသကွာန်ဓမ္မသမွဲတၠဂှ် က္ၜၚ်ကျာကံၚ်ဇြဳပၞာန် ပဝ်ယာန်ဒၟံၚ်ဂှ်ဝွံ ရိုဟ်လၟိဟ်လ္တုန်ဟွံမာန်ကီုလေဝ် ထောံမခတိုဟ်ဂၠိုၚ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“က္ၜၚ်ကျာဂှ်တှ်ေ ကၠိုဟ်တ္ၚဲရဏောၚ်။ ဆ္ဂး လတုန်ဂှ်တှ်ေ ပိုယ်တံ ရိုဟ်လၟိဟ်ဟွံမာန်ပုဟ်။ ညးတံ (ညးဍုၚ်ကွာန်တံ) ဂှ်တှ်ေ ဖေက်တုဲ အောပ်ဒၟံၚ်ပ္ဍဲဇိုၚ်ဒဵု။ လတုန် (က္ၜၚ်ကျာပဝ်ဂေတ်) ဒၟံၚ်ဂှ် ချိၚ်ဟွံဒးပုဟ်။ က္ၜၚ်ကျာဂှ်တှ်ေ ထောံမခတိုဟ်ဂှ် ဂၠိုၚ်ဒၟံၚ်။ နူဏေံတေံ ထောံဂၠိုၚ်အိုတ်ရ။ ပေါဲဗ္တိုက်ဒှ်၊ ဟွံဒှ်ဂှ် အဲလေဝ် ဟီုဟွံလေပ်ပုဟ်” သာ်ဝွံ သ္ဂးရ။
ဟိုတ်နူကံၚ်ဇြဳပၞာန် ထောံမခတိုဟ်ဗ္တိုက်ဒၟံၚ် နူကဵုပၞာန်ကျာဂှ်တုဲ ဘာလကျာ်ကွာန်ဓမ္မသ ပၟတ်တူဒးလီုလာ်အာလဝ်တုဲ သ္ၚိဒၟံၚ်မၞုံမွဲဒမြိပ် သ္ကုတ်ပလိုတ်ကွာန်ဂှ်လေဝ် ပၟတ်တူအိုတ်ဂှ် ညးဒေသဂှ် ဟီုလဴထ္ၜးလဝ်ရ။
နူဏေံဗ္တံ ၉ နာဍဳပြၚ်ဂှ်လေဝ် ဟိုတ်နူပန်ပှော်လွဟ်ဇၞော် နကဵုတရဴကျာတုဲ မ္ၚးနူကဵုဗ္ဒါဲကွာန်ဓမ္မသဂှ် ဍုၚ်မတ်မလီု မပါလုပ် စဵုကဵုဍုၚ်ကျာ်မြဟ် ကေုာံ ဍုၚ်ပံၚ် စမြိုၚ်ချဳဇတဝ် ဂွံမိၚ်ကေတ်ဒၟံၚ်ရမျာၚ်ဂှ် ညးဒေသလ္တူဍုၚ်တံ ဟီုဂးချူပ္တိုန်လဝ် လ္တူဇာဇၞိက်ပရေၚ်မၞိဟ်ရ။
ပ္ဍဲဂိတုမာတ် ၉ အခိၚ်နူဂယး ၜိုတ် ၁၀ နာဍဳဂှ် ဒပ်ကံၚ်ဇြဳပၞာန် ထောံဒၟံၚ်မခတိုဟ် နူကဵုပၞာန်ကျာတုဲ နူကဵုက္ၜၚ်ပၞာန် အပ္ဍဲၜဳဂြာၚ်တေံဂှ်လေဝ် ပရေၚ်ပန်ပှော် ကဵုလွဟ်ဇၞော်တံလေဝ် ဆက်နွံဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ဟိုတ်နူပရေၚ်ပန်ပှော်ဂှ်တုဲ လ္ပာ်ကွာန်ဓမ္မသ မၞိဟ်ဇီုကပိုက်ဒးချိုတ်အာ ကေုာံ သ္ၚိတူအာ ဟွံမွဲကီုလေဝ် စမြိုင်သာသနာ ပ္ဍဲသုသာန် တၞုၚ်ကွာန်ကြေဝ်ဏာ ပၟတ်တူဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ဗ္ဒိုပ်ဗၠာဲသၟိၚ်တိဍာ်ကအ်ဗိန်ကံၚ်ဇြဳပၞာန် ဒးဒုၚ်သီ ပ္ဍဲဂိတုမာတ် ၂၅ ဂှ်တုဲဂှ် ပ္ဍဲဂိတုမာတ် ၂၇ ဂှ် နူကဵုဒပ်ဍာ်၊ ဒပ်ကျာ၊ ဒပ်အမၠံက်တံ ပန်ပလံၚ်နၚ် ပ္ဍဲကွာန်ဓမ္မသတုဲ သ္ၚိဒၟံၚ် ၃၀၀ ပြၚ် ပၟတ်တူဒှ်အာဆောံတုဲ ကောန်အရာပ်လ္ၚဵု ဇီုကပိုက်ချိုတ်တံလေဝ် နွံလဝ်ရ။
ကြဴနူဗ္ဒိုပ်ဗၠာဲသၟိၚ်ကအ်ဗိန်စှ်ေတုဲ အကြာကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးရပ်လွဟ်တံဂှ် ပေါဲဗ္တိုက်ၜါလ္ပာ် က္တဵုဒှ်လဝ် ဇၞော်ကဵုဇြဟတ် ဟွံမွဲကီုလေဝ် ဟိုတ်နူပန်ဖျေံဒၟံၚ် နူကဵုက္ၜၚ်ပၞာန် ကေုာံ ပၞာန်ကျာတံဂှ်တုဲ ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ရ။
မွဲဒမြိပ်ဇိုၚ်ၜဳဂြာၚ် သ္ကုတ်သၠုၚ်ကျာ ကွာန်ကအ်ဗိန်၊ ကွာန်ကအ်ပံက်၊ ကွာန်ကျာ်ဇၞော်၊ ကွာန်အၚ်ဂစေၚ်၊ ကွာန်ဓမ္မသ၊ ကွာန်ကြေဝ်ဏာတံဂှ် ကံၚ်ဇြဳပၞာန် ပ္တဝ်က္ဍိုပ်တုဲ အရိုဟ်ဒဒှ်တ္ၚဲ ပန်ပှော်ဒၟံၚ် နကဵုလွဟ်ဇၞော် နူကဵုဒပ်ဍာ်၊ ဒပ်ကျာ၊ ဒပ်တိုက်တံဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ