ဗြဝတဳ၊ ဨပရဴ ၁၁
ပ္ဍဲဍုၚ်ဗြဝတဳ ပေါဲဗ္တိုက်တံ သ္ကာတ်မြဟ်ဒၟံၚ်ဂှ် နူကဵုပၞာန်ကျာမွဲကဆံၚ် ဒပ်ကံၚ်ဇြဳပၞာန် ထောံမံၚ်မခတိုဟ် နကဵုက္ၜၚ်ကျာ ဟွံပိုတ်သ္ကုတ်တုဲ နူကဵုဗလးတိဏံဂှ်လေဝ် ပလံၚ်ဗစိုပ်ဒၟံၚ် ကရောၚ်ပၞာန်အရီုဗၚ် သီုကဵုကွဳစၚ်ခြပ်ပသဲတံ မပါလုပ်ဂှ် ဂွံတီကေတ် အတိုၚ်ဂလာန် ညးဍုၚ်ကွာန်ဒေသတံကဵု ပရိုၚ်တမ်ရိုဟ်ဗလးတိတံရ။
တမ်ဒပ်ကံၚ်ဇြဳပၞာန် ခလရ ၂၇၅ သှ်ေဒၟံၚ် ပ္ဍဲဗြဝတဳ တွဵုရးကရေၚ်မွဲဂှ် စနူဂိတုဨပရဴ ၉ တုဲ ဒပ်ပံၚ်ကောံ KNLA တံ လုပ်စိုပ်ဗ္တိုက်လဝ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ဗွဲမသ္ကာတ်မြဟ်တုဲ ဒပ်ကံၚ်ဇြဳပၞာန် ထောံလဝ်မခတိုဟ် နကဵုက္ၜၚ်ကျာ ဟွံပိုတ်သ္ကုတ်ရ။
ပေါဲဗ္တိုက်ၜါလ္ပာ်ဂှ်ဝွံ ပ္ဍဲဂိတုဨပရဴ ၁၀ အတိုၚ်မွဲတ္ၚဲ ဆက်သ္ကာတ်မြဟ်လဝ်တုဲ ဒပ်ကံၚ်ဇြဳပၞာန် ထောံမခတိုဟ်ဗ္တိုက်ဒၟံၚ် နကဵုက္ၜၚ်ကျာ ပွဳဗွိုၚ် ခလရ ၂၇၅ ကေုာံ ဒၞါဲစွံကာ စိမ်းလဲ့မြိုင် ကွာန်အေးသုခ၊ ဒၞါဲမ္ၚးဍုၚ်ဗြဝတဳ အရာပ် (၆) တံဂှ် ဟိုတ်ပိုတ်သ္ကုတ်တုဲ သ္ၚိဒၟံၚ်ဂမၠိုၚ် ပၟတ်တူဒးလီုလာ်အာလဝ်ရောၚ် ဂွံတီကေတ် အတိုၚ်တမ်ရိုဟ်ပရိုၚ်ဗလးတိတံရ။
ဟိုတ်နူပေါဲဗ္တိုက်ၜါလ္ပာ် ဂကောံဒပ်ပံၚ်ကောံ KNLA တံကဵု ကံၚ်ဇြဳပၞာန် မက္တဵုဒှ်ဒၟံၚ် ဗ္ဒါဲမ္ၚးဍုၚ်ဗြဝတဳဂှ်တုဲ ညးဍုၚ်ကွာန်ဒေသ မၞုံပ္ဍဲဍုၚ်ဗြဝတဳတံဝွံ ဒးပါဲဒလေတ်ဒၟံၚ် လ္ပာ်ဍုၚ်မာဲချံက် ဍုၚ်သေံတုဲ စဵုကဵုဂိတုဨပရဴ ၁၀ ညးဒေသတံ ပါဲဒလေတ်စိုပ်ကၠုၚ် လ္ပာ်မာဲချံက်ဂှ်ဝွံ ဂၠိုၚ်နူကဵုတ္ၚဲကၠာတေံဏီရောၚ် တမ်ရိုဟ်ပရိုၚ်ပယျဵုတံ ဟီုရ။
မ္ၚးဍုၚ် ပွဳဗွိုၚ်ဗ္ဒါဲဒပ်ကံၚ်ဇြဳပၞာန် ခလရ ၂၇၅ ဂှ် ပေါဲဗ္တိုက်တံ သ္ကာတ်မြဟ်ဒၟံၚ်ကီုလေဝ် ပ္ဍဲဍုၚ်ဗြဝတဳဂှ် ဒပ်မၚ်ပယျဵုကရေၚ် BGF ဂေတ်ကၚ် ကေတ်ဒၟံၚ်ဒၞါဲ နွံဒၟံၚ်ရောၚ် တမ်ရိုဟ်ပရိုၚ် BGF သ္ဂးရ။
ဟိုတ်နူအကာဲအရာပေါဲဗ္တိုက်တုဲ ဒၞါဲဂၠံၚ်လုပ်တိတ်ဍုၚ်ဗြဝတဳ ဂၠံၚ်ကွဳစက်လ္တူဒဵုဘာအၚ် ဗြဝတဳဂှ် ကၟာတ်လဒဵုလဝ်ရောၚ်ဂှ်လေဝ် ဂွံတီကေတ်ရ။
ဟိုတ်နူပေါဲဗ္တိုက်ဗြဝတဳ သ္ကာတ်မြဟ်ဒၟံၚ် ၜါတ္ၚဲအဆက်က်ဂှ်တုဲ ခလရ ၂၇၅ သှ်ေဒၟံၚ်လက္ကရဴအိုတ်ကဵု ညံၚ်ဍုၚ်ဗြဝတဳ ဂွိုအ်စှ်ေအာဂှ် ဒပ်ကံၚ်ဇြဳပၞာန် နူသဓီု−ဘာအၚ်မွဲကဆံၚ် ပလံၚ်ဗစိုပ်ဒၟံၚ် ကရောၚ်ပၞာန်အရီုဗၚ် ကွဳစၚ်ခြပ်ပသဲ ကေုာံ ကရောၚ်ယာန်ပၞာန် ဗွဲမဂၠိုၚ်ဂၠေၚ် မပ္တဝ်ကၠုၚ်က္ဍိုပ် လ္ပာ်ဗြဝတဳ ကအ်ကြိက်ဂှ်ရ။
ကရောၚ်ယာန်ပၞာန် ပါလုပ်သီုကဵုရေၚ်ကွဳစၚ်ခြပ်ပသဲတံဂှ်ဝွံ ပ္တဝ်က္ဍိုပ်တိတ်အာ လ္ပာ်ဍုၚ်ဗြဝတဳဂှ် တမ်ရိုဟ်ပရိုၚ်အပ္ဍဲဒေသတံ သ္ဂးအိုတ်ရ။
ပ္ဍဲဍုၚ်ဗြဝတဳ ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်တုဲ သၟိၚ်တၠအဝဵုသေံတံလေဝ် သၠုၚ်ပ္တိုန်လဝ်ပရေၚ်ဂီုကၠီု ဍုၚ်ပယျဵု ဍုၚ်မာဲချံက်ရ။
ပရိုၚ်−သြၚ်လောန်တိုၚ်(မ်)
ဗီု−CJ/Thai PBS