သဵုလ်၊ ဨပရဴ ၁၂
ပ္ဍဲပေါဲရုဲမာဲကိုဝ်ရဳယျာသၠုၚ်ကျာဂှ် သၟာပရေၚ်ဍုၚ်ကွာန် သ္ဇက်ဒးဒှ်ပရေၚ်ကယျာန်ဓဝါန် က္ဍိုပ်သ္ကိုပ်လ္ပာ်ဒစဵုဒစး လဳဂျေမန် ဂွံဇၞးလဝ်ရောၚ် ဂွံတီကေတ်ရ။
ဗော်ဒဳမဝ်ကရေတ်တေတ်ညးဝွံ ဂွံဇၞးလဝ် ပ္ဍဲပေါဲရုဲမာဲကၠတ်ထဝ်တုဲ နကဵုသမ္မတ ကိုဝ်ရဳယျာသၠုၚ်ကျာ ယောန်သက်ယော ဒးဆေၚ်ကၠုၚ်မုက် ကုအခက်အခုဲဂမၠိုၚ်ရ။
လဳ မဒှ်ကောန်ကလောန်ရုၚ်စက်တြေံ နူကဵုအကာဲအရာ မုဟွံမွဲ ဒှ်ကၠုၚ်ညးသိုက်လောဲ ဇဖန်ဟီုလဴအာ ဝၚ်ညး စိုပ်ကၠုၚ်ဒၞါဲကဆံၚ်သၠုၚ်အိုတ် ပ္ဍဲပရေၚ်ဍုၚ်ကွာန် ကိုဝ်ရဳယျာသၠုၚ်ကျာဂှ်ဝွံ ပ္ဍဲပေါဲရုဲမာဲသမ္မတ ၂၀၂၂ ဂှ် ကျအာလဝ် သမ္မတယောန် လၟုဟ် နကဵုသွဟ်မာဲခြာအောန်အိုတ် ပ္ဍဲရာဇဝၚ်ကၟိန်ဍုၚ်ဂှ်ကီုလေဝ် အခိၚ်လၟုဟ် သွက်ဂွံကလေၚ်ပၠန်တဲ ညးဂွံလဝ်ဇၞးရ။
ဗော်ညးကဵု သ္ကအ်ရဲအဖဝ်ညးဂမၠိုၚ်ဝွံ ပ္ဍဲကၠတ်ထဝ်ကောန်ဂကူဂှ် ဗွဲမဂၠိုၚ် ဂွံကၠုၚ်ဒၞါဲတုဲ နကဵုအလဵုအသဳ ပ္ဍဲအရာဖျေံစၟတ် မူဝါဒတၟိတံဂှ် အခက်အခုဲနွံကၠုၚ်မာန်ဏောၚ် ဂွံတီကေတ်ရ။
အာယုက်ဌာနန္တရ သမ္မတ မသုန်သၞာံမွဲဝါဂှ် ပ္ဍဲ ၂၀၂၇ အိုတ်ဏောၚ်တုဲ ညးဝွံ လုပ်ပြိုၚ်အာပေါဲရုဲမာဲ သမ္မတဏောၚ်တုဲ ဒှ်ကၠုၚ်သမ္မတကိုဝ်ရဳယျာသၠုၚ်ကျာမာန်ဂှ် ဂွံတီကေတ်ရ။
အပ္ဍဲဂိတုဂျာန္နဝါရဳဂှ် လဳ ဒးဒုၚ်ထ္ပက်လဝ်ၜုန် ပ္ဍဲကအ် ကဵုမၞိဟ်တြုံ ပလဝ်ပၞ နဒဒှ်ညးထံက်ဂလာန်ညး မွဲတၠဂှ်ဝွံ ကဵုအာဒုဟ်ဒဏ် ကုသမ္မတလၟုဟ် နူကဵုပေါဲရုဲမာဲမွဲကဆံၚ်ဏောၚ်ဂှ် ဟီုကြီုလဝ်ရ။
နကဵုညး ၜိုန်ရရုန်တိတ် နူကဵုဒိုက်ဝါတ်မာန်ကီုလေဝ် မၞိဟ်ပွဳပွူညး မဂၠိုၚ်ဂၠေၚ် ကျာတ်ဝါတ်ဒၟံၚ်ဖိုဟ်ဂှ်ရ ပြံၚ်လှာဲအာသၞောတ်ဏောၚ်ဂှ် လဳ ဟီုကြီုလဝ်ရ။
ဆက်စပ်ကဵု ကမၠောန် လှဲပြံၚ်ကဵုလဝ် ကိုဝ်ရဳယျာသၟဝ်ကျာ ၆ ပြကောဋိကိုဋ်ဒဝ်ဠာတုဲ ညးဝွံ ဒးဒုၚ်စောဲလဝ်ဂဗုတ် နကဵုပရေၚ်ကဵုကေတ်လာဘ်ဗဇဴတုဲ ဒးဆေၚ်ဒၟံၚ်မုက် သီုကဵုဂဗုတ်တၞဟ်ဟ်ကီုလေဝ် ဂဗုတ်စောဲစပ်လဝ်ကုညးဂမၠိုၚ်ဝွံ ပရေၚ်ဆဝ်မ္ၚုဟ်ပရေၚ်ဍုၚ်ကွာန်တံလေဝ် ပါလုပ်ဒၟံၚ်ရောၚ် လဳဟီုလဝ်ရ။
အပ္ဍဲကဵုဗော်ညးလေဝ် အာတ်မိက်ဒၟံၚ် လဳ သွက်ဟွံဂွံပါလုပ်ရဂှ်ကီုလေဝ် ဒၟါနူဇၞးအာပေါဲရုဲမာဲဂှ်ရ ရဲဟွံဒးဂၞပ်ညး အပ္ဍဲဗော်တံ ရမျာၚ်သ္ၚိတ်အာမာန်ရောၚ် ညးလ္ၚတ်ဂမၠိုၚ် သ္ၚဳဂၠိပ်လဝ်ရ။
Ref: AFP