ဟဵုချဳမေန်၊ ဨပရဴ ၁၃
ပ္ဍဲဗဳယက်နာမ် ပ္ဍဲဂိတုဨပရဴ ၁၁ ဂှ် ဖျေံလဝ်ဒဏ်ထံၚ် ကုသေဌဳဗဳယက်နာမ် တိသ္ၚိကၠအ်မွဲတၠ နကဵုပရေၚ်လီဠာန်သြန် ၃၀၄ ထရဳလဳယာန်ဒံၚ် (၁၂ ဒဿမ ၄၆ ဗဳလျာန်ဒဝ်ဠာ) နဒဒှ်ပရေၚ်လီဠာန်ဇၞော်အိုတ်ဂှ် ဂွံတီကေတ်ရ။
ဥက္ကဌဗြဴ ကမ္ပဏဳပရေၚ်သိုၚ်ခၞံတိသ္ၚိကၠအ် Van Thinh Phat Holdings Group မၞုံယၟု ထရူအာန်မိုၚ်လာန်ဂှ်ဝွံ စၟဳတ်ဂွံဆဵုကေတ် ဒဒှ်ရဒုဟ်နွံ သွက်ပရေၚ်လီဠာန်သြန်၊ ကဵုကေတ်လာဘ်ဗဇဴ ကေုာံ ဝးပ္ကဝ်သၞောဝ်တိုက်သြန်တံ မဒှ်ရ။
ဂကောံမၞိဟ်ဇၞော်ဂျူရဳ အလဵုအသဳရုဲစှ်လဝ် ၃ တၠ ပါလုပ်ဂှ်ကဵု နာဲဗ္စာ ၂ တၠတံ တးပါဲလဝ် ဂလာန်ညးမကလေၚ်ပၠန် ဒဒှ်ရဟွံဍာံပြဂှ် ဂွံတီကေတ်ရ။
ပြဝ ညးတၠဒုဟ်တံဂှ် က္တဵုဗဒှ်ဒၟံၚ် ညံၚ်ဓဝ်ပတှ်ေညးဍုၚ်ကွာန် လ္တူဗော်ကောန်မျူနေတ် ကေုာံ လ္တူအလဵုအသဳ ဂွံလီုလာ်အာဏောၚ်ဂှ် ဂကောံနာဲဗ္စာဂှ် သ္ဂးရ။
ကြဴနူစၟဳတ် လလအ်ပွိုၚ်မသုန်သတ္တာဟတုဲဂှ် မၞိဟ် ၈၅ တၠ တၞဟ်ဟ်တံဂှ်လေဝ် ဒးဆေၚ်ဒၟံၚ်မုက် နကဵုတၚ်စောဲစပ်နာနာတုဲ ဒးဒုၚ်ဖျေံစၟတ်ဒဏ်ထံၚ်နာနာမာန်ရောၚ် ဂွံတီကေတ်ရ။
မေဿလာန်ဂှ် တးပါဲကၠေံ တၚ်စောဲစပ်တံဂှ်တုဲ ၜိုန်ရပ္တိုန်လဝ်ဒုဟ် ကုကောန်ရဲသၟဝ်တဲညးကီုလေဝ် နူကဵုတိုက်သြန် SCB ရဲသ္ကအ်ညး ထိၚ်ဒက်လဝ်ဂှ် ကေတ်လဝ် ၁၂ ဒဿမ ၅ ဗဳလျာန်ဒဝ်ဠာပြၚ် ဟွံဗဗွဲကဵုသၞောဝ်ဂှ် ညးဂၠိုက်ဂၠါဲစၟဳတ်တံ ကဵုလဝ်သမ္တီရ။
ပ္ဍဲ SCB ကြဴနူသြန်အိုတ်အာတုဲ အလဵုအသဳ ပ္တိတ်ကဵုတုဲ အခိၚ်ရီုဗၚ်ကဵုဂှ် လာန်ဝွံ စဳဇန် သွက်ဂွံဂလေံလှုဲ ဟွံဗဗွဲကဵုသၞောဝ် နူကဵုကမ္ပဏဳဒုၚ်ယၟုဂှ်တုဲ ကေတ်လဝ်သြန်ဗွဲမဂၠိုၚ်ဂၠေၚ်ရောၚ် သ္ဂးလဝ်ရ။
ဟိုတ်နူပရေၚ်လီဠာန်ဏံတုဲ ၚုဟ်မး ဒးဂိဇီုကပိုက်အာ အပံၚ်ဖအိုတ်ဂှ်ဝွံ ၂၇ ဗဳလျာန်ဒဝ်ဠာနွံတုဲ ၜိုတ် ၆ တၟံကၠံ ၚုဟ်မးဗၞိက်ကၠောန်ပ္တိတ် သၞာံ ၂၀၂၃ မွဲ နွံဂှ် ညးရေၚ်တၠုၚ်ဂဗုတ်အလဵုအသဳတံ ဟီုရ။
အတိုၚ်အစဳဇန်ဗော်ကောန်မျူနေတ် ဗ္တိုက်သရိုဟ် ပွမဒ္ဂေတ်လီု အလုံဍုၚ်မွဲဂှ်မ္ဂး ရပ်ဒက်စၟဳတ်လဝ် သၞာဲဒဴဂမၠိုၚ်၊ တၠဓန နူကဵုသွာၚ်ပရေၚ်ပိုန်ဒြပ်တံ ဗွဲမဂၠိုၚ် အပ္ဍဲသၞာံတုဲကၠုၚ်ဟွံလအ်တံဂှ် ဂွံတီကေတ်ရ။
မေဿလာန် အခိၚ်ဟီုဂလာန်လက္ကရဴအိုတ်ဂှ် နကဵုညး ကသပ်သွက်ဂွံဂစိုတ်ဇကုဇကု က္တဵုဒှ်လဝ်ရောၚ် သ္ဂးရ။
Ref: Agencies