တဳဟဳရာန်၊ ဨပရဴ ၁၉
အေဿရေ ၜိုန်ၜက်ၜေတ်ကၠုၚ် ဍုၚ်ဇကုတံ ညိညကီုလေဝ် အလုံဍုၚ်မွဲ ညံၚ်ဂွံလီုလာ် ကၠောန်အာဏောၚ်ဂှ် သမ္မတအဳရာန် ကဵုဏာသတိရ။
ပ္ဍဲသတ္တာဟတုဲကၠုၚ်တေံ ကြဴနူအဳရာန် သုၚ်စောဲဒရုၚ်၊ ကမ်လှောဝ်တုဲ ဗ္တိုက်တုဲဂှ် အေဿရေ ခၠေဝ်ပလန်ဗ္တိုက်ကၠုၚ်မာန်ဂှ်ရ အခိၚ်ဒစးဒုၚ်ပလေဝ်ပလေတ်ဒၟံၚ်ဂှ် သမ္မတအဳရာန်ဂှ် နကဵုအေဿရေ ဒးဆေၚ်အာမုက် ကုပရေၚ်ခၠေဝ်ပလန် ဇြဟတ်သ္ကာတ် နူကဵုဇကုတံဏောၚ်ဂှ် ဟီုလဝ် ပ္ဍဲပေါဲပၠဒပ် မကၠောန်ဗဒှ်လဝ် ပ္ဍဲဂိတုဨပရဴ ၁၇ တေံရ။
ရုၚ်ဝန်ကဵုအရီုဗၚ်အဳရာန် ဖျေံသ္ဇိုၚ်သဳရဳယျာ ဒးဒုၚ်ဗ္တိုက်တုဲ သ္ကိုပ်ဗိုလ်အဳရာန်ၜါတၠ မပါလုပ် ၁၂ တၠ ဒးချိုတ်အာလဝ် ပ္ဍဲဂိတုဨပရဴ ၁ ဂှ် နဒဒှ်ပလန်တဲတုဲ ပ္ဍဲဂိတုဨပရဴ ၁၄ ဂှ် အဳရာန် ဗ္တိုက်လဝ် အေဿရေ နကဵုက္ၜၚ်ကျာမသက္ကုမၞိဟ်ဒဳ၊ ကမ်လှောဝ်တံ ဂၠိုၚ်ကဵုကၠံရ။
ပရေၚ်ဗ္တိုက်ဏံဝွံ ညးတံ ဗ္တိုက်လဝ် နကဵုဗၞတ်ဗ္ၜတ်ဏောၚ်တုဲ ယဝ်ရဒးဒုၚ်ဂၠါဲသၞ ညံၚ်ပရေၚ်ဗ္တိုက်ဇၞော်ဇၞော်တံ ဂွံဒှ်ဂှ်မ္ဂး နကဵုအဳရာန် ၜိုတ်ဇြဟတ်နွံ ကလေၚ်ဗ္တိုက်အာဏောၚ်ဂှ် ရိုၚ်သဳ ဟီုလဝ်ရ။
သီုဗျိတိၚ် ကေုာံ ဂျဝ်ဒါန်တံ မပါလုပ် နကဵုအရီုဗၚ် ဍုၚ်တၞဟ်သ္အာၚ်တံဂှ် ကြတ်ပန်ဖျေံလဝ် ကမ်လှောဝ် ကေုာံ ဒရုၚ် နူကဵုအဳရာန်တံ ပန်ပလံၚ်နၚ်လဝ်တံ သီုဖအိုတ်ဂှ်တုဲ ရပ်စပ်သၞောတ်စဵုဒၞါ တရဴကျာ (သံကွန်ချာ) တုဲ ၉၉ တၟံကၠံ အံၚ်ဇၞးလဝ်ရောၚ် ကဵုလဝ်သမ္တီရ။
ပ္ဍဲကဵုပရိုၚ်ပရေၚ်ပၞာန်တံဂှ် ပ္ဍဲအဳရာန် ကမ်လှောဝ်ထိၚ်သၞေဝ် ဒှ်ဒၟံၚ်ဒတုဲ သွက်ပေါဲပၞာန်တံဂှ် ၜိုတ် ၃၀၀၀ နွံဒၟံၚ်ရောၚ် ထ္မံက်ထ္ၜးလဝ်ရ။
အဳရာန်ဝွံ ကၠာတေံ ပေါဲပၠပၞာန်လၟေၚ်သၞာံတံဂှ် ကၠောန်လဝ် ပ္ဍဲဒေသဇိုၚ်ဇဵုဍုၚ် သ္ကုတ်သၠုၚ်ကျာ ဍုၚ်ဇၞော်တဳဟဳရာန်ကီုလေဝ် သၞာံဏံ ပြံၚ်လှာဲကၠောန်ဗဒှ်လဝ် သ္ကုတ်သၟဝ်ကျာဍုၚ်ဇၞော် ပ္ဍဲကဵုသ္ၚိဇမၠိၚ်သွက်ကောန်ပၞာန်တံဂှ်ရ။
ဟိုတ်ပရူပရာ ပြံၚ်လှာဲဒၞါဲ ဂွံကၠောန်ဗဒှ်လဝ်ဂှ် လ္ပာ်သၞာဲဒဴအဳရာန်တံ သောၚ်ကလးဟီုလဝ်ဟွံမွဲဏီတုဲ ပေါဲပၠဒပ်ဂှ်လေဝ် နူကဵုလိုၚ်ရုပ်ရမျာၚ်ကၟိန်ဍုၚ်ပိုၚ်လေဝ် ဗလးပ္တိတ်ထ္ၜးပျးလဝ် တိုက်ရိုက်ဟွံမွဲပုဟ်ဂှ် ဂွံတီကေတ်ရ။
အဳရာန် ဗ္တိုက်ပလန်တဲဂှ်ဝွံ ချိၚ်ဆတုဲ သွက်ဂွံပလန်တဲဂှ် ဍုၚ်ပလိုတ်တံ ဖ္တိုက်ဖ္အောဝ်လဝ်ကီုလေဝ် သ္ကိုပ်ဝန်ဇၞော်အေဿရေ ဂှ်တှ်ေ တဝ်စၞေဟ်စဵုဒၞါအာဇကုဇကုဏောၚ်ဂှ် ဟီုကြီုလဝ်ရ။
Ref: Fox News