ဝါယှေန်တာန်၊ ဨပရဴ ၂၁
ဍုၚ်ဗျိတိၚ် ကေုာံ အမေရိကာန်တံဝွံ ကၟာတ်လဒဵုကေတ်အာအရေဝ် ကုဍုၚ်အဳရာန် ဗ္တိုက်လဝ် အေဿရေ နကဵုဒရုၚ်ဂှ်ဏောၚ်ဂှ် လလောၚ်တြးလဝ် ပ္ဍဲဂိတုဨပရဴ ၁၈ တေံရ။
ရုၚ်ဝန်ကဵုအရီုဗၚ်အဳရာန် ဖျေံသ္ဇိုၚ်ဍုၚ်သဳရဳယျာ ဒးဒုၚ်ဗ္တိုက်တုဲ ပ္ဍဲဂိတုဨပရဴ ၁၃ တေံ ဗ္တိုက်လဝ်အေဿရေ အလန်ပထမကိုပ်ကၠာအိုတ် တိုက်ရိုက်ရ။
သမ္မတအမေရိကာန် ဂျဵုဗိုၚ်ဒေန်ဂှ် ထိၚ်အာဗၞိက်ပလံၚ် နဒဒှ်ပရေၚ်ကေတ်အရေဝ်ကၟာတ်လဒဵု လ္တူအဳရာန် တၟိဏောၚ်တုဲ ကဵုဒုၚ်ထောံလျိုၚ်ယျဂှ် လလောၚ်တြးလဝ်ရ။
အပ္ဍဲအဳရာန် ဗ္တိုက်အေဿရဂှ်ေ ရပ်စပ်လဝ် ဒရုၚ် ကေုာံ ကမ်လှောဝ် ၃၀၀ ပြၚ်ကီုလေဝ် ဗွဲမဂၠိုၚ်ဂှ် အေဿရေ၊ အမေရိကာန် ကေုာံ ဗျိတိၚ်တံ မပါလုပ် မဟာမိတ်တံ ကြတ်ပန်ဖျေံမာန်လဝ်တုဲ ပရေၚ်ဇီုကပိုက်ညိညရ နွံလဝ်ဂှ် ဂွံတီကေတ်ရ။
သၞာဲဒဴအေဿရေတံဂှ် အခိၚ်လဵုပလန်အာတဲ ကုအဳရာန်တံဏောၚ်ဟီုဂှ် ဟွံဟီုလဝ်ကီုလေဝ် သ္ကိုပ်က္ဍိုက်ပ်ပၞာန်အေဿရဂှ်ေတှ်ေ ခၠေဝ်ပလန်အာဏောၚ်ဂှ် ဟီုကြီုလဝ်ရ။
အမေရိကာန်ဂှ် ကၟာတ်လဒဵုကေတ်အာအရေဝ် ကုကမ္ပဏဳ ၂ ကေုာံ မၞိဟ် ၁၆ တၠ မဆက်စပ်ဒၟံၚ်ကဵု ကိုန်စဳမာန်က္ၜၚ်ကျာ မသက္ကုမၞိဟ်ဒဳ အဳရာန်တံဂှ်ရောၚ် သ္ဂးလဝ်တုဲ ပရေၚ်ကၟာတ်လဒဵုကေတ်အရေဝ်ဏံဝွံ အခိၚ်ဝန်ဇၞော်ကာဍုၚ်သ္အာၚ် G-7 တံ သဳကၠဳဒၟံၚ်ပ္ဍဲအဳတလဳဂှ် မံက်တိတ်ကၠုၚ်လဝ်ရ။
သ္အာၚ်နူဂှ်ပၠန် အလဵုအသဳဗျိတိၚ်လေဝ် စပ်ကဵုကမၠောန်အဳရာန်တုဲ ကၟာတ်လဒဵုကေတ်အာအရေဝ် ကမ္ပဏဳ ၆ ကဵု မၞိဟ် ၇ တၠဏောၚ်ဂှ် လလောၚ်တြးလဝ်ရ။
ပရေၚ်အဳရာန် ဗ္တိုက်အေဿရေ ဂှ်ဝွံ ဒှ်ပြဝဟွံမွဲကဵုဓဝ်ဗ္စာရဏာတုဲ ဒှ်ပြဝ သ္ကဵုပဋိပက္ခ အသိၚ်သၠုၚ်တိုန်ဏောၚ်ဂှ် သ္ကိုပ်ဝန်ဇၞော်ဗျိတိၚ် ဟီုလဝ်ရ။
တုဲကၠုၚ် ပ္ဍဲဂိတုဨပရဴ ၁ တေံ အပ္ဍဲပရေၚ်ဗ္တိုက်ရုၚ်ဝန်ကဵုအရီုဗၚ်အဳရာန် ဒးဒုၚ်ဗ္တိုက်ဂှ် သ္ကိုပ်ဗိုလ် ၂ တၠ မပါလုပ် ကောန်ဒပ်အဳရာန် ၇ တၠ ချိုတ်အာလဝ်ရောၚ် ဂွံတီကေတ်ရ။
Ref: AFP