ဂျေရုသလေန်၊ ဨပရဴ ၂၃
အရီုဗၚ် အမေရိကာန်တံ ပလံၚ်ဗစိုပ်ဒၟံၚ်တံဂှ် ဖန်ဇန်ဒၟံၚ် သွက်ဂွံဒေါအ်ဒေၚ် ကြဴနူပရိုၚ်မံက်တိတ်ကၠုၚ်တုဲ ၜိုတ်ပရေၚ်ကေတ်အရေဝ်ကၟာတ်လဒဵု လ္တူဒပ်ပၞာန်ဇကုတံဂှ် တးပါဲအာဏောၚ် သ္ကိုပ်ဝန်ဇၞော်အေဿရေ ဗေန်ဂျမေန်နေတာန်ယျာဟု ဟီုရ။
စပ်ကဵုဖံက်ပ္ကဝ်အခေါၚ်အရာမၞိဟ် ပ္ဍဲဒေသပြၚ်ၜဳပလိုတ် သီဂွံလဝ်ဂှ်တုဲ အမေရိကာန် စွံပွန်ကေတ်အာအရေဝ် ကုဂကောံဒပ်နာတ်ဇြာယဳဟူဒါ အေဿရေတံဂှ်ဏောၚ် ဝါပ်သာ်ပရိုၚ် Axios ထ္မံက်ထ္ၜးလဝ် အခိၚ်ပြဟ်ဟ်တေံရ။
ဝန်ဇၞော်ကာဍုၚ်သ္အာၚ်အမေရိကာန် အာန်တိုဝ်နဳယိုဝ်ဘလေန်ကာန်ဂှ် ပိုယ်တံ ဖျေံသ္ဂုတ်သွာတ် တုဲအာယျ၊ အပ္ဍဲတ္ၚဲကၠုၚ်စိုပ်ခြာဟွံလအ်ဏံ ဂွံဆဵုကေတ်ဏောၚ်ဂှ် ဟီုလဝ်ရ။
သ္ကိုပ်ဝန်ဇၞော်အေဿရဂှ်ေတှ်ေ စပ်ကဵုအကာဲအရာဏံတုဲ ၜိုတ်ဇြဟတ်နွံ ဗ္တိုက်အာဏောၚ်ဂှ် ပ္ဍဲဂိတုဨပရဴ ၂၁ တေံ သ္ဂးလဝ်တုဲ ဒပ်နာတ်ဇြာယဳဟူဒါဂှ်ဝွံ ချဳဒရာၚ်ရေၚ်တၠုၚ်ဒၟံၚ် အတိုၚ်သၞောဝ်ဍုၚ်သ္အာၚ်တံဂှ်လေဝ် သၟိၚ်တၠအဝဵုတံ သ္ဂးလဝ်ရ။
သ္အာၚ်နူဂှ်ပၠန် ဒပ်ပၞာန်အေဿရဂှ်ေ ပြဝဓမ္မတာဟွံသေၚ် အပ္ဍဲဂကောံဒပ်ညးတံဂှ် ဆက်ဂၠိုက်ဂၠါဲစၟဳတ်အာဏောၚ် ဟီုလဝ်ရ။
သွက်ဂွံရုပ်သီအာ အစဳဇန် ကၟာတ်လဒဵုကေတ်အရေဝ် ကုဂကောံဒပ်ဏံဂှ် ဝန်ဇၞော်ကာစဵုဒၞါအေဿရေ ဂဝ်လ ဖ္တိုက်ဖ္အောဝ်လဝ် အမေရိကာန်တုဲ ကၠာတေံမ္ဂး အမေရိကာန် ပလံၚ်ဗစိုပ်အရီုဗၚ်ဂှ်ဝွံ မွဲလှ်ေမှ ဟွံကေၚ်ဒေါအ်လဝ်ပုဟ်ဂှ် ဂွံတီကေတ်ရ။
ပရေၚ်ဆက်ဆောံ အမေရိကာန် ကေုာံ အေဿရေ ဂှ် ညးဂၠးတံ မၚ်ကျောဝ်ဒၟံၚ်ကြပ်ပ် လ္တူနူကဵုကၠာတေံဂှ်လေဝ် ဝန်ဇၞော်ကာစဵုဒၞါဂှ် သ္ဂးရ။
ပ္ဍဲဒေသပြၚ်ၜဳဒိုဟ်ပလိုတ်ဂှ် ကောန်ဍုၚ်အမေရိကာန်−ပါလက်သတိုၚ် အာယုက် ၈၀ သၞာံမွဲတၠ ချိုတ်အာ နကဵုတၠတဲ ကောန်ဒပ်အေဿရေတံဂှ်တုဲ အမေရိကာန် အာတ်မိက်လဝ် ပရေၚ်ဂၠိုက်ဂၠါဲစၟဳတ်တံရ။
မၞိဟ်တြုံဏံ ဒးချိုတ်အာဂှ်ဝွံ ဟိုတ်နူအကာဲအရာပရေၚ်ထတ်ယုက်ညး နွံမံၚ်ရရဂှ်ရောၚ် ဒပ်ပၞာန်အေဿရေ ဟီုလဝ်တုဲ ကောန်ပၞာန်ၜါတၠဂှ်တှ်ေ ကေတ်လဝ်အရေဝ် အတိုၚ်သၞောဝ် ဟွံမွဲပုဟ်ဂှ် ဂွံတီကေတ်ရ။
ပွမကဵုအရီုဗၚ် ကုဒပ်ပၞာန်ဍုၚ်သ္အာၚ် ပါလုပ်ဆက်စပ်ဒၟံၚ် ပ္ဍဲပရေၚ်ဖံက်ပ္ကဝ်အခေါၚ်အရာမၞိဟ်တံဂှ် အမေရိကာန် တာဒၞါလဝ်ရောၚ် ဂွံတီကေတ်ရ။
Ref: BBC