ဝါယှေန်တာန်၊ ဨပရဴ ၂၄
ပ္ဍဲအရာစၟဳတ်ဂဗုတ် သမ္မတအမေရိကာန်တြေံ ဒဝ်နေဝ်ထြာပ် ကဵုသြန်တုဲ ကၟာတ်ပရိုၚ်ဂှ်ဝွံ ညးရေၚ်တၠုၚ်ဂဗုတ်အလဵုအသဳတံ စောဲစပ်လဝ် ကၠာပေါဲရုဲမာဲ ၂၀၁၆ တေံ စဳဇန်လဝ် ပြဝစပ်ကဵုရာဇဝတ်မွဲတုဲ ဒဒှ်ရဂ္စါန်ကၟာတ်လဒဵုလဝ် အရာမထုဲထံၚ်စပ်ကဵုလိၚ်မွဲ မဒှ်ရ။
အပ္ဍဲအခိၚ်စၟဳတ်ကလၚ်ဒဒၚ်ဂဗုတ် မကၠောန်ဗဒှ်လဝ် ပ္ဍဲဍုၚ်နျူယျံက် ပ္ဍဲဂိတုဨပရဴ ၂၂ တုဲကၠုၚ်တေံဂှ် ညးရေၚ်တၠုၚ်ဂဗုတ်မွဲတၠဂှ် ဒှ်ပရေၚ်လီဠာန်ပေါဲရုဲမာဲဍာံဍာံမွဲရောၚ် ဟီုလဝ်ကဵု ညးဇၞော်ဂျူရဳတံရ။
ညးရေၚ်တၠုၚ်ဂဗုတ်ထြာပ်ဂှ် တၠအမှုညး ကလိလောန်လဝ်အမှုရာဇဝတ်ဟွံမွဲပုဟ်တုဲ သွက်ဂွံအုပ်ဓလီုသြဇာ လ္တူပေါဲရုဲမာဲလေဝ် ပ္တိတ်လဝ်ဇြဟတ် ဗွဲမလုပ်သၞောဝ် ဟွံမွဲပုဟ်ဂှ် ခၠေဝ်ပလန်လဝ်ရ။
ကၠာဟွံဂွံဇၞး ပေါဲရုဲမာဲ ၂၀၁၆ တေံဂှ် ထြာပ်ဝွံ ကဵုလဝ်သြန် ကုကောန်သၟိၚ်ဗြဴ Porn မၞုံယၟု သတောန်မဳ ဒါန်နဳယဴ ၁၃၀၀၀၀ ဒဝ်ဠာဂှ် ဂ္စါန်ကၟာတ်လဒဵုလဝ်ရောၚ် ဒးဒုၚ်စောတ်စောဲလဝ်ရ။
သွက်ဂဗုတ်ဒးဒုၚ်စောဲလဝ် ၃၄ ဂဗုတ် ဒဒှ်ရကၠောန်လဝ် စၟတ်သမ္တီကမၠောန်ပရေၚ်ပိုန်ဒြပ်ပ္တောံဂှ် ဒုဟ်ဟွံမွဲပုဟ် ညးသ္ဂးလဝ်တုဲ ကုမေဿ ဒါန်နဳယဴလေဝ် ပရေၚ်ဆက်ဆောံလိၚ် ဟွံမွဲပုဟ်ဂှ် ထြာပ် ကယျာန်ပါဲလဝ်ရ။
ညးရေၚ်တၠုၚ်ဂဗုတ်အလဵုအသဳတံဂှ် ထြာပ်ဝွံ ကဵုလဝ်သြန် ကၟာတ်ပရိုၚ် ကုမေဿတာ ကိုဝ်ဟေန်သဳ သီုကဵုဒှ်ညးရေၚ်တၠုၚ်ဂဗုတ်ညးတြေံ သီုကဵုဒှ်မၞိဟ်ပတှ်ေညးဂှ်ရောၚ် စောဲစပ်လဝ်ကီုလေဝ် သြန်လှဲပြံၚ်လဝ်ဇရေၚ်ညးဂှ်ဝွံ ဒှ်ၚုဟ်ရေၚ်တၠုၚ်လဝ်ဥပဒေဏောၚ်ဂှ် ခၠေဝ်ပလန်လဝ်ရ။
ဣဏံဝွံ သွက်သမ္မတအမေရိကာန်တြေံမွဲမ္ဂး ဒှ်ဂဗုတ်ဒးဆေၚ်မုက်ကၠာအိုတ်တုဲ ညးရေၚ်တၠုၚ်ဂဗုတ်အလဵုအသဳတံဂှ်တှ်ေ ထြာပ်လီဠာန်ဒၟံၚ်ဏောၚ် သ္ဂးလဝ်တုဲ တၚ်ပၟိက်ဇၞော် ပ္ဍဲဂဗုတ်ဂှ်ဝွံ ညံၚ်ရဲကဵုမာဲဂမၠိုၚ် ဟွံဂွံတီ ပရေၚ်ဆက်ဆောံဓလုက် အကြာညးကဵု မေဿ ဒါန်နဳယဴဂှ် ထြာပ် ပ္တိတ်လဝ်ဇြဟတ်ရောၚ် ညးရေၚ်တၠုၚ်ဂဗုတ်အလဵုအသဳဂမၠိုၚ် ဟီုလဝ်အိုတ်ရ။
ပွမပ္တိတ်ဇြဟတ် သွက်ဂွံကၟာတ်လဒဵုသီုဖအိုတ်ဂှ်ဝွံ ဒှ်ပရေၚ်လီဠာန်ပေါဲရုဲမာဲရောၚ် ညးရေၚ်တၠုၚ်ဂဗုတ်အလဵုအသဳတံ ဟီုလဝ်ဂှ်ရ နကဵုထြာပ် ဒးဆေၚ်အာမုက် ကုဂဗုတ်မွဲပၠန် ဒှ်မာန်ဂှ်လေဝ် ဂွံတီကေတ်ရ။
သမ္မတတြေံ ထြာပ်ဝွံ ဟိုတ်နူဒှ်ညးယၟုဒယှ်မွဲတၠဂှ်ရ ကုညးဗြဴ ညးသ္ဍိုက်မၠိုက်ဣလဵုဟွံဟီု တိက်မံၚ်မာန်ရောၚ် စၟတ်သမ္တီ ဟီုကြီုလဝ်မွဲဂှ်ဝွံ ကေၚ်မံက်တိတ်လဝ် ကၠာပေါဲရုဲမာဲ ၂၀၁၆ တေံရ။
Ref:BBC